43 shlokas
- 1
श्रीचण्डिकोवाच
पारदं भस्मनिर्माणं केनोपायेन शंकर
तद् अहं श्रोतुम् इच्छामि यदि ते ऽस्ति कृपा मयि
śrīcaṇḍikovāca
pāradaṃ bhasmanirmāṇaṃ kenopāyena śaṃkara
tad ahaṃ śrotum icchāmi yadi te 'sti kṛpā mayi
- 2
श्रीशंकर उवाच
पारदे भस्मनिर्माणे नानाविघ्नानि पार्वति
अत एव हि तत्रादौ शान्तिं कुर्याद्द्विजोत्तमः
śrīśaṃkara uvāca
pārade bhasmanirmāṇe nānāvighnāni pārvati
ata eva hi tatrādau śāntiṃ kuryāddvijottamaḥ
- 3
वरयेत्कर्मकर्तारं वक्ष्यमाणविधानतः
पूजयेत्षोडशलिङ्गं पार्थिवं पर्वतात्मजे
varayetkarmakartāraṃ vakṣyamāṇavidhānataḥ
pūjayetṣoḍaśaliṅgaṃ pārthivaṃ parvatātmaje
- 4
षोडशेनोपचारेण तोडलोक्तविधानतः
भोगयोग्यं प्रदातव्यं मधुपर्कं सुरेश्वरि
ṣoḍaśenopacāreṇa toḍaloktavidhānataḥ
bhogayogyaṃ pradātavyaṃ madhuparkaṃ sureśvari
- 5
पञ्चामृतेन देवेशं स्नापयेच्छुद्धवारिणा
पुरुषस्य यथायोग्यं युग्मवस्त्रं निवेदयेत्
pañcāmṛtena deveśaṃ snāpayecchuddhavāriṇā
puruṣasya yathāyogyaṃ yugmavastraṃ nivedayet
- 6
चतुरङ्गुलिविस्तारं रौप्यनिर्माणपीठकम्
अलंकारं यथायोग्यं पुरुषस्य निवेदयेत्
caturaṅgulivistāraṃ raupyanirmāṇapīṭhakam
alaṃkāraṃ yathāyogyaṃ puruṣasya nivedayet
- 7
अलक्तकयुतं वापि दद्यान्मलयजं शिवे
षडङ्गधूपं देवेशि प्रदद्याच्च पुनः पुनः
alaktakayutaṃ vāpi dadyānmalayajaṃ śive
ṣaḍaṅgadhūpaṃ deveśi pradadyācca punaḥ punaḥ
- 8
घृतयुक्तं तथा दीपं दद्यात्कल्याणहेतवे
नैवेद्यं विविधं रम्यं नानाफलसमन्वितम्
ghṛtayuktaṃ tathā dīpaṃ dadyātkalyāṇahetave
naivedyaṃ vividhaṃ ramyaṃ nānāphalasamanvitam
- 9
शर्करासंयुतं कृत्वा पायसं विनिवेदयेत्
दद्यात्तोयं महेशानि विजयासंयुतं प्रिये
śarkarāsaṃyutaṃ kṛtvā pāyasaṃ vinivedayet
dadyāttoyaṃ maheśāni vijayāsaṃyutaṃ priye
- 10
षडक्षरं महामन्त्रं गजान्तकसहस्रकम्
प्रजपेत्साधकश्रेष्ठस्ततः सिद्धो भवेद्ध्रुवम्
ṣaḍakṣaraṃ mahāmantraṃ gajāntakasahasrakam
prajapetsādhakaśreṣṭhastataḥ siddho bhaveddhruvam
- 11
अथवा परमेशानि धनदां धनदायिनीम्
पूजयेद्बहुयत्नेन षोडशेनोपचारतः
athavā parameśāni dhanadāṃ dhanadāyinīm
pūjayedbahuyatnena ṣoḍaśenopacārataḥ
- 12
द्वादशाह्वं यजेद्धीमान्दिक्सहस्रं ततो जपेत्
तद्दशांशं महेशानि होमं कुर्याद्विचक्षणः
dvādaśāhvaṃ yajeddhīmāndiksahasraṃ tato japet
taddaśāṃśaṃ maheśāni homaṃ kuryādvicakṣaṇaḥ
- 13
होमकर्माद्यशक्तश्चेद्द्विगुणं जपम् आचरेत्
यदि प्रीता भवेत्सा हि तदा किं वा न सिध्यति
homakarmādyaśaktaśceddviguṇaṃ japam ācaret
yadi prītā bhavetsā hi tadā kiṃ vā na sidhyati
- 14
प्रत्यहं परमेशानि कुबेरो दीयते वसु
भस्मनिर्माणकं देवि विचित्रं तस्य किं शिवे
pratyahaṃ parameśāni kubero dīyate vasu
bhasmanirmāṇakaṃ devi vicitraṃ tasya kiṃ śive
- 15
गुरवे दक्षिणां दद्याद्यथाविभवविस्तरैः
ततः सिद्धो भवेन्मन्त्री नात्र कार्या विचारणा
gurave dakṣiṇāṃ dadyādyathāvibhavavistaraiḥ
tataḥ siddho bhavenmantrī nātra kāryā vicāraṇā
- 16
श्रीचण्डिकोवाच
