42 shlokas
- 1
श्रीचण्डिकोवाच
मन्त्रधारणमात्रेण तत्क्षणे तन्मयो भवेत्
जीवात्मा कुण्डलीमध्ये प्रदीपकलिका यथा
śrīcaṇḍikovāca
mantradhāraṇamātreṇa tatkṣaṇe tanmayo bhavet
jīvātmā kuṇḍalīmadhye pradīpakalikā yathā
- 2
निजेष्टदेवतारूपा देहसंस्था च कुण्डली
भुज्यते सैव देहस्था का चिन्ता साधकस्य च
तन्मे ब्रूहि महादेव यद्यहं तव वल्लभा
nijeṣṭadevatārūpā dehasaṃsthā ca kuṇḍalī
bhujyate saiva dehasthā kā cintā sādhakasya ca
tanme brūhi mahādeva yadyahaṃ tava vallabhā
- 3
श्रीशंकर उवाच
भोगस्तु त्रिविधो देवि दिव्यवीरपशुक्रमात्
निर्लिप्तो दिव्यभावस्थः कुण्डली भुज्यते यदि
śrīśaṃkara uvāca
bhogastu trividho devi divyavīrapaśukramāt
nirlipto divyabhāvasthaḥ kuṇḍalī bhujyate yadi
- 4
अजिह्वान्ता कुण्डलिनी वीरस्य वीरवन्दिते
महादेव्याः प्रीतये च प्रसादं भुज्यते पशुः
ajihvāntā kuṇḍalinī vīrasya vīravandite
mahādevyāḥ prītaye ca prasādaṃ bhujyate paśuḥ
- 5
द्विजातेर्दिव्यभावश्च सदा निर्वाणदायकः
विप्रो वीरश्च निर्वाणी भवत्य् एव न संशयः
dvijāterdivyabhāvaśca sadā nirvāṇadāyakaḥ
vipro vīraśca nirvāṇī bhavaty eva na saṃśayaḥ
- 6
सायुज्यादि महामोक्षं नियुक्तं क्षत्रियादिषु
पशुना भक्तियुक्तेन प्रसादं भुज्यते यदि
sāyujyādi mahāmokṣaṃ niyuktaṃ kṣatriyādiṣu
paśunā bhaktiyuktena prasādaṃ bhujyate yadi
- 7
स्वर्गभोगी भवत्य् एव मरणे नाधिकारिता
जन्मान्तरम् अवाप्नोति महादेव्याः प्रसादतः
svargabhogī bhavaty eva maraṇe nādhikāritā
janmāntaram avāpnoti mahādevyāḥ prasādataḥ
- 8
दिव्यवीरमते दृष्टिर्जायते नात्र संशयः
दिव्यवीरप्रसादेन निर्वाणी नात्र संशयः
divyavīramate dṛṣṭirjāyate nātra saṃśayaḥ
divyavīraprasādena nirvāṇī nātra saṃśayaḥ
- 9
प्रसादभोगी यो देवि स पशुर्नात्र संशयः
मरणे नाधिकारो ऽस्ति पशुभावस्थितस्य च
prasādabhogī yo devi sa paśurnātra saṃśayaḥ
maraṇe nādhikāro 'sti paśubhāvasthitasya ca
- 10
नैव मुक्तिर्भवेत्तस्य जन्म चाप्नोति निश्चितम्
naiva muktirbhavettasya janma cāpnoti niścitam
- 11
श्रीचण्डिकोवाच
वद मे परमेशान दिव्यवीरस्य लक्षणम्
यत्कृते दिव्यवीरस्य महामुक्तिर्भविष्यति
śrīcaṇḍikovāca
vada me parameśāna divyavīrasya lakṣaṇam
yatkṛte divyavīrasya mahāmuktirbhaviṣyati
- 12
श्रीशंकर उवाच
साक्षाद्ब्रह्ममयी देवी चाभिशप्ता च वारुणी
शापमोचनमात्रेण ब्रह्मरूपा सुधा परा
śrīśaṃkara uvāca
sākṣādbrahmamayī devī cābhiśaptā ca vāruṇī
śāpamocanamātreṇa brahmarūpā sudhā parā
- 13
निवेदनान्महादेव्यै तत्तद्देवी भवेत्किल
मूलाधारात्कुण्डलिनीम् आ जिह्वान्तां विभावयेत्
nivedanānmahādevyai tattaddevī bhavetkila
mūlādhārātkuṇḍalinīm ā jihvāntāṃ vibhāvayet
- 14
तन्मुखे दानमात्रेण ज्ञानवान्साधको भवेत्
यथैव कुण्डली देवी देहमध्ये व्यवस्थिता
tanmukhe dānamātreṇa jñānavānsādhako bhavet
yathaiva kuṇḍalī devī dehamadhye vyavasthitā
- 15
तथैव वारुणीं ध्यायेत्कलाङ्गे स्वेष्टदेवताम्
कुण्डल्या समभावेन शक्तिवक्त्रे प्रदापयेत्
