53 shlokas
- 1
अथ भूतानि वार्त्रघ्नशरेभ्यस्तत्र तत्रसुः
भेजे दिशः परित्यक्तमहेष्वासा च सा चमूः
atha bhūtāni vārtraghnaśarebhyastatra tatrasuḥ
bheje diśaḥ parityaktamaheṣvāsā ca sā camūḥ
- 2
अपश्यद्भिर् इवेशानं रणान्निववृते गणैः
मुह्यतीव हि कृच्छ्रेषु सम्भ्रमज्वलितं मनः
apaśyadbhir iveśānaṃ raṇānnivavṛte gaṇaiḥ
muhyatīva hi kṛcchreṣu sambhramajvalitaṃ manaḥ
- 3
खण्डिताशंसया तेषां पराङ्मुखतया तया
आविवेश कृपा केतौ कृतोच्चैर्वानरं नरम्
khaṇḍitāśaṃsayā teṣāṃ parāṅmukhatayā tayā
āviveśa kṛpā ketau kṛtoccairvānaraṃ naram
- 4
आस्थाम् आलम्ब्य नीतेषु वशं क्षुद्रेष्व् अरातिषु
व्यक्तिम् आयाति महतां माहात्म्यम् अनुकम्पया
āsthām ālambya nīteṣu vaśaṃ kṣudreṣv arātiṣu
vyaktim āyāti mahatāṃ māhātmyam anukampayā
- 5
स सासिः सासुसूः सासो येयायेयाययाययः
ललौ लीलां ललो ऽलोलः शशीशशिशुशीः शशन्
sa sāsiḥ sāsusūḥ sāso yeyāyeyāyayāyayaḥ
lalau līlāṃ lalo 'lolaḥ śaśīśaśiśuśīḥ śaśan
- 6
त्रासजिह्मं यतश्चैतान्मन्दम् एवान्वियाय सः
नातिपीडयितुं भग्नान् इच्छन्ति हि महौजसः
trāsajihmaṃ yataścaitānmandam evānviyāya saḥ
nātipīḍayituṃ bhagnān icchanti hi mahaujasaḥ
- 7
अथाग्रे हसता साचिस्थितेन स्थिरकीर्तिना
सेनान्या ते जगदिरे किंचिदायस्तचेतसा
athāgre hasatā sācisthitena sthirakīrtinā
senānyā te jagadire kiṃcidāyastacetasā
- 8
मा विहासिष्ट समरं समरन्तव्यसंयतः
क्षतं क्षुण्णासुरगणैर् अगणैर् इव किं यशः
mā vihāsiṣṭa samaraṃ samarantavyasaṃyataḥ
kṣataṃ kṣuṇṇāsuragaṇair agaṇair iva kiṃ yaśaḥ
- 9
विवस्वदंशुसंश्लेषद्विगुणीकृततेजसः
अमी वो मोघम् उद्गूर्णा हसन्तीव महासयः
vivasvadaṃśusaṃśleṣadviguṇīkṛtatejasaḥ
amī vo mogham udgūrṇā hasantīva mahāsayaḥ
- 10
वने ऽवने वनसदां मार्गं मार्गम् उपेयुषाम्
वाणैर्बाणैः समासक्तं शङ्के ऽशं केन शाम्यति
vane 'vane vanasadāṃ mārgaṃ mārgam upeyuṣām
vāṇairbāṇaiḥ samāsaktaṃ śaṅke 'śaṃ kena śāmyati
- 11
पातितोत्तुङ्गमाहात्म्यैः संहृतायतकीर्तिभिः
गुर्वीं काम् आपदं हन्तुं कृतम् आवृत्तिसाहसम्
pātitottuṅgamāhātmyaiḥ saṃhṛtāyatakīrtibhiḥ
gurvīṃ kām āpadaṃ hantuṃ kṛtam āvṛttisāhasam
- 12
नासुरो ऽयं न वा नागो धरसंस्थो न राक्षसः
ना सुखो ऽयं नवाभोगो धरणिस्थो हि राजसः
nāsuro 'yaṃ na vā nāgo dharasaṃstho na rākṣasaḥ
nā sukho 'yaṃ navābhogo dharaṇistho hi rājasaḥ
- 13
मन्दम् अस्यन्न् इषुलतां घृणया मुनिर् एष वः
प्रणुदत्य् आगतावज्ञं जघनेषु पशून् इव
mandam asyann iṣulatāṃ ghṛṇayā munir eṣa vaḥ
praṇudaty āgatāvajñaṃ jaghaneṣu paśūn iva
- 14
न नोननुन्नो ऽनुन्नेनो न ना नानानना ननु
नुन्नो ऽनुन्नो न नुन्नेनो नानेनानुन्ननुन्न नुत्
na nonanunno 'nunneno na nā nānānanā nanu
nunno 'nunno na nunneno nānenānunnanunna nut
- 15
वरं कृतध्वस्तगुणाद् अत्यन्तम् अगुणः पुमान्
प्रकृत्या ह्य् अमणिः श्रेयान्नालंकारश्च्युतोपलः
varaṃ kṛtadhvastaguṇād atyantam aguṇaḥ pumān
