45 shlokas
- 1
श्रीचण्डिकोवाच
प्रासादं मण्डपं वापि यदि देव्यै निवेदयेत्
विधानं तस्य माहात्म्यं वद मे परमेश्वर
śrīcaṇḍikovāca
prāsādaṃ maṇḍapaṃ vāpi yadi devyai nivedayet
vidhānaṃ tasya māhātmyaṃ vada me parameśvara
- 2
कूपादिकं महादेव यदि देव्यै निवेदयेत्
विधानं तस्य माहात्म्यं वद मे परमेश्वर
kūpādikaṃ mahādeva yadi devyai nivedayet
vidhānaṃ tasya māhātmyaṃ vada me parameśvara
- 3
श्रीशङ्कर उवाच
शृणु देवि प्रवक्ष्यामि येन प्रासादम् उत्सृजेत्
तस्यैव पश्चिमे भागे वेदिकां चतुरस्रकाम्
śrīśaṅkara uvāca
śṛṇu devi pravakṣyāmi yena prāsādam utsṛjet
tasyaiva paścime bhāge vedikāṃ caturasrakām
- 4
प्रकुर्याद्बहुयत्नेन वस्त्रेण वेष्टनं चरेत्
तदभावे महेशानि तृणेनैनं च वेष्टयेत्
prakuryādbahuyatnena vastreṇa veṣṭanaṃ caret
tadabhāve maheśāni tṛṇenainaṃ ca veṣṭayet
- 5
कुम्भयुग्मं स्थापयित्वा क्षौमवस्त्रेण वेष्टयेत्
युग्मं युग्मं क्षौमवस्त्रं कुम्भयुग्मे नियोजयेत्
kumbhayugmaṃ sthāpayitvā kṣaumavastreṇa veṣṭayet
yugmaṃ yugmaṃ kṣaumavastraṃ kumbhayugme niyojayet
- 6
ईशकुम्भे यजेद्देवीम् आग्नेयाम् अग्निदैवतम्
चतुःषष्ट्युपचारेण पूजयेद् इष्टदेवताम्
īśakumbhe yajeddevīm āgneyām agnidaivatam
catuḥṣaṣṭyupacāreṇa pūjayed iṣṭadevatām
- 7
अभावे पूजयेद्देवीं तदर्धेन प्रयत्नतः
अथवा परमेशानि यथाशक्त्युपचारतः
abhāve pūjayeddevīṃ tadardhena prayatnataḥ
athavā parameśāni yathāśaktyupacārataḥ
- 8
पूजयेद्बहुयत्नेन ततो होमादिकं चरेत्
आगमोक्तेन विधिना कुर्यात्तत्र कुशण्डिकाम्
pūjayedbahuyatnena tato homādikaṃ caret
āgamoktena vidhinā kuryāttatra kuśaṇḍikām
- 9
त्रिमध्वक्तेन देवेशि बिल्वपत्रेण होमयेत्
सहस्रं होमयेन्मन्त्री शतन्यूनं न कारयेत्
trimadhvaktena deveśi bilvapatreṇa homayet
sahasraṃ homayenmantrī śatanyūnaṃ na kārayet
- 10
पूर्णाहुतिं ततो दत्त्वा ततो वाक्यं समाचरेत्
अद्येत्यादि समुच्चार्यं सौरमासं समुच्चरेत्
pūrṇāhutiṃ tato dattvā tato vākyaṃ samācaret
adyetyādi samuccāryaṃ sauramāsaṃ samuccaret
- 11
तिथिगोत्रं चामुको ऽहं धर्मार्थकामम् एव वा
प्राप्तये परमेशानि ततो मूलं समुच्चरेत्
tithigotraṃ cāmuko 'haṃ dharmārthakāmam eva vā
prāptaye parameśāni tato mūlaṃ samuccaret
- 12
देवतायै नमः पश्चाद्दक्षिणां दापयेद्गुरौ
कुम्भतोयेन देवेशि स्नापयेद्यजमानकम्
devatāyai namaḥ paścāddakṣiṇāṃ dāpayedgurau
kumbhatoyena deveśi snāpayedyajamānakam
- 13
सुरास्त्वादीन्समुच्चार्य शान्तिं कुर्यात्ततो गुरुः
सर्वादौ गुरुदेवस्य वरणं कारयेत्सुधीः
surāstvādīnsamuccārya śāntiṃ kuryāttato guruḥ
sarvādau gurudevasya varaṇaṃ kārayetsudhīḥ
- 14
सुवर्णं चम्पकाकारं कर्णयुग्मे निवेदयेत्
चतुष्कोणयुतं स्वर्णं ग्रीवायां परियोजयेत्
suvarṇaṃ campakākāraṃ karṇayugme nivedayet
catuṣkoṇayutaṃ svarṇaṃ grīvāyāṃ pariyojayet
- 15
उष्णीषं च ततो दद्यात्कण्ठे मालां नियोजयेत्
ताडयुग्मं ततो बाहौ वलयं मणिबन्धके
uṣṇīṣaṃ ca tato dadyātkaṇṭhe mālāṃ niyojayet
