25 shlokas
- 1
श्रीचण्डिकोवाच
शृणु नाथ परानन्द परापरजगत्पते
इदानीं श्रोतुम् इच्छामि मालायाः कीदृशो जपः
का माला कस्य देवस्य तद्वदस्व समाहितः
śrīcaṇḍikovāca
śṛṇu nātha parānanda parāparajagatpate
idānīṃ śrotum icchāmi mālāyāḥ kīdṛśo japaḥ
kā mālā kasya devasya tadvadasva samāhitaḥ
- 2
श्रीशंकर उवाच
वैष्णवे तुलसीमाला गजदन्तैर्गणेश्वरे
कालिकाया महामन्त्रं जपेद्रुद्राक्षमालया
śrīśaṃkara uvāca
vaiṣṇave tulasīmālā gajadantairgaṇeśvare
kālikāyā mahāmantraṃ japedrudrākṣamālayā
- 3
तारायाश्च जपेन्मन्त्री महाशङ्खाख्यमालया
महाशङ्खाख्यमालायां सर्वां विद्यां जपेत्सुधीः
tārāyāśca japenmantrī mahāśaṅkhākhyamālayā
mahāśaṅkhākhyamālāyāṃ sarvāṃ vidyāṃ japetsudhīḥ
- 4
अकस्माद्वै महासिद्धिर्महाशङ्खाख्यमालया
तथैव सकला विद्या महाशङ्खे वसेत्सदा
akasmādvai mahāsiddhirmahāśaṅkhākhyamālayā
tathaiva sakalā vidyā mahāśaṅkhe vasetsadā
- 5
स्फाटिकी सर्वदेवस्य प्रवालैः सकलां जपेत्
स्वर्णरौप्यसमुद्भूतां सर्वदेवेषु योजिताम्
sphāṭikī sarvadevasya pravālaiḥ sakalāṃ japet
svarṇaraupyasamudbhūtāṃ sarvadeveṣu yojitām
- 6
कालिकायाश्च सुन्दर्या रुद्राक्षैः प्रजपेत्सदा
भैरव्याः प्रजपेन्मन्त्री शङ्खपद्माख्यया प्रिये
kālikāyāśca sundaryā rudrākṣaiḥ prajapetsadā
bhairavyāḥ prajapenmantrī śaṅkhapadmākhyayā priye
- 7
श्मशाने धुस्तुरैर्मालां जपेद्धूमावतीविधौ
इति ते कथितं कान्ते महामालाविनिर्णयम्
śmaśāne dhusturairmālāṃ japeddhūmāvatīvidhau
iti te kathitaṃ kānte mahāmālāvinirṇayam
- 8
अथ ग्रन्थिं प्रवक्ष्यामि शृणु कान्ते समाहिता
येन माला सुसिद्धा च नॄणां सर्वफलप्रदा
atha granthiṃ pravakṣyāmi śṛṇu kānte samāhitā
yena mālā susiddhā ca nṝṇāṃ sarvaphalapradā
- 9
मालायाश्चाधिका कान्ते ग्रन्थिश्चैका फलप्रदा
एकपञ्चाशिकायां च मालायां परमेश्वरि
mālāyāścādhikā kānte granthiścaikā phalapradā
ekapañcāśikāyāṃ ca mālāyāṃ parameśvari
- 10
ब्रह्मग्रन्थियुतां मालां सार्धद्वितयवेष्टिताम्
सपादवेष्टनं देवि नागपाशं मनोहरम्
brahmagranthiyutāṃ mālāṃ sārdhadvitayaveṣṭitām
sapādaveṣṭanaṃ devi nāgapāśaṃ manoharam
- 11
सर्वदेवस्य मालायां सर्वत्र परमेश्वरि
ब्रह्मग्रन्थिं विधायेत्थं नागपाशम् अथापि वा
sarvadevasya mālāyāṃ sarvatra parameśvari
brahmagranthiṃ vidhāyetthaṃ nāgapāśam athāpi vā
- 12
मालायां त्व् अधिकां देवि चैकां ग्रन्थिं प्रदापयेत्
मूलेन ग्रथितं कुर्यात्प्रणवेनाथवा प्रिये
mālāyāṃ tv adhikāṃ devi caikāṃ granthiṃ pradāpayet
mūlena grathitaṃ kuryātpraṇavenāthavā priye
