48 shlokas
- 1
तत उदग्र इव द्विरदे मुनौ रणम् उपेयुषि भीमभुजायुधे
धनुर् अपास्य सबाणधि शंकरः प्रतिजघान घनैर् इव मुष्टिभिः
tata udagra iva dvirade munau raṇam upeyuṣi bhīmabhujāyudhe
dhanur apāsya sabāṇadhi śaṃkaraḥ pratijaghāna ghanair iva muṣṭibhiḥ
- 2
हरपृथासुतयोर्ध्वनिर् उत्पतन्न् अमृदुसंवलिताङ्गुलिपाणिजः
स्फुटदनल्पशिलारवदारुणः प्रतिननाद दरीषु दरीभृतः
harapṛthāsutayordhvanir utpatann amṛdusaṃvalitāṅgulipāṇijaḥ
sphuṭadanalpaśilāravadāruṇaḥ pratinanāda darīṣu darībhṛtaḥ
- 3
शिवभुजाहतिभिन्नपृथुक्षतीः सुखम् इवानुबभूव कपिध्वजः
क इव नाम बृहन्मनसां भवेद् अनुकृतेर् अपि सत्त्ववतां क्षमः
śivabhujāhatibhinnapṛthukṣatīḥ sukham ivānubabhūva kapidhvajaḥ
ka iva nāma bṛhanmanasāṃ bhaved anukṛter api sattvavatāṃ kṣamaḥ
- 4
व्रणमुखच्युतशोणितशीकरस्थगितशैलतटाभभुजान्तरः
अभिनवौषसरागभृता बभौ जलधरेण समानम् उमापतिः
vraṇamukhacyutaśoṇitaśīkarasthagitaśailataṭābhabhujāntaraḥ
abhinavauṣasarāgabhṛtā babhau jaladhareṇa samānam umāpatiḥ
- 5
उरसि शूलभृतः प्रहिता मुहुः प्रतिहतिं ययुर् अर्जुनमुष्टयः
भृशरया इव सह्यमहीभृतः पृथुनि रोधसि सिन्धुमहोर्मयः
urasi śūlabhṛtaḥ prahitā muhuḥ pratihatiṃ yayur arjunamuṣṭayaḥ
bhṛśarayā iva sahyamahībhṛtaḥ pṛthuni rodhasi sindhumahormayaḥ
- 6
निपतिते ऽधिशिरोधरम् आयते समम् अरत्नियुगे ऽयुगचक्षुषः
त्रिचतुरेषु पदेषु किरीटिना लुलितदृष्टि मदाद् इव चस्खले
nipatite 'dhiśirodharam āyate samam aratniyuge 'yugacakṣuṣaḥ
tricatureṣu padeṣu kirīṭinā lulitadṛṣṭi madād iva caskhale
- 7
अभिभवोदितमन्युविदीपितः समभिसृत्य भृशं जवम् ओजसा
भुजयुगेन विभज्य समाददे शशिकलाभरणस्य भुजद्वयम्
abhibhavoditamanyuvidīpitaḥ samabhisṛtya bhṛśaṃ javam ojasā
bhujayugena vibhajya samādade śaśikalābharaṇasya bhujadvayam
- 8
प्रववृते ऽथ महाहवमल्लयोर् अचलसंचलनाहरणो रणः
करणशृङ्खलसंकलनागुरुर्गुरुभुजायुधगर्वितयोस्तयोः
pravavṛte 'tha mahāhavamallayor acalasaṃcalanāharaṇo raṇaḥ
karaṇaśṛṅkhalasaṃkalanāgururgurubhujāyudhagarvitayostayoḥ
- 9
अयम् असौ भगवान् उत पाण्डवः स्थितम् अवाङ्मुनिना शशिमौलिना
समधिरूढम् अजेन नु जिष्णुना स्विद् इति वेगवशान्मुमुहे गणैः
ayam asau bhagavān uta pāṇḍavaḥ sthitam avāṅmuninā śaśimaulinā
samadhirūḍham ajena nu jiṣṇunā svid iti vegavaśānmumuhe gaṇaiḥ
- 10
प्रचलिते चलितं स्थितम् आस्थिते विनमिते नतम् उन्नतम् उन्नतौ
वृषकपिध्वजयोर् असहिष्णुना मुहुर् अभावभयाद् इव भूभृता
pracalite calitaṃ sthitam āsthite vinamite natam unnatam unnatau
vṛṣakapidhvajayor asahiṣṇunā muhur abhāvabhayād iva bhūbhṛtā
- 11
करणशृङ्खलनिःसृतयोस्तयोः कृतभुजध्वनि वल्गु विवल्गतोः
