69 shlokas
- 1
श्रीशिव उवाच
अथातः सम्प्रवक्ष्यामि त्रिपुरामन्त्रम् उत्तमम्
यस्य विज्ञानमात्रेण पुनर्जन्म न विद्यते
śrīśiva uvāca
athātaḥ sampravakṣyāmi tripurāmantram uttamam
yasya vijñānamātreṇa punarjanma na vidyate
- 2
त्रिपुरा त्रिविधा देवि बाला प्रोक्ता पुरा शिवे
तथैव भैरवी देवी नित्यातन्त्रे मयोदिता
इदानीं सुन्दरीं देवीं शृणु पार्वति सादरम्
tripurā trividhā devi bālā proktā purā śive
tathaiva bhairavī devī nityātantre mayoditā
idānīṃ sundarīṃ devīṃ śṛṇu pārvati sādaram
- 3
श्रीदेव्य् उवाच
महामन्त्रं श्रुतं नाथ वामकेश्वरयामले
प्रातःकृत्यादि देवेश आराधनक्रमं वद
śrīdevy uvāca
mahāmantraṃ śrutaṃ nātha vāmakeśvarayāmale
prātaḥkṛtyādi deveśa ārādhanakramaṃ vada
- 4
श्रीशिव उवाच
प्रातर् उत्थाय मन्त्रज्ञः सहस्रारे निजं गुरुम्
पूर्वोक्तध्यानम् उच्चार्य पूजयेद्बहुयत्नतः
śrīśiva uvāca
prātar utthāya mantrajñaḥ sahasrāre nijaṃ gurum
pūrvoktadhyānam uccārya pūjayedbahuyatnataḥ
- 5
तथा च श्रीगुरोर्ध्यानं गुप्तसाधनतन्त्रके
कथितं च मया पूर्वं मन्त्रं शृणु वरानने
tathā ca śrīgurordhyānaṃ guptasādhanatantrake
kathitaṃ ca mayā pūrvaṃ mantraṃ śṛṇu varānane
- 6
वाग्बीजं च महामायां विष्णुशक्तिं समुच्चरेत्
हसखफ्रें तथानन्दभैरवस्य मनुं ततः
vāgbījaṃ ca mahāmāyāṃ viṣṇuśaktiṃ samuccaret
hasakhaphreṃ tathānandabhairavasya manuṃ tataḥ
- 7
तस्य शक्तेर्मनुं पश्चात्ततश्चैवं हसौः स्मृतः
श्रीगुरोश्च तथा शक्तेर्मन्त्रम् एतत्सुरेश्वरि
tasya śaktermanuṃ paścāttataścaivaṃ hasauḥ smṛtaḥ
śrīgurośca tathā śaktermantram etatsureśvari
- 8
श्रीगुरोर् आनन्दनाथान्ते अथातः शक्तिर् ईरिता
वाग्बीजादीन्समुच्चार्य अमुकानन्दनाथ च
śrīguror ānandanāthānte athātaḥ śaktir īritā
vāgbījādīnsamuccārya amukānandanātha ca
- 9
श्रीपादुकां समुच्चार्य पूजयामि नमस्ततः
वाग्बीजं च शम्भुपत्नीं तदुत्तरे हरिप्रियाम्
śrīpādukāṃ samuccārya pūjayāmi namastataḥ
vāgbījaṃ ca śambhupatnīṃ taduttare haripriyām
- 10
भूतबीजं समुच्चार्य प्रवदेच्च तदात्मकम्
समर्पयामि देवेशि पूजाविधिर् इति प्रिये
bhūtabījaṃ samuccārya pravadecca tadātmakam
samarpayāmi deveśi pūjāvidhir iti priye
- 11
ततश्चाष्टाक्षरं मन्त्रम् अष्टोत्तरशतं जपेत्
जपं समर्पयित्वा तु नमेद् अञ्जलिना प्रिये
tataścāṣṭākṣaraṃ mantram aṣṭottaraśataṃ japet
japaṃ samarpayitvā tu named añjalinā priye
- 12
श्रीदेव्य् उवाच
स्तुतिं च कवचं नाथ श्रोतुम् इच्छामि साम्प्रतम्
श्रीगुरोः कवचं स्तोत्रं त्वया प्रोक्तं पुरा प्रभो
śrīdevy uvāca
stutiṃ ca kavacaṃ nātha śrotum icchāmi sāmpratam
śrīguroḥ kavacaṃ stotraṃ tvayā proktaṃ purā prabho
- 13
इदानीं स्त्रीगुरोः स्तोत्रं कवचं मयि कथ्यताम्
यस्य विज्ञानमात्रेण पुनर्जन्म न विद्यते
idānīṃ strīguroḥ stotraṃ kavacaṃ mayi kathyatām
yasya vijñānamātreṇa punarjanma na vidyate
- 14
श्रीशिव उवाच
शृणु देवि प्रवक्ष्यामि स्तोत्रं परमगोपनम्
यस्य श्रवणमात्रेण संसारान्मुच्यते नरः
śrīśiva uvāca
śṛṇu devi pravakṣyāmi stotraṃ paramagopanam
yasya śravaṇamātreṇa saṃsārānmucyate naraḥ
- 15
नमस्ते देवदेवेशि नमस्ते हरपूजिते
