12 shlokas
- 1
नमो ऽग्नये पृथिविक्षित इत्य् एतैश्च यथालिङ्गम्
namo 'gnaye pṛthivikṣita ity etaiśca yathāliṅgam
- 2
ये ते पन्थानः सवितर् इति पूर्वया द्वारा प्राग्वंशं प्रविश्याहवनीये वैतसम् इध्मम् अभ्याधायैकादश पूर्णाहुतीर्जुहोति
हिरण्यगर्भः समवर्तताग्र इत्य् अष्टौ
देवा देवेषु पराक्रमध्वम् इति तिस्रः
ye te panthānaḥ savitar iti pūrvayā dvārā prāgvaṃśaṃ praviśyāhavanīye vaitasam idhmam abhyādhāyaikādaśa pūrṇāhutīrjuhoti
hiraṇyagarbhaḥ samavartatāgra ity aṣṭau
devā deveṣu parākramadhvam iti tisraḥ
- 3
चतुष्टय्य आपो दिग्भ्यः समाभृताः
catuṣṭayya āpo digbhyaḥ samābhṛtāḥ
- 4
तासु ब्रह्मौदनं पचति
tāsu brahmaudanaṃ pacati
- 5
पात्र्यां राजतं रुक्मं निधाय तस्मिन्ब्रह्मौदनम् उद्धृत्य प्रभूतेन सर्पिषोपसिच्य सौवर्णं रुक्मम् उपरिष्टात्कृत्वा कर्षन्न् अनुच्छिन्दंश्चतुर्भ्य आर्षेयेभ्यो महर्त्विग्भ्य उपोहति
pātryāṃ rājataṃ rukmaṃ nidhāya tasminbrahmaudanam uddhṛtya prabhūtena sarpiṣopasicya sauvarṇaṃ rukmam upariṣṭātkṛtvā karṣann anucchindaṃścaturbhya ārṣeyebhyo mahartvigbhya upohati
- 6
प्राशितवद्भ्यश्चतुरः साहस्रान्सौवर्णान्निष्कान्ददाति चतुरश्चाश्वतरीरथान् एतौ च रुक्मौ
prāśitavadbhyaścaturaḥ sāhasrānsauvarṇānniṣkāndadāti caturaścāśvatarīrathān etau ca rukmau
- 7
द्वादशारत्निस्त्रयोदशारत्निर्वा दर्भमयी मौञ्जी वा रशना
dvādaśāratnistrayodaśāratnirvā darbhamayī mauñjī vā raśanā
- 8
तां ब्रह्मौदनोच्छेषेणानक्ति
tāṃ brahmaudanoccheṣeṇānakti
- 9
अश्वस्य रूपाणि समामनन्ति
कृष्णः श्वेतः पिशङ्गः सारङ्गो ऽरुणपिशङ्गो वा
aśvasya rūpāṇi samāmananti
kṛṣṇaḥ śvetaḥ piśaṅgaḥ sāraṅgo 'ruṇapiśaṅgo vā
- 10
यस्य वा श्वेतस्याल्पं कृष्णं स्यात्तम् आलभेत
मातृमन्तं पितृमन्तं पृष्ठे वहे च दान्तं सोमपं सोमपयोः पुत्रम्
yasya vā śvetasyālpaṃ kṛṣṇaṃ syāttam ālabheta
mātṛmantaṃ pitṛmantaṃ pṛṣṭhe vahe ca dāntaṃ somapaṃ somapayoḥ putram
- 11
विज्ञायत एष वै सोमपो यं शिशुं जातं पुरा तृणाद्यात्सोमं पाययन्ति
एतौ वै सोमपौ यौ शिशू जातौ पुरा तृणाद्यात्सोमं पाययन्तीति
vijñāyata eṣa vai somapo yaṃ śiśuṃ jātaṃ purā tṛṇādyātsomaṃ pāyayanti
etau vai somapau yau śiśū jātau purā tṛṇādyātsomaṃ pāyayantīti
- 12
अध्वर्युं राज्याय परिददाति
adhvaryuṃ rājyāya paridadāti