चरणपातनिपातितरोधरसः प्रससृपुः सरितः परितः स्थलीः
karaṇaśṛṅkhalaniḥsṛtayostayoḥ kṛtabhujadhvani valgu vivalgatoḥ
caraṇapātanipātitarodharasaḥ prasasṛpuḥ saritaḥ paritaḥ sthalīḥ
- 12
वियति वेगपरिप्लुतम् अन्तरा समभिसृत्य रयेण कपिध्वजः
चरणयोश्चरणानमितक्षितिर्निजगृहे तिसृणां जयिनं पुराम्
viyati vegapariplutam antarā samabhisṛtya rayeṇa kapidhvajaḥ
caraṇayoścaraṇānamitakṣitirnijagṛhe tisṛṇāṃ jayinaṃ purām
- 13
विस्मितः सपदि तेन कर्मणा कर्मणां क्षयकरः परः पुमान्
क्षेप्तुकामम् अवनौ तम् अक्लमं निष्पिपेष परिरभ्य वक्षसा
vismitaḥ sapadi tena karmaṇā karmaṇāṃ kṣayakaraḥ paraḥ pumān
kṣeptukāmam avanau tam aklamaṃ niṣpipeṣa parirabhya vakṣasā
- 14
तपसा तथा न मुदम् अस्य ययौ भगवान्यथा विपुलसत्त्वतया
गुणसंहतेः समतिरिक्तम् अहो निजम् एव सत्त्वम् उपकारि सताम्
tapasā tathā na mudam asya yayau bhagavānyathā vipulasattvatayā
guṇasaṃhateḥ samatiriktam aho nijam eva sattvam upakāri satām
- 15
अथ हिमशुचिभस्मभूषितं शिरसि विराजितम् इन्दुलेखया
स्ववपुर् अतिमनोहरं हरं दधतम् उदीक्ष्य ननाम पाण्डवः
atha himaśucibhasmabhūṣitaṃ śirasi virājitam indulekhayā
svavapur atimanoharaṃ haraṃ dadhatam udīkṣya nanāma pāṇḍavaḥ
- 16
सहशरधि निजं तथा कार्मुकं वपुर् अतनु तथैव संवर्मितम्
निहितम् अपि तथैव पश्यन्न् असिं वृषभगतिर् उपाययौ विस्मयम्
sahaśaradhi nijaṃ tathā kārmukaṃ vapur atanu tathaiva saṃvarmitam
nihitam api tathaiva paśyann asiṃ vṛṣabhagatir upāyayau vismayam
- 17
सिषिचुर् अवनिम् अम्बुवाहाः शनैः सुरकुसुमम् इयाय चित्रं दिवः
विमलरुचि भृशं नभो दुन्दुभेर्ध्वनिर् अखिलम् अनाहतस्यानशे
siṣicur avanim ambuvāhāḥ śanaiḥ surakusumam iyāya citraṃ divaḥ
vimalaruci bhṛśaṃ nabho dundubherdhvanir akhilam anāhatasyānaśe
- 18
आसेदुषां गोत्रभिदो ऽनुवृत्त्या गोपायकानां भुवनत्रयस्य
रोचिष्णुरत्नावलिभिर्विमानैर्द्यौर् आचिता तारकितेव रेजे
āseduṣāṃ gotrabhido 'nuvṛttyā gopāyakānāṃ bhuvanatrayasya
rociṣṇuratnāvalibhirvimānairdyaur ācitā tārakiteva reje
- 19
हंसा बृहन्तः सुरसद्मवाहाः संह्रादिकण्ठाभरणाः पतन्तः
चक्रुः प्रयत्नेन विकीर्यमाणैर्व्योम्नः परिष्वङ्गम् इवाग्रपक्षैः
haṃsā bṛhantaḥ surasadmavāhāḥ saṃhrādikaṇṭhābharaṇāḥ patantaḥ
cakruḥ prayatnena vikīryamāṇairvyomnaḥ pariṣvaṅgam ivāgrapakṣaiḥ
- 20
मुदितमधुलिहो वितानीकृताः स्रज उपरि वितत्य सातानिकीः
जलद इव निषेदिवांसं वृषे मरुदुपसुखयांबभूवेश्वरम्
muditamadhuliho vitānīkṛtāḥ sraja upari vitatya sātānikīḥ
jalada iva niṣedivāṃsaṃ vṛṣe marudupasukhayāṃbabhūveśvaram
- 21
कृतधृति परिवन्दितेनोच्चकैर्गणपतिभिर् अभिन्नरोमोद्गमैः
तपसि कृतफले फलज्यायसी स्तुतिर् इति जगदे हरेः सूनुना
