31 shlokas
- 1
श्रीशिव उवाच
भस्मप्रकारं देवेशि शृणु मत्प्राणवल्लभे
कर्तारं वरयेद् आदौ यथोक्तविभवावधि
śrīśiva uvāca
bhasmaprakāraṃ deveśi śṛṇu matprāṇavallabhe
kartāraṃ varayed ādau yathoktavibhavāvadhi
- 2
सुवर्णं मौक्तिकयुतं कर्णयुग्मे निवेदयेत्
हस्तयुग्मे च वलयम् अङ्गुरीयं तथैव च
suvarṇaṃ mauktikayutaṃ karṇayugme nivedayet
hastayugme ca valayam aṅgurīyaṃ tathaiva ca
- 3
तोढद्वयं बाहुयुग्मे शुद्धकाञ्चननिर्मितम्
ग्रीवायां दापयेत्स्वर्णं चतुष्कोणं मनोरमम्
toḍhadvayaṃ bāhuyugme śuddhakāñcananirmitam
grīvāyāṃ dāpayetsvarṇaṃ catuṣkoṇaṃ manoramam
- 4
वस्त्रयुग्मं पट्टसूत्रनिर्मितं च सुशोभनम्
उष्णीषं शुक्लवर्णं च उष्णीषं पीतवाससम्
vastrayugmaṃ paṭṭasūtranirmitaṃ ca suśobhanam
uṣṇīṣaṃ śuklavarṇaṃ ca uṣṇīṣaṃ pītavāsasam
- 5
एवं हि वरयेद्देवि कर्मयोग्यं विचिन्तयेत्
चिन्तयेच्छिवरूपं च चिन्तयेत्त्रिगुणात्मकम्
evaṃ hi varayeddevi karmayogyaṃ vicintayet
cintayecchivarūpaṃ ca cintayettriguṇātmakam
- 6
ततः परस्मिन्दिवसे शान्तिस्वस्त्ययनं चरेत्
निर्मितं शुद्धस्वर्णेन बिल्वपत्त्रेण सुन्दरि
tataḥ parasmindivase śāntisvastyayanaṃ caret
nirmitaṃ śuddhasvarṇena bilvapattreṇa sundari
- 7
सहस्रसङ्ख्यया देवि पार्थिवं द्वादशं यजेत्
षोडशेनोपचारेण पट्टवस्त्रयुगेन च
sahasrasaṅkhyayā devi pārthivaṃ dvādaśaṃ yajet
ṣoḍaśenopacāreṇa paṭṭavastrayugena ca
- 8
अलंकारविचित्रैश्च पूजयेत्परमेश्वरम्
भोगयोग्यं प्रदातव्यं मधुपर्कं निवेदयेत्
alaṃkāravicitraiśca pūjayetparameśvaram
bhogayogyaṃ pradātavyaṃ madhuparkaṃ nivedayet
- 9
स्वर्णासनेन संस्थाप्य प्रत्येकं पूजनं चरेत्
पूजान्ते प्रजपेन्मन्त्रम् अष्टोत्तरशतं सुधीः
svarṇāsanena saṃsthāpya pratyekaṃ pūjanaṃ caret
pūjānte prajapenmantram aṣṭottaraśataṃ sudhīḥ
- 10
षडक्षरं महामन्त्रं प्रासादाख्यं मनुं ततः
दिक्सहस्रं जपेन्मन्त्रं तद्दशांशं हुनेत्प्रिये
ṣaḍakṣaraṃ mahāmantraṃ prāsādākhyaṃ manuṃ tataḥ
diksahasraṃ japenmantraṃ taddaśāṃśaṃ hunetpriye
- 11
होमस्य द्रव्यं देवेशि शृणु मत्प्राणवल्लभे
वालुकानिर्मिते वापि कुण्डे वा परमेश्वरि
homasya dravyaṃ deveśi śṛṇu matprāṇavallabhe
vālukānirmite vāpi kuṇḍe vā parameśvari
- 12
द्वात्रिंशदङ्गुलिमानं विस्तृतं तत्समं प्रिये
षोडशाङ्गुलिमानं हि कुण्डं कुर्यात्सुलक्षणम्
dvātriṃśadaṅgulimānaṃ vistṛtaṃ tatsamaṃ priye
ṣoḍaśāṅgulimānaṃ hi kuṇḍaṃ kuryātsulakṣaṇam
- 13
तदूर्ध्वे परमेशानि वेदनेत्राङ्गुलिं शिवे
एव हि स्वर्णकुम्भं च ताम्रकुम्भासमर्थिना
tadūrdhve parameśāni vedanetrāṅguliṃ śive
eva hi svarṇakumbhaṃ ca tāmrakumbhāsamarthinā
- 14
एतदन्यतरं कुम्भं स्थापयेद्वेदिकोपरि
पट्टवस्त्रेण युग्मेन संवेष्ट्य बहुयत्नतः
etadanyataraṃ kumbhaṃ sthāpayedvedikopari
paṭṭavastreṇa yugmena saṃveṣṭya bahuyatnataḥ
- 15
होमयेद्बिल्वपत्त्रेण यथोक्तेन सुरेश्वरि
त्रिमध्वक्तेन विधिना ततः सिद्धो भवेद्ध्रुवम्
homayedbilvapattreṇa yathoktena sureśvari
trimadhvaktena vidhinā tataḥ siddho bhaveddhruvam