- 13
ग्रन्थिमध्ये च गुटिकां कुर्याद् अतिमनोहराम्
सूत्रद्वयं महेशानि मिलनं कारयेत्ततः
granthimadhye ca guṭikāṃ kuryād atimanoharām
sūtradvayaṃ maheśāni milanaṃ kārayettataḥ
- 14
मेरुं च ग्रथनं कुर्यात्तदूर्ध्वे ग्रन्थिसंयुतम्
एवं मालां विनिर्माय गोपयेद्बहुयत्नतः
meruṃ ca grathanaṃ kuryāttadūrdhve granthisaṃyutam
evaṃ mālāṃ vinirmāya gopayedbahuyatnataḥ
- 15
कम्पनं धूननं शब्दं नैव तत्र प्रकाशयेत्
करभ्रष्टं तथा छिन्नं महाविघ्नस्य कारणम्
kampanaṃ dhūnanaṃ śabdaṃ naiva tatra prakāśayet
karabhraṣṭaṃ tathā chinnaṃ mahāvighnasya kāraṇam
- 16
कम्पने सिद्धिहानिः स्याद्धूननं बहुदुःखदम्
शब्दे जाते भवेद्रोगः करभ्रष्टाद्विनाशकृत्
kampane siddhihāniḥ syāddhūnanaṃ bahuduḥkhadam
śabde jāte bhavedrogaḥ karabhraṣṭādvināśakṛt
- 17
छिन्नसूत्रे भवेन्मृत्युस्तस्माद्यत्नपरो भवेत्
एवं ज्ञात्वा महेशानि शान्तिस्वस्त्ययनं चरेत्
chinnasūtre bhavenmṛtyustasmādyatnaparo bhavet
evaṃ jñātvā maheśāni śāntisvastyayanaṃ caret
- 18
कम्पने यो जपेन्मन्त्रं यदि सिद्धिं प्रयच्छति
यत्नेन गुरुम् आनीय द्वाविंशदुपचारतः
kampane yo japenmantraṃ yadi siddhiṃ prayacchati
yatnena gurum ānīya dvāviṃśadupacārataḥ
- 19
कुम्भस्थापनकं कृत्वा पूजयेद् इष्टदेवताम्
ततो हुनेद्बिल्वपत्त्रैर् अष्टोत्तरशताहुतिम्
kumbhasthāpanakaṃ kṛtvā pūjayed iṣṭadevatām
tato hunedbilvapattrair aṣṭottaraśatāhutim
- 20
त्रिमध्वक्तेन विधिना धूनने ऽपि च सुन्दरि
सशब्दे जपने चण्डि ह्य् एवं कुर्याद्विचक्षणः
trimadhvaktena vidhinā dhūnane 'pi ca sundari
saśabde japane caṇḍi hy evaṃ kuryādvicakṣaṇaḥ
- 21
करभ्रष्टे तथा छिन्ने पुरश्चरणम् आचरेत्
जपाद्यन्ते यजेद्देवीं षोडशैर् उपचारकैः
karabhraṣṭe tathā chinne puraścaraṇam ācaret
japādyante yajeddevīṃ ṣoḍaśair upacārakaiḥ
- 22
प्रत्यहं प्रजपेन्मन्त्रं प्रत्यहं बलिदानकम्
पञ्चाङ्गस्य प्रमाणेन सर्वकर्म समापयेत्
pratyahaṃ prajapenmantraṃ pratyahaṃ balidānakam
pañcāṅgasya pramāṇena sarvakarma samāpayet
- 23
दरिद्रः परमेशानि यदि विघ्नपरायणः
आद्यन्ते महतीं पूजां दिक्सहस्रं जपेन्मनुम्
daridraḥ parameśāni yadi vighnaparāyaṇaḥ
ādyante mahatīṃ pūjāṃ diksahasraṃ japenmanum
- 24
सहस्रैकं हुनेत्पश्चात्सर्वविघ्नस्य शान्तये
कुम्भतोयैः स्नापयित्वा पुनर्मालां प्रदापयेत्
sahasraikaṃ hunetpaścātsarvavighnasya śāntaye
kumbhatoyaiḥ snāpayitvā punarmālāṃ pradāpayet
- 25
अनेनैव विधानेन विघ्नजालैर्न लिप्यते
anenaiva vidhānena vighnajālairna lipyate

