34 shlokas
- 1
श्रीदेव्य् उवाच
शृणु नाथ परानन्द परापरकुलात्मक
त्वां विना त्राणकर्ता च मम ज्ञाने न वर्तते
śrīdevy uvāca
śṛṇu nātha parānanda parāparakulātmaka
tvāṃ vinā trāṇakartā ca mama jñāne na vartate
- 2
पूर्णलिङ्गं महेशान शिवबीजं न चान्यथा
शिलामध्ये तथा चक्रं लक्ष्मीनारायणं परम्
pūrṇaliṅgaṃ maheśāna śivabījaṃ na cānyathā
śilāmadhye tathā cakraṃ lakṣmīnārāyaṇaṃ param
- 3
पारदस्य शतांशैकं मम ज्ञाने न वर्तते
शिवबीजं महादेव शिवरूपं न चान्यथा
लिङ्गरूपं कथं देव तद्वदस्व मयि प्रभो
pāradasya śatāṃśaikaṃ mama jñāne na vartate
śivabījaṃ mahādeva śivarūpaṃ na cānyathā
liṅgarūpaṃ kathaṃ deva tadvadasva mayi prabho
- 4
श्रीशिव उवाच
यथा ज्योतिर्मयं लिङ्गं कैलासशिखरे मम
तस्यैव षोडशांशैकः काश्यां विश्वेश्वरः स्थितः
śrīśiva uvāca
yathā jyotirmayaṃ liṅgaṃ kailāsaśikhare mama
tasyaiva ṣoḍaśāṃśaikaḥ kāśyāṃ viśveśvaraḥ sthitaḥ
- 5
पूर्णलिङ्गं महेशानि शिवबीजं न चान्यथा
शिलामध्ये तथा चक्रं लक्ष्मीनारायणं परम्
pūrṇaliṅgaṃ maheśāni śivabījaṃ na cānyathā
śilāmadhye tathā cakraṃ lakṣmīnārāyaṇaṃ param
- 6
पारदस्य शतांशैकं लक्ष्मीनारायणं न हि
पकारं विष्णुरूपं च आकारं कालिका तथा
pāradasya śatāṃśaikaṃ lakṣmīnārāyaṇaṃ na hi
pakāraṃ viṣṇurūpaṃ ca ākāraṃ kālikā tathā
- 7
रेफं शिवं दकारं च ब्रह्मरूपं न चान्यथा
पारदं परमेशानि ब्रह्मविष्णुशिवात्मकम्
rephaṃ śivaṃ dakāraṃ ca brahmarūpaṃ na cānyathā
pāradaṃ parameśāni brahmaviṣṇuśivātmakam
- 8
यो यजेत्पारदं लिङ्गं स एव शम्भुर् अव्ययः
स एव धन्यो देवेशि स ज्ञानी स तु तत्त्ववित्
yo yajetpāradaṃ liṅgaṃ sa eva śambhur avyayaḥ
sa eva dhanyo deveśi sa jñānī sa tu tattvavit
- 9
स ब्रह्मवेत्ता स धनी स राजा भुवि पूजितः
अणिमादिविभूतीनाम् ईश्वरः साधकोत्तमः
sa brahmavettā sa dhanī sa rājā bhuvi pūjitaḥ
aṇimādivibhūtīnām īśvaraḥ sādhakottamaḥ
- 10
स्त्रियः स्वभावचपला गोपितुं न हि शक्यते
अत एव हि देवेशि विरता भव पार्वति
striyaḥ svabhāvacapalā gopituṃ na hi śakyate
ata eva hi deveśi viratā bhava pārvati
- 11
श्रीदेव्य् उवाच
कथयस्व कृपानाथ करुणा यदि वर्तते
तव वाक्यं विना देव क्व मुक्तिः क्व च साधुता
śrīdevy uvāca
kathayasva kṛpānātha karuṇā yadi vartate
tava vākyaṃ vinā deva kva muktiḥ kva ca sādhutā
- 12
श्रीशिव उवाच
पारदं शिवबीजं हि ताडनं न हि कारयेत्
ताडनाद्वित्तनाशः स्यात्ताडनात्सुतहीनता
ताडनाद्रोगयुक्तः स्यात्ताडनान्मरणं भवेत्
śrīśiva uvāca
pāradaṃ śivabījaṃ hi tāḍanaṃ na hi kārayet
tāḍanādvittanāśaḥ syāttāḍanātsutahīnatā
tāḍanādrogayuktaḥ syāttāḍanānmaraṇaṃ bhavet
- 13
श्रीदेव्य् उवाच
एतद्विघ्नादिकं नाथ सत्यम् एव न संशयः
विघ्नादिरहितं नाथ कथयस्व दयानिधे
śrīdevy uvāca
etadvighnādikaṃ nātha satyam eva na saṃśayaḥ
vighnādirahitaṃ nātha kathayasva dayānidhe
- 14
श्रीशिव उवाच
पारदे शिवनिर्माणे नानाविघ्नं यतः शिवे
अत एव हि तत्रादौ शान्तिस्वस्त्ययनं चरेत्
śrīśiva uvāca
pārade śivanirmāṇe nānāvighnaṃ yataḥ śive
ata eva hi tatrādau śāntisvastyayanaṃ caret
- 15
द्वादशं पार्थिवं लिङ्गम् उपचारैश्च षोडशैः
