16 shlokas
- 1
श्रीचण्डिकोवाच
कारणेन महामोक्षं निर्माल्येन शिवस्य च
श्रुतं वेदे पुराणे च तव वक्त्रे सुरेश्वर
śrīcaṇḍikovāca
kāraṇena mahāmokṣaṃ nirmālyena śivasya ca
śrutaṃ vede purāṇe ca tava vaktre sureśvara
- 2
अग्राह्यं तव निर्माल्यम् अग्राह्यं कारणं विभो
मृषा वाक्यं महादेव कथं वदसि योगभृत्
agrāhyaṃ tava nirmālyam agrāhyaṃ kāraṇaṃ vibho
mṛṣā vākyaṃ mahādeva kathaṃ vadasi yogabhṛt
- 3
कारणेन विना देवि मोक्षज्ञानादिकं न हि
महाशङ्खं विना देवि न मन्त्रः सिद्धिदायकः
kāraṇena vinā devi mokṣajñānādikaṃ na hi
mahāśaṅkhaṃ vinā devi na mantraḥ siddhidāyakaḥ
- 4
साक्षाद्ब्रह्ममयी माला महाशङ्खाख्यया पुनः
शिलायन्त्रे च वृन्दायां गङ्गायां सुरपूजिते
नैव स्पृशेन्महाशङ्खं स्पर्शनात्काष्ठवद्भवेत्
sākṣādbrahmamayī mālā mahāśaṅkhākhyayā punaḥ
śilāyantre ca vṛndāyāṃ gaṅgāyāṃ surapūjite
naiva spṛśenmahāśaṅkhaṃ sparśanātkāṣṭhavadbhavet
- 5
श्रीचण्डिकोवाच
गङ्गा तु कारणं वारि मद्यं परमकारणम्
कारणस्पर्शमात्रेण मालाः शुद्धा भवन्ति हि
śrīcaṇḍikovāca
gaṅgā tu kāraṇaṃ vāri madyaṃ paramakāraṇam
kāraṇasparśamātreṇa mālāḥ śuddhā bhavanti hi
- 6
गङ्गास्पर्शेन देवेश काष्ठवन्मालिका कथम्
वद मे परमेशान इति मे संशयो हृदि
gaṅgāsparśena deveśa kāṣṭhavanmālikā katham
vada me parameśāna iti me saṃśayo hṛdi
- 7
श्रीशंकर उवाच
कारणं देवदेवेशि मोक्षदं सर्वजातिषु
तथा स्वर्गादिजनकं गङ्गातोयं न संशयः
śrīśaṃkara uvāca
kāraṇaṃ devadeveśi mokṣadaṃ sarvajātiṣu
tathā svargādijanakaṃ gaṅgātoyaṃ na saṃśayaḥ
- 8
कारणे निवसेद्देवि महाकाली परा कला
महाविद्या वसेन्नित्यं सुरायां परमेश्वरि
kāraṇe nivaseddevi mahākālī parā kalā
mahāvidyā vasennityaṃ surāyāṃ parameśvari
- 9
महाशङ्खे वसेन्नित्यं पञ्चाशद्वर्णरूपिणी
महाविद्या वसेन्नित्यं महाशङ्खे च सर्वदा
mahāśaṅkhe vasennityaṃ pañcāśadvarṇarūpiṇī
mahāvidyā vasennityaṃ mahāśaṅkhe ca sarvadā
- 10
गङ्गास्पर्शनमात्रेण गङ्गायां लीयते प्रिये
काष्ठस्पर्शनमात्रेण काष्ठे वह्निस्तृणे यथा
gaṅgāsparśanamātreṇa gaṅgāyāṃ līyate priye
kāṣṭhasparśanamātreṇa kāṣṭhe vahnistṛṇe yathā
- 11
गङ्गास्पर्शे तथा देवि गङ्गायां लीयते प्रिये
तत्क्षणे च महाशङ्खः काष्ठवन्नात्र संशयः
gaṅgāsparśe tathā devi gaṅgāyāṃ līyate priye
tatkṣaṇe ca mahāśaṅkhaḥ kāṣṭhavannātra saṃśayaḥ
- 12
शिलायन्त्रे तुलस्यादौ तथैव परमेश्वरि
śilāyantre tulasyādau tathaiva parameśvari
- 13
महाशङ्खाख्यमालायां यो जपेत्साधकोत्तमः
अष्टसिद्धिः करे तस्य स एव शम्भुर् अव्ययः
मौलौ गङ्गा स्थिता यस्य गङ्गास्नानेन तस्य किम्
mahāśaṅkhākhyamālāyāṃ yo japetsādhakottamaḥ
aṣṭasiddhiḥ kare tasya sa eva śambhur avyayaḥ
maulau gaṅgā sthitā yasya gaṅgāsnānena tasya kim
- 14
वाराणसी कामरूपं हरिद्वारं प्रयागकम्
गण्डकी बदरिका देवि गङ्गासागरसंगमम्
vārāṇasī kāmarūpaṃ haridvāraṃ prayāgakam
gaṇḍakī badarikā devi gaṅgāsāgarasaṃgamam
- 15
यस्य भक्तिर्महाशङ्खे तस्य दर्शनमात्रतः
तीर्थस्नानफलं सर्वं लभते नात्र संशयः
yasya bhaktirmahāśaṅkhe tasya darśanamātrataḥ
tīrthasnānaphalaṃ sarvaṃ labhate nātra saṃśayaḥ
- 16
इति ते कथितं कान्ते सर्वं परमदुर्लभम्
न वक्तव्यं पशोर् अग्रे प्राणान्ते परमेश्वरि
iti te kathitaṃ kānte sarvaṃ paramadurlabham
na vaktavyaṃ paśor agre prāṇānte parameśvari

