12 shlokas
- 1
उपहोमकाले ऽश्विनोः प्राणो ऽसीत्य् एतैः प्रतिमन्त्रं चतुर उपहोमाञ्जुहोति
upahomakāle 'śvinoḥ prāṇo 'sīty etaiḥ pratimantraṃ catura upahomāñjuhoti
- 2
हुत्वा हुत्वा प्रवर्तम् अभिघारयति राड् असि विराड् असि सम्राड् असि स्वराड् असीति
hutvā hutvā pravartam abhighārayati rāḍ asi virāḍ asi samrāḍ asi svarāḍ asīti
- 3
यत्खादिर आज्यं तद् अग्रेणाहवनीयं पर्याहृत्य दक्षिणस्यां वेदिश्रोण्यां सादयति
yatkhādira ājyaṃ tad agreṇāhavanīyaṃ paryāhṛtya dakṣiṇasyāṃ vediśroṇyāṃ sādayati
- 4
तद्यजमानो ऽवेक्षते घृतस्य धाराम् अमृतस्य पन्थाम् इति
tadyajamāno 'vekṣate ghṛtasya dhārām amṛtasya panthām iti
- 5
अथास्य ब्रह्मा दक्षिणं हस्तं गृह्णाति
athāsya brahmā dakṣiṇaṃ hastaṃ gṛhṇāti
- 6
ब्रह्मण इतर ऋत्विजो हस्तम् अन्वारभ्य यजमानं पर्याहुः पावमानेन त्वा स्तोमेनेति
brahmaṇa itara ṛtvijo hastam anvārabhya yajamānaṃ paryāhuḥ pāvamānena tvā stomeneti
- 7
अथ यजमानो हिरण्याद्घृतं निष्पिबति
atha yajamāno hiraṇyādghṛtaṃ niṣpibati
- 8
इमम् अग्न आयुषे वर्चसे कृधीति प्राश्नन्तम् अभिमन्त्रयते
imam agna āyuṣe varcase kṛdhīti prāśnantam abhimantrayate
- 9
उद्धृत्य हिरण्यं प्रक्षाल्यायुष्टे विश्वतो दधद् इति यजमानाय प्रयच्छति
uddhṛtya hiraṇyaṃ prakṣālyāyuṣṭe viśvato dadhad iti yajamānāya prayacchati
- 10
तद्यजमान आचम्य प्रतिगृह्य प्रदक्षिणं दक्षिणे कर्ण आबध्नात्य् आयुर् असि विश्वायुर् असि सर्वायुर् असि सर्वम् आयुर् असि सर्वं म आयुर्भूयात्सर्वम् आयुर्गेषम् इति
tadyajamāna ācamya pratigṛhya pradakṣiṇaṃ dakṣiṇe karṇa ābadhnāty āyur asi viśvāyur asi sarvāyur asi sarvam āyur asi sarvaṃ ma āyurbhūyātsarvam āyurgeṣam iti
- 11
अग्निर् आयुष्मान् इत्य् अनुवाकशेषेणास्याध्वर्युर्दक्षिणं हस्तं गृह्णाति
agnir āyuṣmān ity anuvākaśeṣeṇāsyādhvaryurdakṣiṇaṃ hastaṃ gṛhṇāti
- 12
सिद्धम् इष्टिः संतिष्ठते
siddham iṣṭiḥ saṃtiṣṭhate

