14 shlokas
- 1
सवित्रे प्रातर् अष्टाकपालं निर्वपति
savitre prātar aṣṭākapālaṃ nirvapati
- 2
तस्य पुरस्तात्स्विष्टकृत आयनाय स्वाहा प्रायणाय स्वाहेत्य् उद्द्रावाञ्जुहोति
tasya purastātsviṣṭakṛta āyanāya svāhā prāyaṇāya svāhety uddrāvāñjuhoti
- 3
ईंकाराय स्वाहेंकृताय स्वाहेत्य् अश्वचरितानि
īṃkārāya svāheṃkṛtāya svāhety aśvacaritāni
- 4
अञ्ज्येताय स्वाहा कृष्णाय स्वाहा श्वेताय स्वाहेत्य् अष्टाचत्वारिंशतम् अश्वरूपाणि
एकम् अतिरिक्तम्
añjyetāya svāhā kṛṣṇāya svāhā śvetāya svāhety aṣṭācatvāriṃśatam aśvarūpāṇi
ekam atiriktam
- 5
अत्र ब्राह्मणो वीणागाथी गायतीत्य् अददा इत्य् अयजथा इत्य् अपच इति तिस्रः
atra brāhmaṇo vīṇāgāthī gāyatīty adadā ity ayajathā ity apaca iti tisraḥ
- 6
सवित्रे प्रसवित्र एकादशकपालं मध्यंदिने
सवित्र आसवित्रे द्वादशकपालम् अपराह्णे
savitre prasavitra ekādaśakapālaṃ madhyaṃdine
savitra āsavitre dvādaśakapālam aparāhṇe
- 7
दक्षिणेनाहवनीयं होता हिरण्यकशिपाव् उपविशति पारिप्लवं भौवन्यवं चाचिख्यासन्
dakṣiṇenāhavanīyaṃ hotā hiraṇyakaśipāv upaviśati pāriplavaṃ bhauvanyavaṃ cācikhyāsan
- 8
तं दक्षिणेन हिरण्यकशिप्वोर्ब्रह्मा यजमानश्च
taṃ dakṣiṇena hiraṇyakaśipvorbrahmā yajamānaśca
- 9
पुरस्ताद् अध्वर्युर्हैरण्ये कूर्चे
purastād adhvaryurhairaṇye kūrce
- 10
दक्षिणतो वीणागणकिन उपोपविशन्ति
dakṣiṇato vīṇāgaṇakina upopaviśanti
- 11
उपविष्टेष्व् अध्वर्यो३ इत्य् अध्वर्युं होतामन्त्रयते
upaviṣṭeṣv adhvaryo3 ity adhvaryuṃ hotāmantrayate
- 12
हो३यि होतर् इत्य् अध्वर्युः प्रतिगृणाति
ॐ होतर् इति वा
ho3yi hotar ity adhvaryuḥ pratigṛṇāti
oṃ hotar iti vā
- 13
संस्थितयोर् अध्वर्युः संप्रेष्यति वीणागणकिनः पूर्वैः सह सुकृद्भी राजभिर् इमं यजमानं संगायतेति
saṃsthitayor adhvaryuḥ saṃpreṣyati vīṇāgaṇakinaḥ pūrvaiḥ saha sukṛdbhī rājabhir imaṃ yajamānaṃ saṃgāyateti
- 14
सायं धृतिषु हूयमानासु राजन्यो वीणागाथी गायतीत्य् अजिना इत्य् अयुध्यथा इत्य् अमुं संग्रामम् अहन्न् इति तिस्रः
sāyaṃ dhṛtiṣu hūyamānāsu rājanyo vīṇāgāthī gāyatīty ajinā ity ayudhyathā ity amuṃ saṃgrāmam ahann iti tisraḥ

