69 shlokas
- 1
श्रीचण्डिकोवाच
वद ईशान सर्वज्ञ सर्वतत्त्वविदां वर
महारोगे महादुःखे महादारिद्र्यसंकटे
śrīcaṇḍikovāca
vada īśāna sarvajña sarvatattvavidāṃ vara
mahāroge mahāduḥkhe mahādāridryasaṃkaṭe
- 2
नानाव्याधिगते वापि नानापीडादिसंकटे
राज्यनाशे राजभये कारागारगते पुनः
nānāvyādhigate vāpi nānāpīḍādisaṃkaṭe
rājyanāśe rājabhaye kārāgāragate punaḥ
- 3
रायदण्डे च देवेश तथा च ग्रहपीडिते
केनोपायेन देवेश मुच्यते वद शंकर
rāyadaṇḍe ca deveśa tathā ca grahapīḍite
kenopāyena deveśa mucyate vada śaṃkara
- 4
श्रीशंकर उवाच
शृणु चार्वङ्गि सुभगे यन्मां त्वं परिपृच्छसि
तत्तत्सर्वं प्रवक्ष्यामि सावधानावधारय
śrīśaṃkara uvāca
śṛṇu cārvaṅgi subhage yanmāṃ tvaṃ paripṛcchasi
tattatsarvaṃ pravakṣyāmi sāvadhānāvadhāraya
- 5
या चाद्या परमा विद्या चामुण्डा कालिका परा
तस्याः प्रयोगमात्रेण किं न सिध्यति भूतले
yā cādyā paramā vidyā cāmuṇḍā kālikā parā
tasyāḥ prayogamātreṇa kiṃ na sidhyati bhūtale
- 6
श्रीचण्डिकोवाच
राहुश्चण्डालो विख्यातः सर्वत्र परमेश्वर
पुण्यकालः कथं देव तस्य स्पर्शे दिवाकरे
śrīcaṇḍikovāca
rāhuścaṇḍālo vikhyātaḥ sarvatra parameśvara
puṇyakālaḥ kathaṃ deva tasya sparśe divākare
- 7
निशाकरे तथा नाथ इति मे संशयो हृदि
कथयस्व परानन्द पश्चाद् अन्यत्प्रकाशय
niśākare tathā nātha iti me saṃśayo hṛdi
kathayasva parānanda paścād anyatprakāśaya
- 8
श्रीशंकर उवाच
शृणु चार्वङ्गि सुभगे ग्रहणं चोत्तमोत्तमम्
ग्रहणं त्रिविधं देवि चन्द्रसूर्याग्निसंयुतम्
śrīśaṃkara uvāca
śṛṇu cārvaṅgi subhage grahaṇaṃ cottamottamam
grahaṇaṃ trividhaṃ devi candrasūryāgnisaṃyutam
- 9
शक्तेर्ललाटके नेत्रे वह्निस्तिष्ठति सर्वदा
वामनेत्रे तथा चन्द्रो दक्षे सूर्यः प्रतिष्ठितः
śakterlalāṭake netre vahnistiṣṭhati sarvadā
vāmanetre tathā candro dakṣe sūryaḥ pratiṣṭhitaḥ
- 10
शम्भुनाथेन देवेशि रमणं क्रियते यदा
तदैव ग्रहणं देवि शक्तियुक्तो यदा शिवः
śambhunāthena deveśi ramaṇaṃ kriyate yadā
tadaiva grahaṇaṃ devi śaktiyukto yadā śivaḥ
- 11
वामनेत्रे चुम्बने तु शशाङ्कग्रहणं तदा
दक्षनेत्रे चुम्बने च भास्करग्रहणं तदा
vāmanetre cumbane tu śaśāṅkagrahaṇaṃ tadā
dakṣanetre cumbane ca bhāskaragrahaṇaṃ tadā
- 12
ललाटे चुम्बने चाग्निग्रहणं परमेश्वरि
शिववीर्यं यतो वह्निरतो ऽदृश्यः सुरेश्वरि
lalāṭe cumbane cāgnigrahaṇaṃ parameśvari
śivavīryaṃ yato vahnirato 'dṛśyaḥ sureśvari
- 13
राहुः शिवः समाख्यातस्त्रिगुणा शक्तिर् ईरिता
शिवशक्त्योः समायोगो ग्रहणं परमेश्वरि
rāhuḥ śivaḥ samākhyātastriguṇā śaktir īritā
śivaśaktyoḥ samāyogo grahaṇaṃ parameśvari
- 14
शिवशक्तिसमायोगः कालं ब्रह्ममयं प्रिये
अत एव महेशानि राश्यादीन्न विचारयेत्
śivaśaktisamāyogaḥ kālaṃ brahmamayaṃ priye
ata eva maheśāni rāśyādīnna vicārayet
- 15
तिथिनक्षत्रयोगेन यद्योगं परमेश्वरि
तदैव परमेशानि राश्यादिगणनं चरेत्
tithinakṣatrayogena yadyogaṃ parameśvari
tadaiva parameśāni rāśyādigaṇanaṃ caret
- 16
शिवशक्तिसमायोगात्सर्वं ब्रह्ममयं जगत्
