45 shlokas
- 1
श्रीदेव्य् उवाच
सर्वत्राहं श्रुता नाथ भोगं चेन्द्रियपुष्टिदम्
भोगेन मोक्षम् आप्नोति कथं वदसि योगभृत्
śrīdevy uvāca
sarvatrāhaṃ śrutā nātha bhogaṃ cendriyapuṣṭidam
bhogena mokṣam āpnoti kathaṃ vadasi yogabhṛt
- 2
श्रीशङ्कर उवाच
भोगेन लभते योगं भोगेन कुलसाधनम्
भोगेन सिद्धिम् आप्नोति भोगेन मोक्षम् आप्नुयात्
śrīśaṅkara uvāca
bhogena labhate yogaṃ bhogena kulasādhanam
bhogena siddhim āpnoti bhogena mokṣam āpnuyāt
- 3
तस्माद्भोगं सदा कार्यं बाह्यपूजा यथेच्छया
भोजनस्य विधानं यत्तच्छृणुष्व प्रियंवदे
tasmādbhogaṃ sadā kāryaṃ bāhyapūjā yathecchayā
bhojanasya vidhānaṃ yattacchṛṇuṣva priyaṃvade
- 4
आधारे तु या शक्तिर्भुजगाकाररूपिणी
आत्मा परमेशानि तन्मध्ये वर्तते सदा
ādhāre tu yā śaktirbhujagākārarūpiṇī
ātmā parameśāni tanmadhye vartate sadā
- 5
भोजनेच्छा भवेत्तस्मान्निर्लिप्तो जीवसंज्ञकः
सैव साक्षाद्गुणमयो निर्गुणो जीव उच्यते
bhojanecchā bhavettasmānnirlipto jīvasaṃjñakaḥ
saiva sākṣādguṇamayo nirguṇo jīva ucyate
- 6
जीवस्य भोजनं देवि भ्रान्तिर् एव न संशयः
गुणयुक्ता कुण्डलिनी चन्द्रसूर्याग्निरूपिणी
jīvasya bhojanaṃ devi bhrāntir eva na saṃśayaḥ
guṇayuktā kuṇḍalinī candrasūryāgnirūpiṇī
- 7
मूलाधाराच्च तां देवीम् आ जिह्वान्तां विभावयेत्
शोधितान्मत्स्यमांसादीन्संमुखे स्थापयेद्बुधः
mūlādhārācca tāṃ devīm ā jihvāntāṃ vibhāvayet
śodhitānmatsyamāṃsādīnsaṃmukhe sthāpayedbudhaḥ
- 8
मूलमन्त्रं समुच्चार्य जुहोमि कुण्डलीमुखे
अनेन मनुना देवि प्रतिग्रासं समाहरेत्
mūlamantraṃ samuccārya juhomi kuṇḍalīmukhe
anena manunā devi pratigrāsaṃ samāharet
- 9
प्रतिग्रासे परेशानि एवं कुर्याद्विचक्षणः
तदैव ब्रह्मरूपो ऽसौ सत्यं सत्यं सुरेश्वरि
pratigrāse pareśāni evaṃ kuryādvicakṣaṇaḥ
tadaiva brahmarūpo 'sau satyaṃ satyaṃ sureśvari
- 10
भुज्यते कुण्डली देवी इति चिन्तापरो हि यः
मन्त्रसिद्धिर्भवेत्तस्य ज्ञानसिद्धिर्न चान्यथा
bhujyate kuṇḍalī devī iti cintāparo hi yaḥ
mantrasiddhirbhavettasya jñānasiddhirna cānyathā
- 11
एवं कृते ब्रह्मरूपः शिवरूपः स्वयं हरिः
योगसिद्धिर्भवेत्तस्य चाष्टसिद्धिर्भविष्यति
evaṃ kṛte brahmarūpaḥ śivarūpaḥ svayaṃ hariḥ
yogasiddhirbhavettasya cāṣṭasiddhirbhaviṣyati
- 12
शत्रुभिर्दीयते यत्तु कृत्रिमं दारुणं विषम्
भक्षणात्तत्क्षणे देवि ह्य् अमृतं नात्र संशयः
śatrubhirdīyate yattu kṛtrimaṃ dāruṇaṃ viṣam
bhakṣaṇāttatkṣaṇe devi hy amṛtaṃ nātra saṃśayaḥ
- 13
मन्त्रेण शोधितं द्रव्यं भक्षणाद् अमृतं भवेत्
यदैव कालकूटं तु समुद्रमथने प्रिये
mantreṇa śodhitaṃ dravyaṃ bhakṣaṇād amṛtaṃ bhavet
yadaiva kālakūṭaṃ tu samudramathane priye
- 14
तदा चानेन मनुना तत्क्षणात्खादितं मया
tadā cānena manunā tatkṣaṇātkhāditaṃ mayā
- 15
सर्पाकारा कुण्डलिनी या देवी परमा कला
भुज्यते सर्परूपेण तत्रैव दारुणं विषम्
sarpākārā kuṇḍalinī yā devī paramā kalā
bhujyate sarparūpeṇa tatraiva dāruṇaṃ viṣam