tāḍayugmaṃ tato bāhau valayaṃ maṇibandhake
- 16
अङ्गुल्याम् अङ्गुरी देया दिव्यवस्त्रं नियोजयेत्
एवं हि वरणं कृत्वा कर्मयोग्यं विचिन्तयेत्
aṅgulyām aṅgurī deyā divyavastraṃ niyojayet
evaṃ hi varaṇaṃ kṛtvā karmayogyaṃ vicintayet
- 17
गुरुं वा गुरुपुत्रं वा वरयेद्यत्नतः सुधीः
सदस्यं न हि कर्तव्यं तन्त्रधारं न तत्र वै
guruṃ vā guruputraṃ vā varayedyatnataḥ sudhīḥ
sadasyaṃ na hi kartavyaṃ tantradhāraṃ na tatra vai
- 18
ब्रह्माणं न हि कर्तव्यं केवलं वरयेद्गुरुम्
गुरोर्भृत्यो महेशानि भैरवो नात्र संशयः
brahmāṇaṃ na hi kartavyaṃ kevalaṃ varayedgurum
gurorbhṛtyo maheśāni bhairavo nātra saṃśayaḥ
- 19
स्वीयेन परिधानेन वाससा तोषयेत्स्वयम्
स्वयं होता भवेद्विप्रो गुरोर् आज्ञानुसारतः
svīyena paridhānena vāsasā toṣayetsvayam
svayaṃ hotā bhavedvipro guror ājñānusārataḥ
- 20
मायाबीजं समुच्चार्य आधारशक्तये नमः
अनेन मनुना देवि वेदिसंस्कारम् आचरेत्
māyābījaṃ samuccārya ādhāraśaktaye namaḥ
anena manunā devi vedisaṃskāram ācaret
- 21
भूरसीत्यादिमन्त्रेण घटयुग्माभिमन्त्रितम्
अस्त्रान्तेनैव मूलेन उष्णीषं परियोजयेत्
bhūrasītyādimantreṇa ghaṭayugmābhimantritam
astrāntenaiva mūlena uṣṇīṣaṃ pariyojayet
- 22
वेदोक्तं चैव स्मृत्युक्तं मन्त्रं न योजयेत्सुधीः
एवं कूपादिदानेषु कर्तव्यं परमेश्वरि
vedoktaṃ caiva smṛtyuktaṃ mantraṃ na yojayetsudhīḥ
evaṃ kūpādidāneṣu kartavyaṃ parameśvari
- 23
अन्यत्सर्वं समानं हि प्रासादादिस्थले पुनः
कूपादियोजनं कुर्यात्यष्टिप्रोतनम् आचरेत्
anyatsarvaṃ samānaṃ hi prāsādādisthale punaḥ
kūpādiyojanaṃ kuryātyaṣṭiprotanam ācaret
- 24
चतुर्हस्तप्रमाणं च मध्यभागे तु प्रोतनम्
मूलमन्त्रं समुच्चार्य ततो वह्निवधूं न्यसेत्
caturhastapramāṇaṃ ca madhyabhāge tu protanam
mūlamantraṃ samuccārya tato vahnivadhūṃ nyaset
- 25
ततो यष्टिं समुच्चार्य पोतयामि वदेत्सुधीः
तत्र संतरणं धेनुं नैव कुर्याद्विचक्षणः
tato yaṣṭiṃ samuccārya potayāmi vadetsudhīḥ
tatra saṃtaraṇaṃ dhenuṃ naiva kuryādvicakṣaṇaḥ
- 26
धेनुसंतरणेनैव फलहानिः प्रजायते
स्वर्णं रूप्यं प्रवालं च दक्षिणां परियोजयेत्
dhenusaṃtaraṇenaiva phalahāniḥ prajāyate
svarṇaṃ rūpyaṃ pravālaṃ ca dakṣiṇāṃ pariyojayet
- 27
स्नापयित्वा कुम्भतोयैः शान्तिं कुर्यात्ततो गुरुः
snāpayitvā kumbhatoyaiḥ śāntiṃ kuryāttato guruḥ
- 28
अनेनैव विधानेन कूपाद्युत्सर्गम् आचरेत्
वापीकूपतडागादि ह्य् अनेनोत्सर्गम् आचरेत्
anenaiva vidhānena kūpādyutsargam ācaret
vāpīkūpataḍāgādi hy anenotsargam ācaret
- 29
दीर्घिकां च पुष्करिणीं ह्य् अनेनैव जलाशयम्
उत्सृज्य परया भक्त्या महादेव्यै प्रयत्नतः
dīrghikāṃ ca puṣkariṇīṃ hy anenaiva jalāśayam
utsṛjya parayā bhaktyā mahādevyai prayatnataḥ
- 30
पुरुषं सप्तमं कान्ते पितृवंशे च मातरि
सप्तमं पुरुषं कान्ते मातृवंशे समं प्रिये
puruṣaṃ saptamaṃ kānte pitṛvaṃśe ca mātari
saptamaṃ puruṣaṃ kānte mātṛvaṃśe samaṃ priye