tathaiva vāruṇīṃ dhyāyetkalāṅge sveṣṭadevatām
kuṇḍalyā samabhāvena śaktivaktre pradāpayet
- 16
आत्मोच्छिष्टं महापूतं तन्मुखात्परमामृतम्
अवश्यम् एव गृह्णीयात्तादात्म्येन वरानने
ātmocchiṣṭaṃ mahāpūtaṃ tanmukhātparamāmṛtam
avaśyam eva gṛhṇīyāttādātmyena varānane
- 17
उत्सृष्टादिविचारो ऽपि कदाचिन्नास्ति ब्रह्मणि
गङ्गातोयं परं ब्रह्म प्रसादं कस्य तद्वद
utsṛṣṭādivicāro 'pi kadācinnāsti brahmaṇi
gaṅgātoyaṃ paraṃ brahma prasādaṃ kasya tadvada
- 18
गङ्गासागरतोयं वा प्रसादं कस्य वा भवेत्
शृणु देवि प्रवक्ष्यामि तज्जले स्नानमात्रतः
gaṅgāsāgaratoyaṃ vā prasādaṃ kasya vā bhavet
śṛṇu devi pravakṣyāmi tajjale snānamātrataḥ
- 19
मुक्तिभागी भवेन्मर्त्यः स्नानावगाहनात्किल
पादादिमस्तकान्तं वै स्नानकाले प्रमज्जति
muktibhāgī bhavenmartyaḥ snānāvagāhanātkila
pādādimastakāntaṃ vai snānakāle pramajjati
- 20
पादस्पर्शो न दोषाय परब्रह्मणि शैलजे
परमात्मनि लीने च तथैव परमेश्वरि
pādasparśo na doṣāya parabrahmaṇi śailaje
paramātmani līne ca tathaiva parameśvari
- 21
इति ते कथितं देवि दिव्यवीरस्य लक्षणम्
वीरतन्त्रे च कथितं माहात्म्यं प्राणवल्लभे
iti te kathitaṃ devi divyavīrasya lakṣaṇam
vīratantre ca kathitaṃ māhātmyaṃ prāṇavallabhe
- 22
शृणु देवि प्रवक्ष्यामि साधिकायाश्च लक्षणम्
दिव्यशक्तिर्वीरशक्तिर्गुरुशक्तिस्तथा परा
śṛṇu devi pravakṣyāmi sādhikāyāśca lakṣaṇam
divyaśaktirvīraśaktirguruśaktistathā parā
- 23
कुलशक्तिः कामिनी च नवशक्तिः कुमारिका
श्रीगुरुं पूजयेद्भक्त्या स्वदेहदानपूर्वकम्
kulaśaktiḥ kāminī ca navaśaktiḥ kumārikā
śrīguruṃ pūjayedbhaktyā svadehadānapūrvakam
- 24
अन्यथा तु स्वदेहस्य निग्रहो जायते ध्रुवम्
सप्तजन्मनि सा देवी पुक्कसी पतिवर्जिता
anyathā tu svadehasya nigraho jāyate dhruvam
saptajanmani sā devī pukkasī pativarjitā
- 25
शिवं मत्वा स्वकान्तं च पूजासाधनम् आचरेत्
कदाचिन्न यजेच्चान्यं पुरुषं परमेश्वरि
śivaṃ matvā svakāntaṃ ca pūjāsādhanam ācaret
kadācinna yajeccānyaṃ puruṣaṃ parameśvari
- 26
अन्यस्य यजनाच्चण्डि सर्वनाशो भवेद्ध्रुवम्
कान्तस्यायुर्विहीनत्वं विपत्तिं च पदे पदे
anyasya yajanāccaṇḍi sarvanāśo bhaveddhruvam
kāntasyāyurvihīnatvaṃ vipattiṃ ca pade pade
- 27
धननाशो भवेन्नित्यं देव्याः क्रोधश्च जायते
अवश्यं पूजयेन्नित्यं गुरुदेवं सनातनम्
dhananāśo bhavennityaṃ devyāḥ krodhaśca jāyate
avaśyaṃ pūjayennityaṃ gurudevaṃ sanātanam
- 28
भद्राभद्रविचारं च या करोति गुरुस्थले
तस्या मन्त्रं क्रोधयुक्तं विपत्तिश्च पदे पदे
bhadrābhadravicāraṃ ca yā karoti gurusthale
tasyā mantraṃ krodhayuktaṃ vipattiśca pade pade
- 29
वरं जनमुखान्निन्दा वरं प्राणान्परित्यजेत्
तथापि पूजयेद्देवं साक्षान्निर्वाणदायकम्
varaṃ janamukhānnindā varaṃ prāṇānparityajet
tathāpi pūjayeddevaṃ sākṣānnirvāṇadāyakam
- 30
सदा भयं च कापट्यं वर्जयेद्गुरुपूजने
sadā bhayaṃ ca kāpaṭyaṃ varjayedgurupūjane

