23 shlokas
- 1
कैलासशिखरे रम्ये नानारत्नोपशोभिते
पप्रच्छ परया भक्त्या भैरवं परमेश्वरम्
kailāsaśikhare ramye nānāratnopaśobhite
papraccha parayā bhaktyā bhairavaṃ parameśvaram
- 2
श्रीचण्डिकोवाच
त्रिपुरापूजनं नाथ स्वर्णरत्नैर्विशेषतः
कलिकाले स्वर्णरूप्यं गुप्तभावं तथा मणिम्
śrīcaṇḍikovāca
tripurāpūjanaṃ nātha svarṇaratnairviśeṣataḥ
kalikāle svarṇarūpyaṃ guptabhāvaṃ tathā maṇim
- 3
केनोपायेन देवेश स्वर्णरूप्यादि लभ्यते
तद्वदस्व विशेषेण यथा रत्नादिकं भवेत्
kenopāyena deveśa svarṇarūpyādi labhyate
tadvadasva viśeṣeṇa yathā ratnādikaṃ bhavet
- 4
यन्नोक्तं सर्वतन्त्रेषु तद्वदस्व दयानिधे
yannoktaṃ sarvatantreṣu tadvadasva dayānidhe
- 5
श्रीशङ्कर उवाच
शृणु देवि प्रवक्ष्यामि यथा रत्नादिकं भवेत्
मत्तेजसा पारदेन किं रत्नं न हि लभ्यते
śrīśaṅkara uvāca
śṛṇu devi pravakṣyāmi yathā ratnādikaṃ bhavet
mattejasā pāradena kiṃ ratnaṃ na hi labhyate
- 6
तथा सामुद्रकेणैव सुशुभ्रलवणेन च
सम्बलस्य प्रकारं हि शृणु देवि प्रयत्नतः
tathā sāmudrakeṇaiva suśubhralavaṇena ca
sambalasya prakāraṃ hi śṛṇu devi prayatnataḥ
- 7
चीनतन्त्रानुसारेण पूजयेत्सिद्धकालिकाम्
अथवा पूजयेद्देवीं दक्षिणां कालिकां पराम्
कालीतन्त्रोक्तविधिना सप्ताहं जपपूजनम्
cīnatantrānusāreṇa pūjayetsiddhakālikām
athavā pūjayeddevīṃ dakṣiṇāṃ kālikāṃ parām
kālītantroktavidhinā saptāhaṃ japapūjanam
- 8
सत्ये चैकं तु त्रेतायां द्विगुणं द्वापरे त्रयम्
एवं सर्वत्र जानीयाच्चतुर्गुणजपः कलौ
satye caikaṃ tu tretāyāṃ dviguṇaṃ dvāpare trayam
evaṃ sarvatra jānīyāccaturguṇajapaḥ kalau
- 9
आनीय बहुयत्नेन सम्बलं तोलद्वयम्
वसुर् आद्यं शिवं चाद्यं मायाबिन्दुविभूषितम्
बीजत्रयं चाष्टशतं प्रजपेत्सम्बलोपरि
ānīya bahuyatnena sambalaṃ toladvayam
vasur ādyaṃ śivaṃ cādyaṃ māyābinduvibhūṣitam
bījatrayaṃ cāṣṭaśataṃ prajapetsambalopari
- 10
अशीतितोलकं मानं कृष्णधेनुसमुद्भवम्
दुग्धम् आनीय यत्नेन चाष्टोत्तरशतं जपेत्
aśītitolakaṃ mānaṃ kṛṣṇadhenusamudbhavam
dugdham ānīya yatnena cāṣṭottaraśataṃ japet
- 11
वस्त्रयुक्तेन सूत्रेण दुग्धमध्ये विनिक्षिपेत्
उत्तापं जनयेद्धीमान्मन्दमन्देन वह्निना
vastrayuktena sūtreṇa dugdhamadhye vinikṣipet
uttāpaṃ janayeddhīmānmandamandena vahninā
- 12
बिन्दुं वेदान्तपर्यन्तम् अर्धशोषं भवेद्यदा
तदैवोत्तोल्य तद्द्रव्यं तोयमध्ये विनिक्षिपेत्
binduṃ vedāntaparyantam ardhaśoṣaṃ bhavedyadā
