14 shlokas
- 1
लोमभ्यो ऽधि स्तम्बयजुर्हृत्वोत्तरं परिग्राहं परिगृह्य संप्रेष्यति प्रोक्षणीर् आसादयेध्मम् उपसादय स्रुवं च स्रुचश्च संमृड्ढ्य् आज्येनोदेहीति
lomabhyo 'dhi stambayajurhṛtvottaraṃ parigrāhaṃ parigṛhya saṃpreṣyati prokṣaṇīr āsādayedhmam upasādaya sruvaṃ ca srucaśca saṃmṛḍḍhy ājyenodehīti
- 2
आज्यग्रहणकाले ध्रुवायाम् एव गृह्णाति
प्रोक्षणीर् अभिमन्त्र्य ब्रह्माणम् आमन्त्र्येध्मं वेदिं च प्रोक्ष्य प्रोक्षणीशेषं निनीय पवित्रे अपिसृज्यैकाम् आघारसमिधम् आधायान्तर्वेदि विधृती निधाय ध्रुवां स्रुवं च सादयति एताव् असदताम् इति मन्त्रं संनमति
ājyagrahaṇakāle dhruvāyām eva gṛhṇāti
prokṣaṇīr abhimantrya brahmāṇam āmantryedhmaṃ vediṃ ca prokṣya prokṣaṇīśeṣaṃ ninīya pavitre apisṛjyaikām āghārasamidham ādhāyāntarvedi vidhṛtī nidhāya dhruvāṃ sruvaṃ ca sādayati etāv asadatām iti mantraṃ saṃnamati
- 3
वेदं निधाय सामिधेनीभ्यः प्रतिपद्यते
vedaṃ nidhāya sāmidhenībhyaḥ pratipadyate
- 4
नव सामिधेनीर् अन्वाह
nava sāmidhenīr anvāha
- 5
तिस्र ऋचस्त्रिर् अनूक्ता भवन्ति
नव वा पराचीः
tisra ṛcastrir anūktā bhavanti
nava vā parācīḥ
- 6
नान्याम् आहुतिं पुरस्ताज्जुहुयात्
स्रौवम् एवाघारयेत्
nānyām āhutiṃ purastājjuhuyāt
srauvam evāghārayet
- 7
समानम् आ प्रवरात्
samānam ā pravarāt
- 8
नार्षेयं वृणीते न होतारम्
आश्राव्याह सीद होतर् इति
एतावान्प्रवरः
nārṣeyaṃ vṛṇīte na hotāram
āśrāvyāha sīda hotar iti
etāvānpravaraḥ
- 9
ध्रौवाद् अष्टौ जुह्वां गृह्णाति
चतुर् उपभृति
dhrauvād aṣṭau juhvāṃ gṛhṇāti
catur upabhṛti
- 10
घृतवति शब्दे जुहूपभृताव् आदाय दक्षिणा सकृद् अतिक्रान्त उपांशुयाजवत्प्रचरति
ghṛtavati śabde juhūpabhṛtāv ādāya dakṣiṇā sakṛd atikrānta upāṃśuyājavatpracarati
- 11
अर्धेन जौहवस्याग्निं यजति
अर्धेन सोमम्
ardhena jauhavasyāgniṃ yajati
ardhena somam
- 12
औपभृतं जुह्वाम् आनीय विष्णुम् इष्ट्वा प्रत्याक्रम्य या ते अग्ने ऽयाशया तनूर् इति स्रुवेणोपसदं जुहोति
aupabhṛtaṃ juhvām ānīya viṣṇum iṣṭvā pratyākramya yā te agne 'yāśayā tanūr iti sruveṇopasadaṃ juhoti
- 13
अग्नीन्मदन्त्य् आपा३ इत्य् एतदाद्य् आ निह्नवात्कृत्वाग्नीद्देवपत्नीर्व्याचक्ष्व सुब्रह्मण्य सुब्रह्मण्याम् आह्वयेति
agnīnmadanty āpā3 ity etadādy ā nihnavātkṛtvāgnīddevapatnīrvyācakṣva subrahmaṇya subrahmaṇyām āhvayeti
- 14
अपरेण गार्हपत्यम् आग्नीध्र उपविश्य देवपत्नीर्व्याचष्टे सेनेन्द्रस्य धेनेति
उत्करे सुब्रह्मण्याम् आह्वयति
पूर्ववद् एनां यजमानो ऽनुमन्त्रयते
apareṇa gārhapatyam āgnīdhra upaviśya devapatnīrvyācaṣṭe senendrasya dheneti
utkare subrahmaṇyām āhvayati
pūrvavad enāṃ yajamāno 'numantrayate