पट्टादिसूत्रनिर्माणं रचितं शुक्लम् एव वा
dvādaśaṃ pārthivaṃ liṅgam upacāraiśca ṣoḍaśaiḥ
paṭṭādisūtranirmāṇaṃ racitaṃ śuklam eva vā
- 16
पुरुषस्य यथायोग्यं युग्मवस्त्रं निवेदयेत्
भोगयोग्यं प्रदातव्यं मधुपर्कं सुरेश्वरि
puruṣasya yathāyogyaṃ yugmavastraṃ nivedayet
bhogayogyaṃ pradātavyaṃ madhuparkaṃ sureśvari
- 17
अलंकारं यथाशक्ति दद्यात्कल्याणहेतवे
पूजयेद्बहुयत्नेन बिल्वपत्त्रेण पार्वति
alaṃkāraṃ yathāśakti dadyātkalyāṇahetave
pūjayedbahuyatnena bilvapattreṇa pārvati
- 18
तोडलोक्तेन विधिना प्रत्येकेनायुतं जपेत्
आदौ पञ्चाक्षरं मन्त्रम् अष्टोत्तरशतं जपेत्
toḍaloktena vidhinā pratyekenāyutaṃ japet
ādau pañcākṣaraṃ mantram aṣṭottaraśataṃ japet
- 19
पूजान्ते प्रजपेत्पश्चात्प्रासादाख्यं महामनुम्
दक्षिणान्तं समाचर्य हविष्याशी जितेन्द्रियः
pūjānte prajapetpaścātprāsādākhyaṃ mahāmanum
dakṣiṇāntaṃ samācarya haviṣyāśī jitendriyaḥ
- 20
ताम्बूलं च तथा मत्स्यं वर्जयेन्न कदाचन
अस्मिंस्तन्त्रे हविष्यान्नं ताम्बूलं मीनम् उत्तमम्
tāmbūlaṃ ca tathā matsyaṃ varjayenna kadācana
asmiṃstantre haviṣyānnaṃ tāmbūlaṃ mīnam uttamam
- 21
होमयेत्परमेशानि दशांशं वा शतांशम्
होमस्य दक्षिणा कार्या तदा विघ्नैर्न लिप्यते
homayetparameśāni daśāṃśaṃ vā śatāṃśam
homasya dakṣiṇā kāryā tadā vighnairna lipyate
- 22
ततः परस्मिन्दिवसे पारदम् आनयेद्बुधः
तस्योपरि जपेन्मन्त्रं सर्ववन्द्यनवात्मकम्
tataḥ parasmindivase pāradam ānayedbudhaḥ
tasyopari japenmantraṃ sarvavandyanavātmakam
- 23
व्योमबीजं शिवान्तं च वर्गाद्यं बिन्दुमस्तकम्
वायुबीजं च त्रितयं त्रितयं त्र्यम्बकं प्रिये
vyomabījaṃ śivāntaṃ ca vargādyaṃ bindumastakam
vāyubījaṃ ca tritayaṃ tritayaṃ tryambakaṃ priye
- 24
इमं मन्त्रं महेशानि प्रजपेद् औषधोपरि
पारदे प्रजपेन्मन्त्रम् अष्टोत्तरशतं यदि
imaṃ mantraṃ maheśāni prajaped auṣadhopari
pārade prajapenmantram aṣṭottaraśataṃ yadi
- 25
तद् एवौषधयोगेन बद्धो भवति नान्यथा
tad evauṣadhayogena baddho bhavati nānyathā
- 26
ततः परस्मिन्दिवसे शृणु मत्प्राणवल्लभे
वरयेत्कर्मकर्तारं यथोक्तविभवावधि
tataḥ parasmindivase śṛṇu matprāṇavallabhe
varayetkarmakartāraṃ yathoktavibhavāvadhi
- 27
सुवर्णं चम्पकाकारं कर्णयुग्मे निवेदयेत्
चतुष्कोणयुतं स्वर्णं ग्रीवायां सुमनोहरम्
suvarṇaṃ campakākāraṃ karṇayugme nivedayet
catuṣkoṇayutaṃ svarṇaṃ grīvāyāṃ sumanoharam
- 28
हस्तद्वये महेशानि दद्याद्वलययुग्मकम्
वलयं शुक्लवर्णं च अङ्गरीयं तथैव च
hastadvaye maheśāni dadyādvalayayugmakam
valayaṃ śuklavarṇaṃ ca aṅgarīyaṃ tathaiva ca
- 29
ऊर्मिं दद्यात्पीतवस्त्रं क्षौमवस्त्रयुगं शिवे
एवं कृत्वा महेशानि शिवरूपं विचिन्तयेत्
ūrmiṃ dadyātpītavastraṃ kṣaumavastrayugaṃ śive
evaṃ kṛtvā maheśāni śivarūpaṃ vicintayet
- 30
अथातः सम्प्रवक्ष्यामि विधानं शृणु पार्वति
प्रस्तरे चैव संस्थाप्य झिण्टीपत्त्ररसेन च
प्रस्तरेण समालोड्य कुर्यात्कर्दमवत्प्रिये
athātaḥ sampravakṣyāmi vidhānaṃ śṛṇu pārvati
prastare caiva saṃsthāpya jhiṇṭīpattrarasena ca
prastareṇa samāloḍya kuryātkardamavatpriye