विधानं देवदेवेश भस्मनिर्माणकर्मणि
सकृत्कृते येन रूपे भस्मसाज्जायते विभो
śrīcaṇḍikovāca
vidhānaṃ devadeveśa bhasmanirmāṇakarmaṇi
sakṛtkṛte yena rūpe bhasmasājjāyate vibho
- 17
श्रीशंकर उवाच
आनीय पारदं देवि स्थापयेत्प्रस्तरोपरि
तस्योपरि जपेन्मन्त्रं सर्ववन्द्यनवात्मकम्
śrīśaṃkara uvāca
ānīya pāradaṃ devi sthāpayetprastaropari
tasyopari japenmantraṃ sarvavandyanavātmakam
- 18
साष्टसहस्रं देवेशि प्रजपेत्साधकाग्रणीः
स्वयंभुपुष्पसंयुक्ते वस्त्रे चारुणसंनिभे
sāṣṭasahasraṃ deveśi prajapetsādhakāgraṇīḥ
svayaṃbhupuṣpasaṃyukte vastre cāruṇasaṃnibhe
- 19
संस्थाप्य पारदं देवि मृत्पात्रयुगले शिवे
पुष्पयुक्तेन सूत्रेण बध्नीयाद्बहुयत्नतः
saṃsthāpya pāradaṃ devi mṛtpātrayugale śive
puṣpayuktena sūtreṇa badhnīyādbahuyatnataḥ
- 20
मुक्तिधाराजलेनैव धान्यस्य परमेश्वरि
लेपयेद्बहुयत्नेन रौद्रे शुष्कं च कारयेत्
muktidhārājalenaiva dhānyasya parameśvari
lepayedbahuyatnena raudre śuṣkaṃ ca kārayet
- 21
पुनश्च लेपयेद्धीमान्ततो वह्नौ विनिक्षिपेत्
अष्टमीनवमीरात्रौ क्षिपेन्नैव सुरेश्वरि
punaśca lepayeddhīmāntato vahnau vinikṣipet
aṣṭamīnavamīrātrau kṣipennaiva sureśvari
- 22
अथवा परमेशानि मृत्पात्रे स्थापयेद्रसम्
वल्लीरसेन तद्द्रव्यं शोधयेद्बहुयत्नतः
athavā parameśāni mṛtpātre sthāpayedrasam
vallīrasena taddravyaṃ śodhayedbahuyatnataḥ
- 23
घृतनारीरसेनैव तथैव शोधनं चरेत्
एवं कृते तु गुटिका यदि स्याद्दृढबन्धनम्
ghṛtanārīrasenaiva tathaiva śodhanaṃ caret
evaṃ kṛte tu guṭikā yadi syāddṛḍhabandhanam
- 24
धुस्तुरं च समानीय मध्ये शून्यं च कारयेत्
कृष्णाख्यतुलसीयोगे तथा घृतकुमारिका
dhusturaṃ ca samānīya madhye śūnyaṃ ca kārayet
kṛṣṇākhyatulasīyoge tathā ghṛtakumārikā
- 25
एवं कृते वह्नियोगे भस्मसाज्जायते किल
भस्मयोगे भवेत्स्वर्णं धनदायाः प्रसादतः
evaṃ kṛte vahniyoge bhasmasājjāyate kila
bhasmayoge bhavetsvarṇaṃ dhanadāyāḥ prasādataḥ
- 26
विवर्णं जायते द्रव्यं यदि पूजां न चाचरेत्
vivarṇaṃ jāyate dravyaṃ yadi pūjāṃ na cācaret
- 27
श्रीचण्डिकोवाच
स्वयम्भु कीदृशं नाथ कुण्डगोलं तु कीदृशम्
स्वपुष्पं कीदृशं नाथ वज्रपुष्पं तु कीदृशम्
सर्वकालोद्भवं नाथ कीदृशं वद शंकर
śrīcaṇḍikovāca
svayambhu kīdṛśaṃ nātha kuṇḍagolaṃ tu kīdṛśam
svapuṣpaṃ kīdṛśaṃ nātha vajrapuṣpaṃ tu kīdṛśam
sarvakālodbhavaṃ nātha kīdṛśaṃ vada śaṃkara
- 28
श्रीशंकर उवाच
विवाहरहिता कन्या प्रथमं पुष्पसंयुता
तच्छोणितं महेशानि स्वयम्भु नात्र संशयः
śrīśaṃkara uvāca
vivāharahitā kanyā prathamaṃ puṣpasaṃyutā
tacchoṇitaṃ maheśāni svayambhu nātra saṃśayaḥ
- 29
भर्तरि विद्यमाने तु या कन्या चान्यजा शिवे
तदुद्भवं कुण्डपुष्पं सर्वकार्यार्थसाधकम्
bhartari vidyamāne tu yā kanyā cānyajā śive
tadudbhavaṃ kuṇḍapuṣpaṃ sarvakāryārthasādhakam
- 30
मृते भर्तरि देवेशि या कन्या अन्यजा शिवे
तदुद्भवं गोलपुष्पं देववश्यकरं परम्
mṛte bhartari deveśi yā kanyā anyajā śive
tadudbhavaṃ golapuṣpaṃ devavaśyakaraṃ param

