22 shlokas
- 1
संनिधाता कोशगृहं पण्यगृहं कोष्ठागारं कुप्यगृहम् आयुधागारं बन्धनागारं च कारयेत्
saṃnidhātā kośagṛhaṃ paṇyagṛhaṃ koṣṭhāgāraṃ kupyagṛham āyudhāgāraṃ bandhanāgāraṃ ca kārayet
- 2
चतुरश्रां वापीम् अनुदकोपस्नेहां खानयित्वा पृथुशिलाभिर् उभयतः पार्श्वं मूलं च प्रचित्य सारदारुपञ्जरं भूमिसमं त्रितलम् अनेकविधानं कुट्टिमदेशस्थानतलम् एकद्वारं यन्त्रयुक्तसोपानं भूमिगृहं कारयेत्
caturaśrāṃ vāpīm anudakopasnehāṃ khānayitvā pṛthuśilābhir ubhayataḥ pārśvaṃ mūlaṃ ca pracitya sāradārupañjaraṃ bhūmisamaṃ tritalam anekavidhānaṃ kuṭṭimadeśasthānatalam ekadvāraṃ yantrayuktasopānaṃ bhūmigṛhaṃ kārayet
- 3
तस्योपर्युभयतोनिषेधं सप्रग्रीवम् ऐष्टकं भाण्डवाहिनीपरिक्षिप्तं कोशगृहं कारयेत्प्रासादं वा
tasyoparyubhayatoniṣedhaṃ sapragrīvam aiṣṭakaṃ bhāṇḍavāhinīparikṣiptaṃ kośagṛhaṃ kārayetprāsādaṃ vā
- 4
जनपदान्ते ध्रुवनिधिम् आपदर्थम् अभित्यक्तैः कारयेत्
janapadānte dhruvanidhim āpadartham abhityaktaiḥ kārayet
- 5
पक्वेष्टकास्तम्भं चतुःशालम् एकद्वारम् अनेकस्थानतलं विवृतस्तम्भापसारम् उभयतः पण्यगृहं कोष्ठागारं च दीर्घबहुशालं कक्ष्यावृतकुड्यम् अन्तः कुप्यगृहम्तद् एव भूमिगृहयुक्तम् आयुधागारं पृथग्धर्मस्थीयं महामात्रीयं विभक्तस्त्रीपुरुषस्थानम् अपसारतः सुगुप्तकक्ष्यं बन्धनागारं कारयेत्
pakveṣṭakāstambhaṃ catuḥśālam ekadvāram anekasthānatalaṃ vivṛtastambhāpasāram ubhayataḥ paṇyagṛhaṃ koṣṭhāgāraṃ ca dīrghabahuśālaṃ kakṣyāvṛtakuḍyam antaḥ kupyagṛhamtad eva bhūmigṛhayuktam āyudhāgāraṃ pṛthagdharmasthīyaṃ mahāmātrīyaṃ vibhaktastrīpuruṣasthānam apasārataḥ suguptakakṣyaṃ bandhanāgāraṃ kārayet
- 6
सर्वेषां शालाः खातोदपानवच्च स्नानगृहाग्निविषत्राणमार्जारनकुलारक्षास्वदैवतपूजनयुक्ताः कारयेत्
sarveṣāṃ śālāḥ khātodapānavacca snānagṛhāgniviṣatrāṇamārjāranakulārakṣāsvadaivatapūjanayuktāḥ kārayet
- 7
कोष्ठागारे वर्षमानम् अरत्निमुखं कुण्डं स्थापयेत्
koṣṭhāgāre varṣamānam aratnimukhaṃ kuṇḍaṃ sthāpayet
- 8
तज्जातकरणाधिष्ठितः पुराणं नवं च रत्नं सारं फल्गु कुप्यं वा प्रतिगृह्णीयात्
tajjātakaraṇādhiṣṭhitaḥ purāṇaṃ navaṃ ca ratnaṃ sāraṃ phalgu kupyaṃ vā pratigṛhṇīyāt
- 9
तत्र रत्नोपधाव् उत्तमो दण्डः कर्तुः कारयितुश्च सारोपधौ मध्यमः फल्गुकुप्योपधौ तच्च तावच्च दण्डः
tatra ratnopadhāv uttamo daṇḍaḥ kartuḥ kārayituśca sāropadhau madhyamaḥ phalgukupyopadhau tacca tāvacca daṇḍaḥ
- 10
रूपदर्शकविशुद्धं हिरण्यं प्रतिगृह्णीयात्
rūpadarśakaviśuddhaṃ hiraṇyaṃ pratigṛhṇīyāt
- 11
अशुद्धं छेदयेत्
aśuddhaṃ chedayet
- 12
आहर्तुः पूर्वः साहसदण्डः
āhartuḥ pūrvaḥ sāhasadaṇḍaḥ
- 13
शुद्धं पूर्णम् अभिनवं च धान्यं प्रतिगृह्णीयात्
śuddhaṃ pūrṇam abhinavaṃ ca dhānyaṃ pratigṛhṇīyāt
- 14
विपर्यये मूल्यद्विगुणो दण्डः
viparyaye mūlyadviguṇo daṇḍaḥ
- 15
तेन पण्यं कुप्यम् आयुधं च व्याख्यातम्
tena paṇyaṃ kupyam āyudhaṃ ca vyākhyātam
- 16
सर्वाधिकरणेषु युक्तोपयुक्ततत्पुरुषाणां पणादिचतुष्पणपरमापहारेषु पूर्वमध्यमोत्तमवधा दण्डाः
sarvādhikaraṇeṣu yuktopayuktatatpuruṣāṇāṃ paṇādicatuṣpaṇaparamāpahāreṣu pūrvamadhyamottamavadhā daṇḍāḥ
- 17
कोशाधिष्ठितस्य कोशावच्छेदे घातः
kośādhiṣṭhitasya kośāvacchede ghātaḥ
- 18
तद्वैयावृत्यकराणाम् अर्धदण्डाः
tadvaiyāvṛtyakarāṇām ardhadaṇḍāḥ
- 19
परिभाषणम् अविज्ञाते
paribhāṣaṇam avijñāte
- 20
चोराणाम् अभिप्रधर्षणे चित्रो घातः
corāṇām abhipradharṣaṇe citro ghātaḥ
- 21
तस्माद् आप्तपुरुषाधिष्ठितः संनिधाता निचयान् अनुतिष्ठेत्
tasmād āptapuruṣādhiṣṭhitaḥ saṃnidhātā nicayān anutiṣṭhet
- 22
बाह्यम् अभ्यन्तरं चायं विद्याद्वर्षशताद् अपि
यथा पृष्टो न सज्जेत व्यये शेषे च संचये
bāhyam abhyantaraṃ cāyaṃ vidyādvarṣaśatād api
yathā pṛṣṭo na sajjeta vyaye śeṣe ca saṃcaye

