25 shlokas
- 1
याम् अन्यो दीयमानां न कामयेत यं द्विष्यात्तस्मै तां दक्षिणां दद्याद् अन्येन धनेन सह
yām anyo dīyamānāṃ na kāmayeta yaṃ dviṣyāttasmai tāṃ dakṣiṇāṃ dadyād anyena dhanena saha
- 2
कुत एतेभ्यो दद्यात्
एतस्माद् एव द्वादशाच्छताद् इत्य् एकम्
अन्यत इत्य् अपरम्
kuta etebhyo dadyāt
etasmād eva dvādaśācchatād ity ekam
anyata ity aparam
- 3
वि सुवः पश्य व्य् अन्तरिक्षम् इति सदः प्रेक्षेत
vi suvaḥ paśya vy antarikṣam iti sadaḥ prekṣeta
- 4
संनीता दक्षिणा अनुमन्त्रयते ऽस्मद्दात्रा देवत्रा गच्छतेत्य् अनुवाकशेषेण
saṃnītā dakṣiṇā anumantrayate 'smaddātrā devatrā gacchatety anuvākaśeṣeṇa
- 5
आग्नीध्रे वैश्वकर्मणानि जुहोति यज्ञपतिम् ऋषय एनसाहुर् इति पञ्च
āgnīdhre vaiśvakarmaṇāni juhoti yajñapatim ṛṣaya enasāhur iti pañca
- 6
चात्वाले कृष्णविषाणां प्रास्यति
हरिणस्य रघुष्यदो ऽधि शीर्षणि भेषजम्
सुक्षेत्रियं विषाणया विषूचीनम् अनीनशत्
अनु त्वा हरिणो मृगः पद्भिश्चतुर्भिर् अक्रमीत्
विषाणे विष्यैतं ग्रन्थिं यद् अस्य गुल्फिदं हृदि मनो यद् अस्य गुल्फिदम्
इत्य् एताभ्याम्
cātvāle kṛṣṇaviṣāṇāṃ prāsyati
hariṇasya raghuṣyado 'dhi śīrṣaṇi bheṣajam
sukṣetriyaṃ viṣāṇayā viṣūcīnam anīnaśat
anu tvā hariṇo mṛgaḥ padbhiścaturbhir akramīt
viṣāṇe viṣyaitaṃ granthiṃ yad asya gulphidaṃ hṛdi mano yad asya gulphidam
ity etābhyām
- 7
ततः संप्रेष्यतीन्द्राय मरुत्वते ऽनुब्रूहीति
tataḥ saṃpreṣyatīndrāya marutvate 'nubrūhīti
- 8
यदा मरुत्वते ऽनूक्तं भवत्य् अथ न दीयत आनूबन्ध्यावपाया होमात्
yadā marutvate 'nūktaṃ bhavaty atha na dīyata ānūbandhyāvapāyā homāt
- 9
पूर्वगृहीतम् अध्वर्युर् आदत्त उत्तरं प्रतिप्रस्थाता
pūrvagṛhītam adhvaryur ādatta uttaraṃ pratiprasthātā
- 10
अत्याक्रम्याश्राव्याहेन्द्राय मरुत्वते प्रेष्येति
atyākramyāśrāvyāhendrāya marutvate preṣyeti
- 11
वषट्कृते जुहुतः
vaṣaṭkṛte juhutaḥ
- 12
सानुवषट्काराव् एके मरुत्वतीयौ समामनन्ति
अननुवषट्काराव् एके
उत्तरं सानुवषट्कारम् एके
sānuvaṣaṭkārāv eke marutvatīyau samāmananti
ananuvaṣaṭkārāv eke
uttaraṃ sānuvaṣaṭkāram eke
- 13
व्यवनयेते यथर्तुग्रहेषु
vyavanayete yathartugraheṣu
- 14
प्रतिप्रस्थानेन भक्षयन्ति
pratiprasthānena bhakṣayanti
- 15
अत्रैव पात्रं निधायाध्वर्युः स्वेन पात्रेण संस्रावेणोत्तमं मरुत्वतीयं गृह्णाति मरुत्वाꣳ इन्द्र वृषभो रणायेति
atraiva pātraṃ nidhāyādhvaryuḥ svena pātreṇa saṃsrāveṇottamaṃ marutvatīyaṃ gṛhṇāti marutvām̐ indra vṛṣabho raṇāyeti
- 16
शस्त्रम् अत्र भवति
śastram atra bhavati
- 17
ऋतुपात्रम् आरभ्य प्रतिगृणाति
ṛtupātram ārabhya pratigṛṇāti
- 18
शस्त्रं प्रतिगीर्यादत्ते ग्रहम् अध्वर्युः
आददते नाराशंसान्
śastraṃ pratigīryādatte graham adhvaryuḥ
ādadate nārāśaṃsān
- 19
अत्याक्रम्याश्राव्याहोक्थशा यज सोमस्येति
atyākramyāśrāvyāhokthaśā yaja somasyeti
- 20
वषट्कृते जुहोति
vaṣaṭkṛte juhoti
- 21
व्याख्यातम् अनुप्रकम्पनम्
vyākhyātam anuprakampanam
- 22
व्याख्यातो ग्रहस्य भक्षमन्त्रः
vyākhyāto grahasya bhakṣamantraḥ
- 23
व्याख्यातो नाराशंसानाम्
vyākhyāto nārāśaṃsānām
- 24
असर्वान्भक्षयित्वाप्याययन्ति
asarvānbhakṣayitvāpyāyayanti
- 25
व्याख्यातम् आप्यायनं सादनम्
vyākhyātam āpyāyanaṃ sādanam