ब्रह्मविद्यास्वरूपायै तस्यै नित्यं नमो नमः
namaste devadeveśi namaste harapūjite
brahmavidyāsvarūpāyai tasyai nityaṃ namo namaḥ
- 16
अज्ञानतिमिरान्धस्य ज्ञानाञ्जनशलाकया
यया चक्षुर् उन्मीलितं तस्यै नित्यं नमो नमः
ajñānatimirāndhasya jñānāñjanaśalākayā
yayā cakṣur unmīlitaṃ tasyai nityaṃ namo namaḥ
- 17
भवबन्धनपारस्य तारिणी जननी परा
ज्ञानदा मोक्षदा नित्या तस्यै नित्यं नमो नमः
bhavabandhanapārasya tāriṇī jananī parā
jñānadā mokṣadā nityā tasyai nityaṃ namo namaḥ
- 18
श्रीनाथवामभागस्था सदा या सुरपूजिता
सदा विज्ञानदात्री च तस्यै नित्यं नमो नमः
śrīnāthavāmabhāgasthā sadā yā surapūjitā
sadā vijñānadātrī ca tasyai nityaṃ namo namaḥ
- 19
सहस्रारे महापद्मे सदानन्दस्वरूपिणी
महामोक्षप्रदा देवी तस्यै नित्यं नमो नमः
sahasrāre mahāpadme sadānandasvarūpiṇī
mahāmokṣapradā devī tasyai nityaṃ namo namaḥ
- 20
ब्रह्मविष्णुस्वरूपा च महारुद्रस्वरूपिणी
त्रिगुणात्मस्वरूपा च तस्यै नित्यं नमो नमः
brahmaviṣṇusvarūpā ca mahārudrasvarūpiṇī
triguṇātmasvarūpā ca tasyai nityaṃ namo namaḥ
- 21
चन्द्रसूर्याग्निरूपा च सदाघूर्णितलोचना
स्वनाथं च समालिङ्ग्य तस्यै नित्यं नमो नमः
candrasūryāgnirūpā ca sadāghūrṇitalocanā
svanāthaṃ ca samāliṅgya tasyai nityaṃ namo namaḥ
- 22
ब्रह्मविष्णुशिवत्वादिजीवन्मुक्तिप्रदायिनी
ज्ञानविज्ञानदात्री च तस्यै नित्यं नमो नमः
brahmaviṣṇuśivatvādijīvanmuktipradāyinī
jñānavijñānadātrī ca tasyai nityaṃ namo namaḥ
- 23
इदं स्तोत्रं महेशानि यः पठेद्भक्तिसंयुतः
स सिद्धिं लभते नित्यं सत्यं सत्यं न संशयः
idaṃ stotraṃ maheśāni yaḥ paṭhedbhaktisaṃyutaḥ
sa siddhiṃ labhate nityaṃ satyaṃ satyaṃ na saṃśayaḥ
- 24
प्रातःकाले पठेद्यस्तु गुरुपूजापुरःसरम्
स एव धन्यो लोके ऽस्मिन्देवीपुत्र इव क्षितौ
prātaḥkāle paṭhedyastu gurupūjāpuraḥsaram
sa eva dhanyo loke 'smindevīputra iva kṣitau
- 25
श्रीशङ्कर उवाच
स्तोत्रं समाप्तं देवेशि कवचं शृणु सादरम्
यस्य श्रवणमात्रेण वागीशसमतां व्रजेत्
śrīśaṅkara uvāca
stotraṃ samāptaṃ deveśi kavacaṃ śṛṇu sādaram
yasya śravaṇamātreṇa vāgīśasamatāṃ vrajet
- 26
स्त्रीगुरोः कवचस्यास्य सदाशिव ऋषिः स्मृतः
तदाख्या देवता प्रोक्ता चतुर्वर्गफलप्रदा
strīguroḥ kavacasyāsya sadāśiva ṛṣiḥ smṛtaḥ
tadākhyā devatā proktā caturvargaphalapradā
- 27
क्लीं बीजं मे शिरः पातु तद् आख्यातं ललाटकम्
क्लीं बीजं चक्षुषोः पातु सर्वाङ्गं मे सदावतु
klīṃ bījaṃ me śiraḥ pātu tad ākhyātaṃ lalāṭakam
klīṃ bījaṃ cakṣuṣoḥ pātu sarvāṅgaṃ me sadāvatu
- 28
ऐं बीजं मे मुखं पातु ह्रीं जङ्घां परिरक्षतु
श्रीं बीजं स्कन्धदेशं मे वाग्भवं मे भुजद्वयम्
aiṃ bījaṃ me mukhaṃ pātu hrīṃ jaṅghāṃ parirakṣatu
śrīṃ bījaṃ skandhadeśaṃ me vāgbhavaṃ me bhujadvayam
- 29
हकारं मे दक्षभुजं क्षकारं वामहस्तकम्
क्षमणौ तदधः पातु लकारं हृदयं मम
hakāraṃ me dakṣabhujaṃ kṣakāraṃ vāmahastakam
kṣamaṇau tadadhaḥ pātu lakāraṃ hṛdayaṃ mama
- 30
रकारं पृष्ठदेशं च रकारं दक्षपार्श्वकम्
जूंकारं वामपार्श्वे तु सकारं मेरुम् एव तु
rakāraṃ pṛṣṭhadeśaṃ ca rakāraṃ dakṣapārśvakam
jūṃkāraṃ vāmapārśve tu sakāraṃ merum eva tu