prakṛtyā hy amaṇiḥ śreyānnālaṃkāraścyutopalaḥ
- 16
स्यन्दना नो चतुरगाः सुरेभा वाविपत्तयः
स्यन्दना नो च तुरगाः सुरेभावा विपत्तयः
syandanā no caturagāḥ surebhā vāvipattayaḥ
syandanā no ca turagāḥ surebhāvā vipattayaḥ
- 17
भवद्भिर् अधुनारातिपरिहापितपौरुषैः
ह्रदैर् इवार्कनिष्पीतैः प्राप्तः पङ्को दुरुत्सहः
bhavadbhir adhunārātiparihāpitapauruṣaiḥ
hradair ivārkaniṣpītaiḥ prāptaḥ paṅko durutsahaḥ
- 18
वेत्रशाककुजे शैले ऽलेशैजे ऽकुकशात्रवे
यात किं विदिशो जेतुं तुञ्जेशो दिवि किंतया
vetraśākakuje śaile 'leśaije 'kukaśātrave
yāta kiṃ vidiśo jetuṃ tuñjeśo divi kiṃtayā
- 19
अयं वः क्लैब्यम् आपन्नान्दृष्टपृष्ठान् अरातिना
इच्छतीशश्च्युताचारान्दारान् इव निगोपितुम्
ayaṃ vaḥ klaibyam āpannāndṛṣṭapṛṣṭhān arātinā
icchatīśaścyutācārāndārān iva nigopitum
- 20
ननु हो मथना राघो घोरा नाथमहो नु न
तयदातवदा भीमा माभीदा बत दायत
nanu ho mathanā rāgho ghorā nāthamaho nu na
tayadātavadā bhīmā mābhīdā bata dāyata
- 21
किं त्यक्तापास्तदेवत्वमानुष्यकपरिग्रहैः
ज्वलितान्यगुणैर्गुर्वी स्थिता तेजसि मान्यता
kiṃ tyaktāpāstadevatvamānuṣyakaparigrahaiḥ
jvalitānyaguṇairgurvī sthitā tejasi mānyatā
- 22
निशितासिरतो ऽभीको न्येजते ऽमरणा रुचा
सारतो न विरोधी नः स्वाभासो भरवान् उत
niśitāsirato 'bhīko nyejate 'maraṇā rucā
sārato na virodhī naḥ svābhāso bharavān uta
- 23
तनुवारभसो भास्वान् अधीरो ऽविनतोरसा
चारुणा रमते जन्ये को ऽभीतो रसिताशिनि
tanuvārabhaso bhāsvān adhīro 'vinatorasā
cāruṇā ramate janye ko 'bhīto rasitāśini
- 24
निर्भिन्नपातिताश्वीयनिरुद्धरथवर्त्मनि
हतद्विपनगष्ठ्यूतरुधिराम्बुनदाकुले
nirbhinnapātitāśvīyaniruddharathavartmani
hatadvipanagaṣṭhyūtarudhirāmbunadākule
- 25
देवाकानिनि कावादे वाहिकास्वस्वकाहि वा
काकारेभभरे काका निस्वभव्यव्यभस्वनि
devākānini kāvāde vāhikāsvasvakāhi vā
kākārebhabhare kākā nisvabhavyavyabhasvani
- 26
प्रनृत्तशववित्रस्ततुरगाक्षिप्तसारथौ
मारुतापूर्णतूणीरविक्रुष्टहतसादिनि
pranṛttaśavavitrastaturagākṣiptasārathau
mārutāpūrṇatūṇīravikruṣṭahatasādini
- 27
ससत्त्वरतिदे नित्यं सदरामर्षनाशिनि
त्वराधिककसन्नादे रमकत्वम् अकर्षति
sasattvaratide nityaṃ sadarāmarṣanāśini
tvarādhikakasannāde ramakatvam akarṣati
- 28
आसुरे लोकवित्रासविधायिनि महाहवे
युष्माभिर् उन्नतिं नीतं निरस्तम् इह पौरुषम्
āsure lokavitrāsavidhāyini mahāhave
yuṣmābhir unnatiṃ nītaṃ nirastam iha pauruṣam
- 29
इति शासति सेनान्यां गच्छतस्तान् अनेकधा
निषिध्य हसता किंचित्तत्र तस्थे ऽन्धकारिणा
iti śāsati senānyāṃ gacchatastān anekadhā
niṣidhya hasatā kiṃcittatra tasthe 'ndhakāriṇā
- 30
मुनीषुदहनातप्तांल्लज्जया निविवृत्सतः
शिवः प्रह्लादयामास तान्निषेधहिमाम्बुना
munīṣudahanātaptāṃllajjayā nivivṛtsataḥ
śivaḥ prahlādayāmāsa tānniṣedhahimāmbunā

