20 shlokas
- 1
पुरस्तात्प्रत्यङ्तिष्ठन्होतृचमसे ध्रुवम् अवनयति ध्रुवं ध्रुवेणेत्य् अनुवाकशेषेण
purastātpratyaṅtiṣṭhanhotṛcamase dhruvam avanayati dhruvaṃ dhruveṇety anuvākaśeṣeṇa
- 2
पश्चात्प्राङ् आसीनो ऽनुलोमम् अवनयतीत्य् एकेषाम्
paścātprāṅ āsīno 'nulomam avanayatīty ekeṣām
- 3
संततां धारां स्रावयत्य् आ शस्त्रापवर्गात्
saṃtatāṃ dhārāṃ srāvayaty ā śastrāpavargāt
- 4
शस्त्रं प्रतिगीर्यादत्ते ग्रहम् अध्वर्युः
आददते चमसांश्चमसाध्वर्यवः
śastraṃ pratigīryādatte graham adhvaryuḥ
ādadate camasāṃścamasādhvaryavaḥ
- 5
अत्याक्रम्याश्राव्याहोक्थशा यज सोमानाम् इति
atyākramyāśrāvyāhokthaśā yaja somānām iti
- 6
वषट्कृते जुह्वति
vaṣaṭkṛte juhvati
- 7
यथाचमसं चमसिनो भक्षयन्ति
अग्निना वैश्वानरेण पीतस्येति ग्रहस्य भक्षमन्त्रं नमति
yathācamasaṃ camasino bhakṣayanti
agninā vaiśvānareṇa pītasyeti grahasya bhakṣamantraṃ namati
- 8
तत आदित्यम् उपतिष्ठत आहवनीयं वा सुभूर् असि श्रेष्ठो रश्मीनाम् आयुर्म इन्द्रियं धेह्य् अदो म आ गम्याद् इति
यत्कामयते तस्य नाम गृह्णातीति विज्ञायते
tata ādityam upatiṣṭhata āhavanīyaṃ vā subhūr asi śreṣṭho raśmīnām āyurma indriyaṃ dhehy ado ma ā gamyād iti
yatkāmayate tasya nāma gṛhṇātīti vijñāyate
- 9
इति वै खलु यद्य् अग्निष्टोमः
iti vai khalu yady agniṣṭomaḥ
- 10
अथ यद्य् उक्थ्यः सर्वं राजानं चमसेषून्नय दशाभिः कलशौ मृष्ट्वा न्युब्जेति लुप्यत एतत्संप्रैषस्य
atha yady ukthyaḥ sarvaṃ rājānaṃ camaseṣūnnaya daśābhiḥ kalaśau mṛṣṭvā nyubjeti lupyata etatsaṃpraiṣasya
- 11
अग्निष्टोमचमसान् उन्नयंस्त्रिभ्यश्चमसगणेभ्यो राजानम् अतिरेचयति
agniṣṭomacamasān unnayaṃstribhyaścamasagaṇebhyo rājānam atirecayati
- 12
तत उक्थ्यं विगृह्णाति यथा प्रातःसवने
tata ukthyaṃ vigṛhṇāti yathā prātaḥsavane
- 13
एतावन्नाना
इन्द्रावरुणाभ्यां त्वेति मैत्रावरुणस्य ग्रहणसादनौ भवतः
इन्द्राबृहस्पतिभ्यां त्वेति ब्राह्मणाच्छंसिनः
इन्द्राविष्णुभ्यां त्वेत्य् अछावाकस्य
एवम् एवैतान्भक्षमन्त्रान्नमति
etāvannānā
indrāvaruṇābhyāṃ tveti maitrāvaruṇasya grahaṇasādanau bhavataḥ
indrābṛhaspatibhyāṃ tveti brāhmaṇācchaṃsinaḥ
indrāviṣṇubhyāṃ tvety achāvākasya
evam evaitānbhakṣamantrānnamati
- 14
इति वै खलु यद्य् उक्थ्यः
iti vai khalu yady ukthyaḥ
- 15
अथ यदि षोडश्य् अछावाकचमसान् उन्नयन्न् एकस्मै चमसगणाय सग्रहाय राजानम् अतिरेचयति
तस्मिन्न् एव काले षोडशिनम् अभिगृह्णाति
atha yadi ṣoḍaśy achāvākacamasān unnayann ekasmai camasagaṇāya sagrahāya rājānam atirecayati
tasminn eva kāle ṣoḍaśinam abhigṛhṇāti
- 16
अपि वैनम् अत्रैवाग्रयणाद्गृह्णीयात्
न पूर्वयोः सवनयोः
api vainam atraivāgrayaṇādgṛhṇīyāt
na pūrvayoḥ savanayoḥ
- 17
अप्य् अग्निष्टोमे राजन्यस्य गृह्णीयाद् इति विज्ञायते
apy agniṣṭome rājanyasya gṛhṇīyād iti vijñāyate
- 18
अनन्तरम् अग्निष्टोमचमसेभ्यो गृह्णीयात्
anantaram agniṣṭomacamasebhyo gṛhṇīyāt
- 19
होतृचमसमुख्यांश्चमसान् उन्नयति
hotṛcamasamukhyāṃścamasān unnayati
- 20
स्तुतशस्त्रे अत्र भवतः
stutaśastre atra bhavataḥ

