70 shlokas
- 1
श्रीशंकर उवाच
अथातः सम्प्रवक्ष्यामि पूजाधारं सुदुर्लभम्
शालग्रामे मणौ यन्त्रे प्रतिमायां घटे जले
śrīśaṃkara uvāca
athātaḥ sampravakṣyāmi pūjādhāraṃ sudurlabham
śālagrāme maṇau yantre pratimāyāṃ ghaṭe jale
- 2
पुस्तिकायां च गङ्गायां शिवलिङ्गे प्रसूनके
शालग्रामे शतगुणं मणौ तद्वत्फलं लभेत्
pustikāyāṃ ca gaṅgāyāṃ śivaliṅge prasūnake
śālagrāme śataguṇaṃ maṇau tadvatphalaṃ labhet
- 3
यन्त्रे लक्षगुणं पुण्यं मूर्तौ लक्षं सुलोचने
घटे चैकगुणं पुण्यं जले चैकगुणं प्रिये
yantre lakṣaguṇaṃ puṇyaṃ mūrtau lakṣaṃ sulocane
ghaṭe caikaguṇaṃ puṇyaṃ jale caikaguṇaṃ priye
- 4
पुस्तिकायां सहस्रं तु गङ्गायां तत्समं फलम्
शिवलिङ्गे ह्य् अनन्तं हि विना पार्थिवलिङ्गके
pustikāyāṃ sahasraṃ tu gaṅgāyāṃ tatsamaṃ phalam
śivaliṅge hy anantaṃ hi vinā pārthivaliṅgake
- 5
पुष्पयन्त्रे महेशानि पूजनात्सर्वसिद्धिभाक्
शालग्रामे च पूजायां न लिखेद्यन्त्रम् उत्तमम्
puṣpayantre maheśāni pūjanātsarvasiddhibhāk
śālagrāme ca pūjāyāṃ na likhedyantram uttamam
- 6
मणौ स्थिते महेशानि न लिखेद्यन्त्रम् उत्तमम्
प्रतिमायां च पूजायां न लिखेद्यन्त्रम् उत्तमम्
maṇau sthite maheśāni na likhedyantram uttamam
pratimāyāṃ ca pūjāyāṃ na likhedyantram uttamam
- 7
प्रतिमायाश्च पुरतो घटं संस्थाप्य यत्नतः
परिवारान्यजेत्तत्र घटे तु परमेश्वरि
pratimāyāśca purato ghaṭaṃ saṃsthāpya yatnataḥ
parivārānyajettatra ghaṭe tu parameśvari
- 8
यन्त्राधिष्ठातृदेवांश्च घटे यन्त्रे प्रपूजयेत्
समस्तदेवतारूपं घटं तु परिचिन्तयेत्
सुरद्रुमस्वरूपो ऽयं घटो हि परमेश्वरि
yantrādhiṣṭhātṛdevāṃśca ghaṭe yantre prapūjayet
samastadevatārūpaṃ ghaṭaṃ tu paricintayet
suradrumasvarūpo 'yaṃ ghaṭo hi parameśvari
- 9
जन्मस्थानं महायन्त्रं यदि कुर्यात्तु साधकः
तत्र मूर्तिं न कुर्यात्तु कदाचिद् अपि मोहतः
janmasthānaṃ mahāyantraṃ yadi kuryāttu sādhakaḥ
tatra mūrtiṃ na kuryāttu kadācid api mohataḥ
- 10
यदि मूर्तिं प्रकुर्यात्तु तत्र यन्त्रं न कारयेत्
यदि कुर्यात्तु मोहेन यजेद्वारद्वयं प्रिये
yadi mūrtiṃ prakuryāttu tatra yantraṃ na kārayet
yadi kuryāttu mohena yajedvāradvayaṃ priye
- 11
द्विगुणं पूजनं तत्र द्विगुणं बलिदानकम्
द्विगुणं प्रजपेन्मन्त्रं द्विगुणं होमयेत्सुधीः
dviguṇaṃ pūjanaṃ tatra dviguṇaṃ balidānakam
dviguṇaṃ prajapenmantraṃ dviguṇaṃ homayetsudhīḥ
- 12
अन्यथा विफला पूजा विफलं बलिदानकम्
सर्वं हि विफलं यस्मात्तस्माद्यन्त्रं न कारयेत्
anyathā viphalā pūjā viphalaṃ balidānakam
sarvaṃ hi viphalaṃ yasmāttasmādyantraṃ na kārayet
- 13
इति ते कथितं कान्ते पूजाधारं सुदुर्लभम्
iti te kathitaṃ kānte pūjādhāraṃ sudurlabham
- 14
अथातः सम्प्रवक्ष्यामि शिवलिङ्गस्य लक्षणम्
पार्थिवे शिवपूजायां सर्वसिद्धियुतो भवेत्
athātaḥ sampravakṣyāmi śivaliṅgasya lakṣaṇam
pārthive śivapūjāyāṃ sarvasiddhiyuto bhavet
- 15
पाषाणे शिवपूजायां द्विगुणं फलम् ईरितम्
स्वर्णलिङ्गे च पूजायां शत्रूणां नाशनं मतम्
pāṣāṇe śivapūjāyāṃ dviguṇaṃ phalam īritam
svarṇaliṅge ca pūjāyāṃ śatrūṇāṃ nāśanaṃ matam
- 16