मासपक्षतिथीनां च नोच्चार्यं परमेश्वरि
śivaśaktisamāyogātsarvaṃ brahmamayaṃ jagat
māsapakṣatithīnāṃ ca noccāryaṃ parameśvari
- 17
दृष्टिमात्रेण जप्तव्यं तदा सिद्धिर्भवेद्ध्रुवम्
तत्कालं परमं कालं विज्ञेयं वीरवन्दिते
dṛṣṭimātreṇa japtavyaṃ tadā siddhirbhaveddhruvam
tatkālaṃ paramaṃ kālaṃ vijñeyaṃ vīravandite
- 18
तत्र यद्यत्कृतं सर्वम् अनन्तफलम् ईरितम्
पुरैव कथितं सर्वं बहु किं कथ्यते ऽधुना
tatra yadyatkṛtaṃ sarvam anantaphalam īritam
puraiva kathitaṃ sarvaṃ bahu kiṃ kathyate 'dhunā
- 19
एतत्सुगुप्तभेदं हि तव स्नेहात्प्रकाशितम्
न वक्तव्यं पशोर् अग्रे न वक्तव्यं सुरेश्वरि
etatsuguptabhedaṃ hi tava snehātprakāśitam
na vaktavyaṃ paśor agre na vaktavyaṃ sureśvari
- 20
एतत्तत्त्वं प्रयत्नेन ब्रह्मा जानाति माधवः
प्रगोप्तव्यं प्रयत्नेन स्वयोनिर् इव शैलजे
etattattvaṃ prayatnena brahmā jānāti mādhavaḥ
pragoptavyaṃ prayatnena svayonir iva śailaje
- 21
श्रीचण्डिकोवाच
चामुण्डाया महामन्त्रं कीदृशं परमेश्वर
आराधनं कीदृशं वा तद्वदस्व दयानिधे
śrīcaṇḍikovāca
cāmuṇḍāyā mahāmantraṃ kīdṛśaṃ parameśvara
ārādhanaṃ kīdṛśaṃ vā tadvadasva dayānidhe
- 22
श्रीशंकर उवाच
शृणु चार्वङ्गि सुभगे चामुण्डामन्त्रम् उत्तमम्
यस्य विज्ञानमात्रेण पुनर्जन्म न विद्यते
śrīśaṃkara uvāca
śṛṇu cārvaṅgi subhage cāmuṇḍāmantram uttamam
yasya vijñānamātreṇa punarjanma na vidyate
- 23
कालीबीजयुगं देवि कूर्चबीजं ततः परम्
त्र्यक्षरी परमा विद्या चामुण्डा कालिका स्वयम्
kālībījayugaṃ devi kūrcabījaṃ tataḥ param
tryakṣarī paramā vidyā cāmuṇḍā kālikā svayam
- 24
सप्ताहं पूजयेद्देवीम् उपचारैश्च षोडशैः
पूजान्ते प्रजपेन्मन्त्रं त्रिसहस्रं वरानने
saptāhaṃ pūjayeddevīm upacāraiśca ṣoḍaśaiḥ
pūjānte prajapenmantraṃ trisahasraṃ varānane
- 25
रात्रौ तु पञ्चतत्त्वेन पूजयेत्परमेश्वरीम्
तथा रात्रौ जपेन्मन्त्रं कुलशक्तिसमन्वितम्
rātrau tu pañcatattvena pūjayetparameśvarīm
tathā rātrau japenmantraṃ kulaśaktisamanvitam
- 26
यन्त्रनिर्माणयोग्यं हि पीठं दद्यात्सुविस्तरम्
भोगयोग्यं प्रदातव्यं मधुपर्कं यथोचितम्
yantranirmāṇayogyaṃ hi pīṭhaṃ dadyātsuvistaram
bhogayogyaṃ pradātavyaṃ madhuparkaṃ yathocitam
- 27
शक्तेर्यथा विधेयं स्याद्युवत्याः परमेश्वरि
तथा वस्त्रं प्रदातव्यं सर्वकल्याणहेतवे
śakteryathā vidheyaṃ syādyuvatyāḥ parameśvari
tathā vastraṃ pradātavyaṃ sarvakalyāṇahetave
- 28
अलंकारं यथायोग्यं तत्र तत्र नियोजयेत्
नैवेद्यं विविधं रम्यं नानाद्रव्यसमन्वितम्
alaṃkāraṃ yathāyogyaṃ tatra tatra niyojayet
naivedyaṃ vividhaṃ ramyaṃ nānādravyasamanvitam
- 29
सामिषान्नं प्रदातव्यं परमान्नं सशर्करम्
पूजयेत्परया भक्त्या बलिदानं ततः परम्
sāmiṣānnaṃ pradātavyaṃ paramānnaṃ saśarkaram
pūjayetparayā bhaktyā balidānaṃ tataḥ param
- 30
प्रत्यहं परमेशानि चाद्यन्ते वा बलिं हरेत्
साङ्गे जाते महेशानि चाथवा बलिम् आहरेत्
pratyahaṃ parameśāni cādyante vā baliṃ haret
sāṅge jāte maheśāni cāthavā balim āharet