tadaivottolya taddravyaṃ toyamadhye vinikṣipet
- 13
ततः परीक्षा कर्तव्या प्रदद्यात्पावकोपरि
निर्धूमं वावके द्रव्यं दृष्ट्वा उत्थाप्य यत्नतः
tataḥ parīkṣā kartavyā pradadyātpāvakopari
nirdhūmaṃ vāvake dravyaṃ dṛṣṭvā utthāpya yatnataḥ
- 14
तत्रैव प्रजपेन्मन्त्रं सर्ववन्द्यनवात्मकम्
आनीय बहुयत्नेन शुद्धं ताम्रं मनोहरम्
tatraiva prajapenmantraṃ sarvavandyanavātmakam
ānīya bahuyatnena śuddhaṃ tāmraṃ manoharam
- 15
सार्धेन तोलकं ताम्रं वह्निमध्ये विनिक्षिपेत्
यथा वह्निस्तथा ताम्रं दृष्ट्वा उत्थाप्य यत्नतः
sārdhena tolakaṃ tāmraṃ vahnimadhye vinikṣipet
yathā vahnistathā tāmraṃ dṛṣṭvā utthāpya yatnataḥ
- 16
गुञ्जाप्रमाणं तद्द्रव्यं तत्क्षणाद्यदि योजयेत्
सत्यं सत्यं हि गिरिजे रौप्यं भवति निश्चितम्
guñjāpramāṇaṃ taddravyaṃ tatkṣaṇādyadi yojayet
satyaṃ satyaṃ hi girije raupyaṃ bhavati niścitam
- 17
श्रीचण्डिकोवाच
कारणं दुग्धरूपं वा केन रूपेण शङ्करः
तत्प्रकारं महादेव कृपया वद शङ्कर
śrīcaṇḍikovāca
kāraṇaṃ dugdharūpaṃ vā kena rūpeṇa śaṅkaraḥ
tatprakāraṃ mahādeva kṛpayā vada śaṅkara
- 18
श्रीशङ्कर उवाच
टङ्कनम् आनयेद्धीमान्तोलकं तु चतुष्टयम्
वह्नियोगेन गिरिजे लाजरूपं चकार ह
śrīśaṅkara uvāca
ṭaṅkanam ānayeddhīmāntolakaṃ tu catuṣṭayam
vahniyogena girije lājarūpaṃ cakāra ha
- 19
आम्रपुष्पं तद्द्विगुणं पिष्ट्वा मिलनम् आचरेत्
तस्योपरि जपेन्मन्त्रं महामायां हि चण्डिके
āmrapuṣpaṃ taddviguṇaṃ piṣṭvā milanam ācaret
tasyopari japenmantraṃ mahāmāyāṃ hi caṇḍike
- 20
एतत्तु गुटिकां कृत्वा मेलनं कारयेद्यदि
तदैव दुग्धरूपं स्यात्सत्यं सत्यं हि शैलजे
etattu guṭikāṃ kṛtvā melanaṃ kārayedyadi
tadaiva dugdharūpaṃ syātsatyaṃ satyaṃ hi śailaje
- 21
श्रीचण्डिकोवाच
गन्धहीनं भवेन्मद्यं केनोपायेन शङ्कर
तत्सर्वं श्रोतुम् इच्छामि यदि स्नेहो ऽस्ति मा प्रति
śrīcaṇḍikovāca
gandhahīnaṃ bhavenmadyaṃ kenopāyena śaṅkara
tatsarvaṃ śrotum icchāmi yadi sneho 'sti mā prati
- 22
श्रीशङ्कर उवाच
शिवं वह्निसमारूढं वामनेत्रविभूषितम्
बिन्दुनादसमायुक्तं गन्धम् आदाय संलिखेत्
śrīśaṅkara uvāca
śivaṃ vahnisamārūḍhaṃ vāmanetravibhūṣitam
bindunādasamāyuktaṃ gandham ādāya saṃlikhet
- 23
उह्यतां पदम् उच्चार्यं चाष्टोत्तरशतं यदि
प्रजपेत्साधकश्रेष्ठो दुर्गन्धादिविनाशनम्
uhyatāṃ padam uccāryaṃ cāṣṭottaraśataṃ yadi
prajapetsādhakaśreṣṭho durgandhādivināśanam

