22 shlokas
- 1
श्रीदेव्य् उवाच
वद ईशान सर्वज्ञ सर्वतत्त्वविदां वर
यत्त्वया कथितं नाथ मम सङ्गे विहारतः
śrīdevy uvāca
vada īśāna sarvajña sarvatattvavidāṃ vara
yattvayā kathitaṃ nātha mama saṅge vihārataḥ
- 2
कथं वा जायते पुत्रः शुक्रस्य कत्र संस्थितिः
वर्धमानं सदा लिङ्गं प्रवेशो वा कथं भवेत्
kathaṃ vā jāyate putraḥ śukrasya katra saṃsthitiḥ
vardhamānaṃ sadā liṅgaṃ praveśo vā kathaṃ bhavet
- 3
भीतियुक्ता ह्य् अहं नाथ त्राहि मां दुःखसङ्कटात्
bhītiyuktā hy ahaṃ nātha trāhi māṃ duḥkhasaṅkaṭāt
- 4
श्रीशङ्कर उवाच
मणिपूरं महापद्मं सुषुम्णामध्यसंस्थितम्
तस्य नालेन देवेशि नाभिपद्मं मनोहरम्
śrīśaṅkara uvāca
maṇipūraṃ mahāpadmaṃ suṣumṇāmadhyasaṃsthitam
tasya nālena deveśi nābhipadmaṃ manoharam
- 5
वक्रत्रयसमायुक्तं सदा शुक्रविभूषितम्
ऊर्ध्वं नालं सहस्रारे अतः शुक्रविभूषितम्
vakratrayasamāyuktaṃ sadā śukravibhūṣitam
ūrdhvaṃ nālaṃ sahasrāre ataḥ śukravibhūṣitam
- 6
तस्माद् एव स्तनद्वन्द्वं वर्धमानं दिने दिने
tasmād eva stanadvandvaṃ vardhamānaṃ dine dine
- 7
मध्यनालं सुषुम्णान्तं वृन्ताकारं सुशीतलम्
आ योन्यग्रम् अधोनालं सदानन्दमयि शिवे
madhyanālaṃ suṣumṇāntaṃ vṛntākāraṃ suśītalam
ā yonyagram adhonālaṃ sadānandamayi śive
- 8
शृणु चार्वङ्गि सुभगे तन्मध्ये लिङ्गताडनात्
यद्रूपं परमानन्दं तन्नास्ति भुवनत्रये
śṛṇu cārvaṅgi subhage tanmadhye liṅgatāḍanāt
yadrūpaṃ paramānandaṃ tannāsti bhuvanatraye
- 9
नाभिपद्मं तु यद्रूपं तच्छृणुष्व समाहितः
बिन्दुस्थानं मध्यदेशे सदा पद्मविराजितम्
nābhipadmaṃ tu yadrūpaṃ tacchṛṇuṣva samāhitaḥ
bindusthānaṃ madhyadeśe sadā padmavirājitam
- 10
बाह्यदेशे चाष्टपत्रं चतुरस्रं तु तद्बहिः
चतुर्द्वारसमायुक्तं सुवर्णाभं सवृत्तकम्
bāhyadeśe cāṣṭapatraṃ caturasraṃ tu tadbahiḥ
caturdvārasamāyuktaṃ suvarṇābhaṃ savṛttakam
- 11
तत्पत्रेण भवेत्पुष्पं वृन्तयुक्तं त्रिपत्त्रकम्
प्रफुल्ले तु त्रिपत्रारे बाह्ये रुधिरदर्शनम्
tatpatreṇa bhavetpuṣpaṃ vṛntayuktaṃ tripattrakam
praphulle tu tripatrāre bāhye rudhiradarśanam
- 12
एतन्मध्ये महेशानि यदि स्याल्लिङ्गताडनम्
पद्ममध्ये गते शुक्रे संततिस्तेन जायते
etanmadhye maheśāni yadi syālliṅgatāḍanam
padmamadhye gate śukre saṃtatistena jāyate
- 13
पुरुषस्य तु यच्छुक्रं शक्ते रक्ताधिको भवेत्
तदा कन्या भवेद्देवि विपरीतः पुमान्भवेत्
puruṣasya tu yacchukraṃ śakte raktādhiko bhavet
tadā kanyā bhaveddevi viparītaḥ pumānbhavet
- 14
उभयोस्तुल्यशुक्रेण क्लीबं भवति निश्चितम्
ubhayostulyaśukreṇa klībaṃ bhavati niścitam
- 15
शृणु चार्वङ्गि सुभगे पुष्पमाहात्म्यम् उत्तमम्
मध्ये तच्छुक्रसंयोगे वर्धते तद्दिने दिने
एवं दिङ्माससम्प्राप्ते तत्पुष्पं वृन्तसंयुतम्
śṛṇu cārvaṅgi subhage puṣpamāhātmyam uttamam
madhye tacchukrasaṃyoge vardhate taddine dine
evaṃ diṅmāsasamprāpte tatpuṣpaṃ vṛntasaṃyutam
- 16
गलिते परमेशानि व्यक्तो भवति संततिः
galite parameśāni vyakto bhavati saṃtatiḥ
- 17
श्रीदेव्य् उवाच
किंचिद्रोगादिसम्भूते कृमिकीटादिसम्भवे
तस्माज्जीवं प्रणश्यन्ति सा नारी जीव्यते कथम्
śrīdevy uvāca
kiṃcidrogādisambhūte kṛmikīṭādisambhave
tasmājjīvaṃ praṇaśyanti sā nārī jīvyate katham
- 18
श्रीशङ्कर उवाच
अस्य पुष्पस्य माहात्म्यं किं वक्तुं शक्यते मया
बिन्दुस्थानं सहस्रं तु पुष्पमध्ये प्रियंवदे
śrīśaṅkara uvāca
asya puṣpasya māhātmyaṃ kiṃ vaktuṃ śakyate mayā
bindusthānaṃ sahasraṃ tu puṣpamadhye priyaṃvade
- 19
बुद्बुदा यत्र तिष्ठन्ति तत्रैव संततिर्भवेत्
एवं क्रमेण देवेशि सहस्रं संततिर्यदि
वर्धमानं महापुष्पं पीडा किंचिन्न जायते
budbudā yatra tiṣṭhanti tatraiva saṃtatirbhavet
evaṃ krameṇa deveśi sahasraṃ saṃtatiryadi
vardhamānaṃ mahāpuṣpaṃ pīḍā kiṃcinna jāyate
- 20
मया सार्धं महेशानि विहारं कुरु यत्नतः
विहारे यो भवेत्पुत्रो गणेशः स च कीर्तितः
mayā sārdhaṃ maheśāni vihāraṃ kuru yatnataḥ
vihāre yo bhavetputro gaṇeśaḥ sa ca kīrtitaḥ
- 21
अपरे परमेशानि तव पुत्रप्रसादतः
पृथिव्यां जायते सृष्टिर्निर्विघ्नेन यथोचितम्
apare parameśāni tava putraprasādataḥ
pṛthivyāṃ jāyate sṛṣṭirnirvighnena yathocitam
- 22
एतच्छ्रुत्वा ततो देवि मदनानलविह्वला
शिवेनालिङ्गिता देवी शिवाकारेण वै तदा
etacchrutvā tato devi madanānalavihvalā
śivenāliṅgitā devī śivākāreṇa vai tadā