सर्वसिद्धीश्वरो रौप्ये फलं तस्माच्चतुर्गुणम्
ताम्रे पुष्टिं विजानीयात्कांस्ये च धनसंचयम्
sarvasiddhīśvaro raupye phalaṃ tasmāccaturguṇam
tāmre puṣṭiṃ vijānīyātkāṃsye ca dhanasaṃcayam
- 17
पारदस्य च माहात्म्यं पुरैव कथितं मया
गङ्गायां च लक्षगुणं लाक्षायां रोगवान्भवेत्
pāradasya ca māhātmyaṃ puraiva kathitaṃ mayā
gaṅgāyāṃ ca lakṣaguṇaṃ lākṣāyāṃ rogavānbhavet
- 18
स्फाटिके सर्वसिद्धिः स्यात्तथा मारकते प्रिये
लौहलिङ्गे रिपोर्नाशं कामदं भस्मलिङ्गके
sphāṭike sarvasiddhiḥ syāttathā mārakate priye
lauhaliṅge ripornāśaṃ kāmadaṃ bhasmaliṅgake
- 19
वालुकायां काम्यसिद्धिर्गोमये रिपुहिंसनम्
सर्वलिङ्गस्य माहात्म्यं धर्मार्थकाममोक्षदम्
vālukāyāṃ kāmyasiddhirgomaye ripuhiṃsanam
sarvaliṅgasya māhātmyaṃ dharmārthakāmamokṣadam
- 20
आधारभेदे यत्पुण्यं चाधिकं कथितं तु ते
अतिरिक्तफलान्य् एतदाधारस्य सुलोचने
ādhārabhede yatpuṇyaṃ cādhikaṃ kathitaṃ tu te
atiriktaphalāny etadādhārasya sulocane
- 21
शिवस्य पूजनाद्देवि चतुर्वर्गाधिपो भवेत्
अष्टैश्वर्ययुतो मर्त्यः शम्भुनाथस्य पूजनात्
śivasya pūjanāddevi caturvargādhipo bhavet
aṣṭaiśvaryayuto martyaḥ śambhunāthasya pūjanāt
- 22
स्वयं नारायणः प्रोक्तो यदि शम्भुं प्रपूजयेत्
स्वर्गे मर्त्ये च पाताले ये देवाः संस्थिताः सदा
तेषां पूजा भवेद्देवि शम्भुनाथस्य पूजनात्
svayaṃ nārāyaṇaḥ prokto yadi śambhuṃ prapūjayet
svarge martye ca pātāle ye devāḥ saṃsthitāḥ sadā
teṣāṃ pūjā bhaveddevi śambhunāthasya pūjanāt
- 23
स्वर्णपुष्पसहस्रेण यत्फलं लभते नरः
तस्माल्लक्षगुणं पुण्यं भग्नैकबिल्वपत्त्रके
svarṇapuṣpasahasreṇa yatphalaṃ labhate naraḥ
tasmāllakṣaguṇaṃ puṇyaṃ bhagnaikabilvapattrake
- 24
भग्नैकबिल्वपत्त्रस्य सहस्रकेन भागतः
मेरुतुल्यसुवर्णेन तत्फलं न हि लभ्यते
bhagnaikabilvapattrasya sahasrakena bhāgataḥ
merutulyasuvarṇena tatphalaṃ na hi labhyate
- 25
शुद्धाशुद्धविचारो ऽपि नास्ति तच्छिवपूजने
येन तेन प्रकारेण बिल्वपत्त्रैः प्रपूजनात्
सर्वसिद्धियुतो भूत्वा स नरः सिद्ध एव हि
śuddhāśuddhavicāro 'pi nāsti tacchivapūjane
yena tena prakāreṇa bilvapattraiḥ prapūjanāt
sarvasiddhiyuto bhūtvā sa naraḥ siddha eva hi
- 26
ब्रह्माण्डमध्ये ये देवास्तद्बाह्ये याश्च देवताः
ते सर्वे तृप्तिम् आयान्ति केवलं शिवपूजनात्
brahmāṇḍamadhye ye devāstadbāhye yāśca devatāḥ
te sarve tṛptim āyānti kevalaṃ śivapūjanāt
- 27
पुष्पं गन्धं जलं द्रव्यं लिङ्गोपरि नियोजयेत्
लिङ्गमध्ये महावह्निः सैव रुद्रः प्रकीर्तितः
puṣpaṃ gandhaṃ jalaṃ dravyaṃ liṅgopari niyojayet
liṅgamadhye mahāvahniḥ saiva rudraḥ prakīrtitaḥ
- 28
रुद्रोपरि क्षिपेद्यत्तु तद् एव भस्मतां गतः
rudropari kṣipedyattu tad eva bhasmatāṃ gataḥ
- 29
साक्षाद्धोमो महेशानि शिवस्य पूजनाद्भवेत्
महायज्ञेश्वरो मर्त्यः शिवस्य पूजनाद्भवेत्
sākṣāddhomo maheśāni śivasya pūjanādbhavet
mahāyajñeśvaro martyaḥ śivasya pūjanādbhavet
- 30
कुशाग्रमानं यत्तोयं तत्तोयेन यजेद्यदि
सत्यं सत्यं हि गिरिजे तज्जलं सागरोपमम्
kuśāgramānaṃ yattoyaṃ tattoyena yajedyadi
satyaṃ satyaṃ hi girije tajjalaṃ sāgaropamam

