24 shlokas
- 1
श्रीदेव्य् उवाच
नराकृतिं गुरुं नाथ मन्त्रं वर्णात्मकं तथा
ध्यानानुरूपिणं देवम् एकत्वं वा कथं वद
śrīdevy uvāca
narākṛtiṃ guruṃ nātha mantraṃ varṇātmakaṃ tathā
dhyānānurūpiṇaṃ devam ekatvaṃ vā kathaṃ vada
- 2
श्रीशिव उवाच
गुरुवक्त्रान्महामन्त्रो लभ्यते साधकोत्तमैः
यद्य् एको जायते वीर्यस्तस्य मूर्तिर्भवेद्ध्रुवम्
śrīśiva uvāca
guruvaktrānmahāmantro labhyate sādhakottamaiḥ
yady eko jāyate vīryastasya mūrtirbhaveddhruvam
- 3
देवतायाः शरीरं च बीजाद् उत्पद्यते प्रिये
गुरोर् आज्ञानुसारेण चान्यमूर्तिस्तु जायते
devatāyāḥ śarīraṃ ca bījād utpadyate priye
guror ājñānusāreṇa cānyamūrtistu jāyate
- 4
गुर्वादिभावनाद्देवि भावसिद्धिः प्रजायते
अत एव महेशानि चैकत्वं परिकथ्यते
gurvādibhāvanāddevi bhāvasiddhiḥ prajāyate
ata eva maheśāni caikatvaṃ parikathyate
- 5
श्रीदेव्य् उवाच
यच्चाक्षुषं महादेव तदाकरं विचिन्तयेत्
अचाक्षुषे महादेव ध्यानं वा कीदृशं भवेत्
śrīdevy uvāca
yaccākṣuṣaṃ mahādeva tadākaraṃ vicintayet
acākṣuṣe mahādeva dhyānaṃ vā kīdṛśaṃ bhavet
- 6
श्रीशिव उवाच
शब्दब्रह्ममयं देवि मम वक्त्राद्विनिर्गतम्
आकाररहिते देवि यथा ध्यानादिकं भवेत्
śrīśiva uvāca
śabdabrahmamayaṃ devi mama vaktrādvinirgatam
ākārarahite devi yathā dhyānādikaṃ bhavet
- 7
तथैवोच्चारणेनैव भक्तियुक्तेन चेतसा
सत्यं सत्यं महेशानि प्रत्यक्षं नात्र संशयः
tathaivoccāraṇenaiva bhaktiyuktena cetasā
satyaṃ satyaṃ maheśāni pratyakṣaṃ nātra saṃśayaḥ
- 8
श्रीदेव्य् उवाच
पशुप्रदाने वाक्यं तु कीदृशं वद शंकर
येन वाक्येन देवेश देवी तुष्टा भवत्य् अपि
śrīdevy uvāca
paśupradāne vākyaṃ tu kīdṛśaṃ vada śaṃkara
yena vākyena deveśa devī tuṣṭā bhavaty api
- 9
श्रीशिव उवाच
मृगे महिषे चोष्ट्रे च पशुशब्दं न योजयेत्
छागले च तथा सिंहे व्याघ्रे च परमेश्वरि
śrīśiva uvāca
mṛge mahiṣe coṣṭre ca paśuśabdaṃ na yojayet
chāgale ca tathā siṃhe vyāghre ca parameśvari
- 10
पशुशब्दं योजयित्वा महादेव्यै निवेदयेत्
पशुभावस्थितो मन्त्री महिषो दीयते यदि
paśuśabdaṃ yojayitvā mahādevyai nivedayet
paśubhāvasthito mantrī mahiṣo dīyate yadi
- 11
बलिदानं प्रकर्तव्यं न मांसं भक्षयेन्नरः
सम्यक्फलं न लभते दशांशं लभते प्रिये
balidānaṃ prakartavyaṃ na māṃsaṃ bhakṣayennaraḥ
samyakphalaṃ na labhate daśāṃśaṃ labhate priye
- 12
महिषादि प्रदातव्यं दिव्यवीरमते स्थितः