- 16
इति ते कथितं कान्ते भोजनस्य विधानकम्
एतत्सर्वं महेशानि गोप्तव्यं पशुसंकटे
iti te kathitaṃ kānte bhojanasya vidhānakam
etatsarvaṃ maheśāni goptavyaṃ paśusaṃkaṭe
- 17
श्रीदेव्य् उवाच
शृणु नाथ परानन्द परापरकुलात्मक
वद मे परमेशान होमकुण्डं तु कीदृशम्
śrīdevy uvāca
śṛṇu nātha parānanda parāparakulātmaka
vada me parameśāna homakuṇḍaṃ tu kīdṛśam
- 18
श्रीशिव उवाच
मणिपूरस्य बाह्ये तु नाभिपद्मं मनोहरम्
अष्टपत्रं तथा वृत्तं तन्मध्ये कुण्डदुर्लभम्
śrīśiva uvāca
maṇipūrasya bāhye tu nābhipadmaṃ manoharam
aṣṭapatraṃ tathā vṛttaṃ tanmadhye kuṇḍadurlabham
- 19
चतुरस्रादिकं देवि तत्कुण्डं कामरूपकम्
सर्वकुण्डस्य देवेशि विप्रः कर्ता विधीयते
caturasrādikaṃ devi tatkuṇḍaṃ kāmarūpakam
sarvakuṇḍasya deveśi vipraḥ kartā vidhīyate
- 20
वर्तुलं बाहुजातस्य वैश्यस्य चार्धचन्द्रकम्
vartulaṃ bāhujātasya vaiśyasya cārdhacandrakam
- 21
त्रिकोणं पादजातस्य होमकुण्डं सुरेश्वरि
एवं कुण्डं महेशानि नालत्रयविभूषितम्
trikoṇaṃ pādajātasya homakuṇḍaṃ sureśvari
evaṃ kuṇḍaṃ maheśāni nālatrayavibhūṣitam
- 22
ऊर्ध्वनालं सहस्रारे परामृतविभूषितम्
मध्यनालं नाभिपद्मे मूलाधारे च सुन्दरि
ūrdhvanālaṃ sahasrāre parāmṛtavibhūṣitam
madhyanālaṃ nābhipadme mūlādhāre ca sundari
- 23
आ लिङ्गाग्रम् अधोनालं सदानन्दमयं शिवे
होमकुण्डम् इदं देवि सर्वतन्त्रे परिष्कृतम्
ā liṅgāgram adhonālaṃ sadānandamayaṃ śive
homakuṇḍam idaṃ devi sarvatantre pariṣkṛtam
- 24
येन होमप्रसादेन साक्षाद्ब्रह्ममयो भवेत्
विप्रस्य चाहुतिहोमं विज्ञातव्यं चतुष्टयम्
yena homaprasādena sākṣādbrahmamayo bhavet
viprasya cāhutihomaṃ vijñātavyaṃ catuṣṭayam
- 25
क्षत्रियस्य त्रयं देवि वैश्यस्य चाहुतिद्वयम्
शूद्रस्यैकाहुतिर्देवि मुक्तिश्चापि चतुर्विधा
kṣatriyasya trayaṃ devi vaiśyasya cāhutidvayam
śūdrasyaikāhutirdevi muktiścāpi caturvidhā
- 26
महामोक्षं ब्राह्मणस्य सायुज्यं क्षत्रियस्य च
सारूप्यं चोरुजातस्य सालोक्यं शूद्रजातिषु
mahāmokṣaṃ brāhmaṇasya sāyujyaṃ kṣatriyasya ca
sārūpyaṃ corujātasya sālokyaṃ śūdrajātiṣu
- 27
बाह्यकुण्डं बाह्यहोमे एव हि सुरवन्दिते
जातिभेदे कुण्डभेदं कुर्यात्साधकसत्तमः
bāhyakuṇḍaṃ bāhyahome eva hi suravandite
jātibhede kuṇḍabhedaṃ kuryātsādhakasattamaḥ
- 28
बाह्यहोमे काम्यसिद्धिर्भविष्यति न संशयः
ज्ञानहोमे मोक्षसिद्धिर्लभते नात्र संशयः
bāhyahome kāmyasiddhirbhaviṣyati na saṃśayaḥ
jñānahome mokṣasiddhirlabhate nātra saṃśayaḥ
- 29
इति ते कथितं कान्ते तन्त्राणां सारम् उत्तमम्
न वक्तव्यं पशोर् अग्रे शपथो मे त्वयि प्रिये
iti te kathitaṃ kānte tantrāṇāṃ sāram uttamam
na vaktavyaṃ paśor agre śapatho me tvayi priye
- 30
श्रीदेव्य् उवाच
मद्यपाने महापुण्यं सर्वतन्त्रे श्रुतं मया
जातिभेदं न कथितम् इदानीं तत्प्रकाशय
śrīdevy uvāca
madyapāne mahāpuṇyaṃ sarvatantre śrutaṃ mayā
jātibhedaṃ na kathitam idānīṃ tatprakāśaya

