15 shlokas
- 1
आतिथ्याया ध्रौवात्स्रुचि चमसे वा तानूनप्त्रं समवद्यति
चतुरवत्तं पञ्चावत्तं वा
आपतये त्वा गृह्णामीत्य् एतैः प्रतिमन्त्रम्
ātithyāyā dhrauvātsruci camase vā tānūnaptraṃ samavadyati
caturavattaṃ pañcāvattaṃ vā
āpataye tvā gṛhṇāmīty etaiḥ pratimantram
- 2
अनाधृष्टम् असीति यजमानसप्तदशा ऋत्विजस्तानूनप्त्रं समवमृशन्ति
anādhṛṣṭam asīti yajamānasaptadaśā ṛtvijastānūnaptraṃ samavamṛśanti
- 3
अनु मे दीक्षाम् इति यजमानः
anu me dīkṣām iti yajamānaḥ
- 4
यं कामयेत यज्ञयशसम् ऋच्छेद् इति तं प्रथमम्
यदि कामयेत सर्वान् इति सर्वान्सहावमर्शयेत्
yaṃ kāmayeta yajñayaśasam ṛcched iti taṃ prathamam
yadi kāmayeta sarvān iti sarvānsahāvamarśayet
- 5
तस्माद्यः सतानूनप्त्रिणाम् इत्य् उक्तम्
tasmādyaḥ satānūnaptriṇām ity uktam
- 6
प्रजापतौ त्वा मनसि जुहोमीति यजमानस्तानूनप्त्रं त्रिर् अवजिघ्रति
prajāpatau tvā manasi juhomīti yajamānastānūnaptraṃ trir avajighrati
- 7
अन्वहं वा व्रतेष्व् अपिनयति
anvahaṃ vā vrateṣv apinayati
- 8
अग्नीन्मदन्त्य् आपा इति पृच्छति
agnīnmadanty āpā iti pṛcchati
- 9
मदन्ति देवीर् अमृता ऋतावृध इत्य् आग्नीध्रः प्रत्याह
madanti devīr amṛtā ṛtāvṛdha ity āgnīdhraḥ pratyāha
- 10
ताभिर् एहीति संप्रेष्यति
tābhir ehīti saṃpreṣyati
- 11
मदन्तीर् उपस्पृश्य तानूनप्त्रिणो विस्रस्य राजानं सहिरण्यैः पाणिभिर् आप्याययन्त्य् अंशुरंशुस्ते देव सोमाप्यायताम् इति
madantīr upaspṛśya tānūnaptriṇo visrasya rājānaṃ sahiraṇyaiḥ pāṇibhir āpyāyayanty aṃśuraṃśuste deva somāpyāyatām iti
- 12
अथ निह्नुवते
दक्षिणे वेद्यन्ते प्रस्तरं निधाय दक्षिणान्पाणीन् उत्तानान्कृत्वा सव्यान्नीच एष्टा रायः प्रेषे भगायेति
atha nihnuvate
dakṣiṇe vedyante prastaraṃ nidhāya dakṣiṇānpāṇīn uttānānkṛtvā savyānnīca eṣṭā rāyaḥ preṣe bhagāyeti
- 13
अथ यजमानो ऽवान्तरदीक्षाम् उपैति
atha yajamāno 'vāntaradīkṣām upaiti
- 14
अग्ने व्रतपते त्वं व्रतानां व्रतपतिर् असीत्य् आहवनीयम् उपतिष्ठते
agne vratapate tvaṃ vratānāṃ vratapatir asīty āhavanīyam upatiṣṭhate
- 15
एतेनैवास्मिन्समिधम् आदधातीति वाजसनेयकम्
etenaivāsminsamidham ādadhātīti vājasaneyakam

