18 shlokas
- 1
ततः सौम्यं चरुं निर्वपति
सवनीयैर्वा सह
tataḥ saumyaṃ caruṃ nirvapati
savanīyairvā saha
- 2
तम् आसाद्य यथागृहीतम् आज्यं गृहीत्वात्याक्रम्याश्राव्याह घृतस्य यजेति
tam āsādya yathāgṛhītam ājyaṃ gṛhītvātyākramyāśrāvyāha ghṛtasya yajeti
- 3
वषट्कृते जुहोति
vaṣaṭkṛte juhoti
- 4
अत्रैवोपविश्य प्राचीनावीतं कृत्वा हस्तेन सौम्यस्य पूर्वम् अवदानम् अवद्यति मेक्षणेनोत्तरम्
atraivopaviśya prācīnāvītaṃ kṛtvā hastena saumyasya pūrvam avadānam avadyati mekṣaṇenottaram
- 5
अभिघार्योदङ्ङ् अत्याक्रम्याश्राव्याह सौम्यस्य यजेति
abhighāryodaṅṅ atyākramyāśrāvyāha saumyasya yajeti
- 6
वषट्कृते दक्षिणार्धे जुहोति
vaṣaṭkṛte dakṣiṇārdhe juhoti
- 7
अत्रैवोपविश्य यज्ञोपवीतं कृत्वाप उपस्पृश्य यथागृहीतम् आज्यं गृहीत्वात्याक्रम्याश्राव्याह घृतस्य यजेति
atraivopaviśya yajñopavītaṃ kṛtvāpa upaspṛśya yathāgṛhītam ājyaṃ gṛhītvātyākramyāśrāvyāha ghṛtasya yajeti
- 8
वषट्कृते जुहोति
vaṣaṭkṛte juhoti
- 9
अन्यतरतः परीज्याम् एके सौम्यस्य समामनन्ति
anyatarataḥ parījyām eke saumyasya samāmananti
- 10
आज्येन चरुम् अभिपूर्योद्गातृभ्यो हरन्ति
ājyena carum abhipūryodgātṛbhyo haranti
- 11
तम् अवेक्षन्ते सत्रो त एतद्यद् उ त इहेति
tam avekṣante satro ta etadyad u ta iheti
- 12
यद्य् अगतासुर्भवति परिपश्यति
यदि गतासुः स्यात्सो ऽवेक्षेत यन्मे मनः परागतम् इत्य् एतया
yady agatāsurbhavati paripaśyati
yadi gatāsuḥ syātso 'vekṣeta yanme manaḥ parāgatam ity etayā
- 13
आमयाविना प्राश्यो ऽन्नाद्यकामेन प्राश्यो यो ऽलम् अन्नाद्याय सन्न् अन्नं नाद्यात्तेन प्राश्य इति विज्ञायते
āmayāvinā prāśyo 'nnādyakāmena prāśyo yo 'lam annādyāya sann annaṃ nādyāttena prāśya iti vijñāyate
- 14
जुह्वां नवगृहीतम् आज्यं गृहीत्वा ज्वलतो धिष्णियान्व्याघारयति
juhvāṃ navagṛhītam ājyaṃ gṛhītvā jvalato dhiṣṇiyānvyāghārayati
- 15
व्याघारणसंपातं निधायोपांशुपात्रेण पात्नीवतम् आग्रयणाद्गृह्णात्य् उपयामगृहीतो ऽसि बृहस्पतिसुतस्य त इन्दो इन्द्रियावतः पत्नीवन्तं ग्रहं गृह्णामीति
vyāghāraṇasaṃpātaṃ nidhāyopāṃśupātreṇa pātnīvatam āgrayaṇādgṛhṇāty upayāmagṛhīto 'si bṛhaspatisutasya ta indo indriyāvataḥ patnīvantaṃ grahaṃ gṛhṇāmīti
- 16
व्याघारणसंपातेन श्रीत्वात्याक्रम्याश्राव्याहाग्नीत्पात्नीवतस्य यजेति
vyāghāraṇasaṃpātena śrītvātyākramyāśrāvyāhāgnītpātnīvatasya yajeti
- 17
वषट्कृते जुहोति अग्ना३इ पत्नीवा३ इत्य् अनुवाकशेषेण
vaṣaṭkṛte juhoti agnā3i patnīvā3 ity anuvākaśeṣeṇa
- 18
सानुवषट्कारम् एके पात्नीवतं समामनन्त्य् अननुवषट्कारम् एके
उपांश्व् अनुवषट्करोतीत्य् एकेषाम्
sānuvaṣaṭkāram eke pātnīvataṃ samāmananty ananuvaṣaṭkāram eke
upāṃśv anuvaṣaṭkarotīty ekeṣām