स एव सिद्धिम् आप्नोति फलं सम्यक्प्रियंवदे
mahiṣādi pradātavyaṃ divyavīramate sthitaḥ
sa eva siddhim āpnoti phalaṃ samyakpriyaṃvade
- 13
पशुदानं विना देवि पूजयेन्न कदाचन
तथा च नित्यपूजायां यदि शक्तो भवेन्नरः
paśudānaṃ vinā devi pūjayenna kadācana
tathā ca nityapūjāyāṃ yadi śakto bhavennaraḥ
- 14
केवलं बलिदानेन सिद्धो भवति नान्यथा
निर्धनः परमेशानि यदि पूजादिकं चरेत्
kevalaṃ balidānena siddho bhavati nānyathā
nirdhanaḥ parameśāni yadi pūjādikaṃ caret
- 15
वत्सरान्ते प्रदातव्यं बलिम् एकं सुरेश्वरि
अन्यथा नैव सिद्धिः स्याद् आ जन्म पूजनाद् अपि
vatsarānte pradātavyaṃ balim ekaṃ sureśvari
anyathā naiva siddhiḥ syād ā janma pūjanād api
- 16
बलिदानं महायज्ञं कलिकाले च चण्डिके
अश्वमेधादिकं यज्ञं कलौ नास्ति सुरेश्वरि
balidānaṃ mahāyajñaṃ kalikāle ca caṇḍike
aśvamedhādikaṃ yajñaṃ kalau nāsti sureśvari
- 17
केवलं बलिदानेन चाश्वमेधफलं भवेत्
यज्ञावशेषं यद्द्रव्यं भोजनीयं न चान्यथा
kevalaṃ balidānena cāśvamedhaphalaṃ bhavet
yajñāvaśeṣaṃ yaddravyaṃ bhojanīyaṃ na cānyathā
- 18
यज्ञावशेषभोगेन स यज्ञी नात्र संशयः
न भक्षेद्यदि मोहेन न यज्ञफलभाग्भवेत्
yajñāvaśeṣabhogena sa yajñī nātra saṃśayaḥ
na bhakṣedyadi mohena na yajñaphalabhāgbhavet
- 19
त्याज्यं द्रव्यं कथं देवि महादेव्यै निवेदयेत्
ब्रह्मरूपं महातन्त्रं मम वक्त्राद्विनिर्गतम्
tyājyaṃ dravyaṃ kathaṃ devi mahādevyai nivedayet
brahmarūpaṃ mahātantraṃ mama vaktrādvinirgatam
- 20
स पूतः सर्वपापेभ्यो यदि चैकाक्षरं श्रुतम्
महाभक्तियुतो भूत्वा शृणोति पटलं यदि
sa pūtaḥ sarvapāpebhyo yadi caikākṣaraṃ śrutam
mahābhaktiyuto bhūtvā śṛṇoti paṭalaṃ yadi
- 21
किं तस्य ध्यानपूजायां तीर्थस्नानेन तस्य किम्
शब्दब्रह्ममयं ज्ञात्वा समस्तं यदि चण्डिके
kiṃ tasya dhyānapūjāyāṃ tīrthasnānena tasya kim
śabdabrahmamayaṃ jñātvā samastaṃ yadi caṇḍike
- 22
केवलं श्रवणेनैव स सिद्धो नात्र संशयः
अष्टादशपुराणानां श्रवणेनैव यत्फलम्
kevalaṃ śravaṇenaiva sa siddho nātra saṃśayaḥ
aṣṭādaśapurāṇānāṃ śravaṇenaiva yatphalam
- 23
चतुर्वेदेन साङ्गेन श्रवणेनैव यतः फलम्
अस्य तन्त्रस्य देवेशि कलां नार्हन्ति षोडशीम्
caturvedena sāṅgena śravaṇenaiva yataḥ phalam
asya tantrasya deveśi kalāṃ nārhanti ṣoḍaśīm
- 24
ब्रह्मरूपम् इदं तन्त्रं सारात्सारं परात्परम्
brahmarūpam idaṃ tantraṃ sārātsāraṃ parātparam

