24 shlokas
- 1
माहेन्द्रं शुक्रपात्रेण गृह्णाति महाꣳ इन्द्रो य ओजसेत्य् एतेनानुवाकेनोत्तरेण वा
māhendraṃ śukrapātreṇa gṛhṇāti mahām̐ indro ya ojasety etenānuvākenottareṇa vā
- 2
स्तुतशस्त्रे अत्र भवतः
stutaśastre atra bhavataḥ
- 3
स्तोत्रम् उपाकृत्य संप्रेष्यत्य् अभिषोतारो ऽभिषुणुतोलूखलान् उद्वादयाग्नीद् आशिरं विनय सौम्यस्य वित्ताद् इति
stotram upākṛtya saṃpreṣyaty abhiṣotāro 'bhiṣuṇutolūkhalān udvādayāgnīd āśiraṃ vinaya saumyasya vittād iti
- 4
अत्र तार्तीयसवनीयकम् अभिषवम् अभिषुणुयात्सवनीयान्सौम्यम् इति निर्वपेद् आशिरं विनयेद् इत्य् एकम्
तृतीयसवन इत्य् अपरम्
atra tārtīyasavanīyakam abhiṣavam abhiṣuṇuyātsavanīyānsaumyam iti nirvaped āśiraṃ vinayed ity ekam
tṛtīyasavana ity aparam
- 5
शस्त्रं प्रतिगीर्यादत्ते ग्रहम् अध्वर्युः
आददते नाराशंसान्
आददते ऽतिग्राह्यान्
śastraṃ pratigīryādatte graham adhvaryuḥ
ādadate nārāśaṃsān
ādadate 'tigrāhyān
- 6
अत्याक्रम्याश्राव्याहोक्थशा यज सोमस्येति
atyākramyāśrāvyāhokthaśā yaja somasyeti
- 7
वषट्कृते जुहोति
vaṣaṭkṛte juhoti
- 8
व्याख्यातम् अनुप्रकम्पनम्
vyākhyātam anuprakampanam
- 9
ततो ऽतिग्राह्यान्जुह्वत्य् अग्ने तेजस्विन् इत्य् एतैर्मन्त्रैर्यथारूपम्
tato 'tigrāhyānjuhvaty agne tejasvin ity etairmantrairyathārūpam
- 10
व्याख्यातो ग्रहस्य भक्षमन्त्रः
vyākhyāto grahasya bhakṣamantraḥ
- 11
ततो ऽतिग्राह्यान्भक्षयन्ति मयि मेधां मयि प्रजाम् इत्य् एतैर्मन्त्रैर्यथारूपम्
tato 'tigrāhyānbhakṣayanti mayi medhāṃ mayi prajām ity etairmantrairyathārūpam
- 12
व्याख्यातो नाराशंसानाम्
vyākhyāto nārāśaṃsānām
- 13
सर्वान्भक्षयन्ति
sarvānbhakṣayanti
- 14
नाप्याययन्ति
मार्जयन्ते
nāpyāyayanti
mārjayante
- 15
सर्वभक्षा एवात ऊर्ध्वं माध्यंदिने चमसा भवन्ति
sarvabhakṣā evāta ūrdhvaṃ mādhyaṃdine camasā bhavanti
- 16
तत उक्थ्यं विगृह्णाति यथा प्रातःसवने
tata ukthyaṃ vigṛhṇāti yathā prātaḥsavane
- 17
एतावन्नाना
इन्द्राय त्वा
इन्द्राय त्वेति सर्वत्र ग्रहणसादनौ भवतः
etāvannānā
indrāya tvā
indrāya tveti sarvatra grahaṇasādanau bhavataḥ
- 18
ऐन्द्रो भक्षमन्त्रः
aindro bhakṣamantraḥ
- 19
तस्मिन्न् एव काले षोडशिनम् अभिगृह्णाति
tasminn eva kāle ṣoḍaśinam abhigṛhṇāti
- 20
षोडशिनं गृहीत्वा संप्रेष्यत्य् उत्तमांश्चमसान् उन्नय द्रोणकलशं पूतभृत्य् अवनय सर्वं राजानं चमसेषून्नय दशाभिः कलशौ मृष्ट्वा न्युब्जेति
ṣoḍaśinaṃ gṛhītvā saṃpreṣyaty uttamāṃścamasān unnaya droṇakalaśaṃ pūtabhṛty avanaya sarvaṃ rājānaṃ camaseṣūnnaya daśābhiḥ kalaśau mṛṣṭvā nyubjeti
- 21
उक्थं वाचीत्य् आह माध्यंदिनं सवनं प्रतिगीर्य
ukthaṃ vācīty āha mādhyaṃdinaṃ savanaṃ pratigīrya
- 22
विश्वे देवा मरुत इन्द्रो अस्मान् इत्य् आहुतिं हुत्वा संप्रेष्यति प्रशास्तः प्रसुहीति
viśve devā maruta indro asmān ity āhutiṃ hutvā saṃpreṣyati praśāstaḥ prasuhīti
- 23
सर्पतेत्य् आह प्रशास्ता
sarpatety āha praśāstā
- 24
संतिष्ठते माध्यंदिनं सवनम्
saṃtiṣṭhate mādhyaṃdinaṃ savanam

