14 shlokas
- 1
निशायां वसतीवरीः परिहरत्य् अन्तर्वेद्य् आसीने यजमाने पत्न्यां च
niśāyāṃ vasatīvarīḥ pariharaty antarvedy āsīne yajamāne patnyāṃ ca
- 2
नादीक्षितम् अभिपरिहरेत्
nādīkṣitam abhipariharet
- 3
सव्ये ऽंसे ऽत्याधायापरेण प्राजहितं परिक्रम्य पूर्वया द्वारोपनिर्हृत्य दक्षिणेन वेदिं गत्वा दक्षिणेन मार्जालीयं धिष्णियं परीत्य दक्षिणस्याम् उत्तरवेदिश्रोण्यां सादयतीन्द्राग्नियोर्भागधेयी स्थेति
savye 'ṃse 'tyādhāyāpareṇa prājahitaṃ parikramya pūrvayā dvāropanirhṛtya dakṣiṇena vediṃ gatvā dakṣiṇena mārjālīyaṃ dhiṣṇiyaṃ parītya dakṣiṇasyām uttaravediśroṇyāṃ sādayatīndrāgniyorbhāgadheyī stheti
- 4
दक्षिणे ऽंसे ऽत्याधाय यथेतं गत्वा पूर्वया द्वारोपनिर्हृत्योत्तरेण वेदिं गत्वोत्तरेणाग्नीध्रीयं धिष्णियं परीत्योत्तरस्याम् उत्तरवेदिश्रोण्यां सादयति मित्रावरुणयोर्भागधेयी स्थेति
dakṣiṇe 'ṃse 'tyādhāya yathetaṃ gatvā pūrvayā dvāropanirhṛtyottareṇa vediṃ gatvottareṇāgnīdhrīyaṃ dhiṣṇiyaṃ parītyottarasyām uttaravediśroṇyāṃ sādayati mitrāvaruṇayorbhāgadheyī stheti
- 5
सव्ये ऽंसे ऽत्याधाय यथेतं गत्वापरेणाग्नीध्रीयं धिष्णियम् उपसादयति विश्वेषां देवानां भागधेयी स्थेति
savye 'ṃse 'tyādhāya yathetaṃ gatvāpareṇāgnīdhrīyaṃ dhiṣṇiyam upasādayati viśveṣāṃ devānāṃ bhāgadheyī stheti
- 6
यज्ञे जागृतेति सन्ना अभिमन्त्रयते
yajñe jāgṛteti sannā abhimantrayate
- 7
अत्र प्रतिप्रस्थाता पयस्यार्थं सायंदोहं दोहयति
atra pratiprasthātā payasyārthaṃ sāyaṃdohaṃ dohayati
- 8
अध्वर्युः संप्रेष्यति या यजमानस्य व्रतधुक्तस्या आशिरं कुरुत या पत्नियै तस्यै दधिग्रहाय या घर्मधुक्तस्यै दधिघर्माय तप्तम् अनातक्तं मैत्रावरुणाय शृतातङ्क्यं दधि कुरुतादित्यग्रहाय सुब्रह्मण्य सुब्रह्मण्याम् आह्वय न सदस्य् उपवस्तवा इति
adhvaryuḥ saṃpreṣyati yā yajamānasya vratadhuktasyā āśiraṃ kuruta yā patniyai tasyai dadhigrahāya yā gharmadhuktasyai dadhigharmāya taptam anātaktaṃ maitrāvaruṇāya śṛtātaṅkyaṃ dadhi kurutādityagrahāya subrahmaṇya subrahmaṇyām āhvaya na sadasy upavastavā iti
- 9
संप्रैषवत्कुर्वन्ति
saṃpraiṣavatkurvanti
- 10
अत्र सवनीयस्य सवनीयानाम् इतीध्माबर्हिः संनह्यति
atra savanīyasya savanīyānām itīdhmābarhiḥ saṃnahyati
- 11
न वा बर्हिः
प्रस्तरम् एव
na vā barhiḥ
prastaram eva
- 12
आग्नीध्रे हविर्धाने वा यजमानं जागरयन्ति
प्राग्वंशे पत्नीम्
āgnīdhre havirdhāne vā yajamānaṃ jāgarayanti
prāgvaṃśe patnīm
- 13
आग्नीध्र एतां रात्रिम् ऋत्विजो वसन्ति
āgnīdhra etāṃ rātrim ṛtvijo vasanti
- 14
यजमानो राजानं गोपयति गोपयति
yajamāno rājānaṃ gopayati gopayati