kṛtadhṛti parivanditenoccakairgaṇapatibhir abhinnaromodgamaiḥ
tapasi kṛtaphale phalajyāyasī stutir iti jagade hareḥ sūnunā
- 22
शरणं भवन्तम् अतिकारुणिकं भव भक्तिगम्यम् अधिगम्य जनाः
जितमृत्यवो ऽजित भवन्ति भये ससुरासुरस्य जगतः शरणम्
śaraṇaṃ bhavantam atikāruṇikaṃ bhava bhaktigamyam adhigamya janāḥ
jitamṛtyavo 'jita bhavanti bhaye sasurāsurasya jagataḥ śaraṇam
- 23
विपद् एति तावद् अवसादकरी न च कामसम्पद् अभिकामयते
न नमन्ति चैकपुरुषं पुरुषास्तव यावद् ईश न नतिः क्रियते
vipad eti tāvad avasādakarī na ca kāmasampad abhikāmayate
na namanti caikapuruṣaṃ puruṣāstava yāvad īśa na natiḥ kriyate
- 24
संसेवन्ते दानशीला विमुक्त्य संपश्यन्तो जन्मदुःखं पुमांसः
यन्निःसङ्गस्त्वं फलस्यानतेभ्यस्तत्कारुण्यं केवलं न स्वकार्यम्
saṃsevante dānaśīlā vimuktya saṃpaśyanto janmaduḥkhaṃ pumāṃsaḥ
yanniḥsaṅgastvaṃ phalasyānatebhyastatkāruṇyaṃ kevalaṃ na svakāryam
- 25
प्राप्यते यद् इह दूरम् अगत्वा यत्फलत्य् अपरलोकगताय
तीर्थम् अस्ति न भवार्णवबाह्यं सार्वकामिकम् ऋते भवतस्तत्
prāpyate yad iha dūram agatvā yatphalaty aparalokagatāya
tīrtham asti na bhavārṇavabāhyaṃ sārvakāmikam ṛte bhavatastat
- 26
व्रजति शुचि पदं त्व् अति प्रीतिमान्प्रतिहतमतिर् एति घोरां गतिम्
इयम् अनघ निमित्तशक्तिः परा तव वरद न चित्तभेदः क्वचित्
vrajati śuci padaṃ tv ati prītimānpratihatamatir eti ghorāṃ gatim
iyam anagha nimittaśaktiḥ parā tava varada na cittabhedaḥ kvacit
- 27
दक्षिणां प्रणतदक्षिण मूर्तिं तत्त्वतः शिवकरीम् अविदित्वा
रागिणापि विहिता तव भक्त्या संस्मृतिर्भव भवत्य् अभवाय
dakṣiṇāṃ praṇatadakṣiṇa mūrtiṃ tattvataḥ śivakarīm aviditvā
rāgiṇāpi vihitā tava bhaktyā saṃsmṛtirbhava bhavaty abhavāya
- 28
दृष्ट्वा दृश्यान्य् आचरणीयानि विधाय प्रेक्षाकारी याति पदं मुक्तम् अपायैः
सम्यग्दृष्टिस्तस्य परं पश्यति यस्त्वां यश्चोपास्ति साधु विधेयं स विधत्ते
dṛṣṭvā dṛśyāny ācaraṇīyāni vidhāya prekṣākārī yāti padaṃ muktam apāyaiḥ
samyagdṛṣṭistasya paraṃ paśyati yastvāṃ yaścopāsti sādhu vidheyaṃ sa vidhatte
- 29
युक्ताः स्वशक्त्या मुनयः प्रजानां हितोपदेशैर् उपकारवन्तः
समुच्छिनत्सि त्वम् अचिन्त्यधामा कर्माण्य् उपेतस्य दुरुत्तराणि
yuktāḥ svaśaktyā munayaḥ prajānāṃ hitopadeśair upakāravantaḥ
samucchinatsi tvam acintyadhāmā karmāṇy upetasya duruttarāṇi
- 30
संनिबद्धम् अपहर्तुम् अहार्यं भूरि दुर्गतिभयं भुवनानाम्
अद्भुताकृतिम् इमाम् अतिमायस्त्वं बिभर्षि करुणामय मायाम्
saṃnibaddham apahartum ahāryaṃ bhūri durgatibhayaṃ bhuvanānām
adbhutākṛtim imām atimāyastvaṃ bibharṣi karuṇāmaya māyām