- 16
ततस्तु दक्षिणा कार्या यथोक्तविभवावधि
सर्वद्रव्यमयं मूल्यं द्विगुणं वा प्रदापयेत्
tatastu dakṣiṇā kāryā yathoktavibhavāvadhi
sarvadravyamayaṃ mūlyaṃ dviguṇaṃ vā pradāpayet
- 17
दक्षिणाविहीना यज्ञाः सिद्धिदा न च मोक्षदाः
अत एव महेशानि दक्षिणा विभवावधि
dakṣiṇāvihīnā yajñāḥ siddhidā na ca mokṣadāḥ
ata eva maheśāni dakṣiṇā vibhavāvadhi
- 18
वराहवत्समानीय जन्ममात्रे ऽपि सुन्दरि
पारदं तोलकं मानं भक्षयेद्बहुयत्नतः
varāhavatsamānīya janmamātre 'pi sundari
pāradaṃ tolakaṃ mānaṃ bhakṣayedbahuyatnataḥ
- 19
पुनस्तोलकमानं हि मातृदुग्धं ततः परम्
पुनश्च भक्षयेद्धीमांस्ततो दुग्धं तु भक्षयेत्
punastolakamānaṃ hi mātṛdugdhaṃ tataḥ param
punaśca bhakṣayeddhīmāṃstato dugdhaṃ tu bhakṣayet
- 20
ततश्च वत्सम् आनीय नवद्वारं प्रयत्नतः
सूत्रयोगेण देवेशि बद्धं कुर्यात्प्रयत्नतः
tataśca vatsam ānīya navadvāraṃ prayatnataḥ
sūtrayogeṇa deveśi baddhaṃ kuryātprayatnataḥ
- 21
ततश्च हेलकीमन्त्रम् अष्टोत्तरशतं जपेत्
गजप्रमाणं देवेशि दीर्घप्रस्थं तु खातकम्
tataśca helakīmantram aṣṭottaraśataṃ japet
gajapramāṇaṃ deveśi dīrghaprasthaṃ tu khātakam
- 22
करीषकेण देवेशि पूर्णं कुर्याद्विचक्षणः
तन्मध्ये स्थापयेद्वत्सं संदहेद्बहुयत्नतः
karīṣakeṇa deveśi pūrṇaṃ kuryādvicakṣaṇaḥ
tanmadhye sthāpayedvatsaṃ saṃdahedbahuyatnataḥ
- 23
वह्निस्थिते महेशानि न स्पृशेत्कुण्डम् उत्तमम्
कुण्डे सुशीतले जात उत्थाप्य बहुयत्नतः
vahnisthite maheśāni na spṛśetkuṇḍam uttamam
kuṇḍe suśītale jāta utthāpya bahuyatnataḥ
- 24
सर्वप्रकाशकं मन्त्रम् अष्टोत्तरशतं जपेत्
विश्वेश्वरं प्रवक्ष्यामि शृणु पार्वति सादरम्
sarvaprakāśakaṃ mantram aṣṭottaraśataṃ japet
viśveśvaraṃ pravakṣyāmi śṛṇu pārvati sādaram
- 25
पारदं तोलकं मानं ताम्रपात्रे तु लेपयेत्
चूर्णं कुर्यान्महेशानि गन्धकं सार्धं तोलकम्
pāradaṃ tolakaṃ mānaṃ tāmrapātre tu lepayet
cūrṇaṃ kuryānmaheśāni gandhakaṃ sārdhaṃ tolakam
- 26
समाच्छाद्य प्रयत्नेन चूर्णेन परमेश्वरि
संदहेद्बहुयत्नेन मन्दमन्देन वह्निना
samācchādya prayatnena cūrṇena parameśvari
saṃdahedbahuyatnena mandamandena vahninā
- 27
कृष्णवर्णं रेणुयुतं दृष्ट्वा उत्थाप्य सुन्दरि
रत्तिप्रमाणं तद्द्रव्यं भक्षयेद्यदि सुन्दरि
kṛṣṇavarṇaṃ reṇuyutaṃ dṛṣṭvā utthāpya sundari
rattipramāṇaṃ taddravyaṃ bhakṣayedyadi sundari
- 28
सत्यं सत्यं सर्वकुष्ठं भक्षणान्नाशम् आप्नुयात्
अनुपानम् उष्णतोयं मत्स्यादीन्परिवर्जयेत्
satyaṃ satyaṃ sarvakuṣṭhaṃ bhakṣaṇānnāśam āpnuyāt
anupānam uṣṇatoyaṃ matsyādīnparivarjayet
- 29
एवं प्रयोगं देवेशि न कुर्यात्पुत्रवान्गृही
प्रथमे दिवसे पुत्रान्द्वितीये दिवसे धनम्
evaṃ prayogaṃ deveśi na kuryātputravāngṛhī
prathame divase putrāndvitīye divase dhanam
- 30
तृतीये दिवसे शक्तिं चतुर्थे दिवसे गृहम्
पञ्चमे दिवसे रोगं नाशं तु जायते ध्रुवम्
tṛtīye divase śaktiṃ caturthe divase gṛham
pañcame divase rogaṃ nāśaṃ tu jāyate dhruvam

