20 shlokas
- 1
त्र्यहे पुरस्तात्सीसेन क्लीबाच्छष्पाणि क्रीत्वा क्षौमे वासस्य् उपनह्य निधाय सौत्रामण्यास्तन्त्रं प्रक्रमयति
tryahe purastātsīsena klībācchaṣpāṇi krītvā kṣaume vāsasy upanahya nidhāya sautrāmaṇyāstantraṃ prakramayati
- 2
तस्या निरूढपशुबन्धवत्कल्पः
tasyā nirūḍhapaśubandhavatkalpaḥ
- 3
अग्नीन् अन्वाधाय वेदं कृत्वाग्नीन्परिस्तीर्य पाणिप्रक्षालनादि कर्म प्रतिपद्यते
agnīn anvādhāya vedaṃ kṛtvāgnīnparistīrya pāṇiprakṣālanādi karma pratipadyate
- 4
यथार्थं पात्राणि प्रयुनक्ति
स्थालीं कपालानां स्थाने
yathārthaṃ pātrāṇi prayunakti
sthālīṃ kapālānāṃ sthāne
- 5
निर्वपणकाले ऽश्विभ्यां सरस्वत्या इन्द्राय सुत्राम्णे प्रभूतान्व्रीहीन्निर्वपति
nirvapaṇakāle 'śvibhyāṃ sarasvatyā indrāya sutrāmṇe prabhūtānvrīhīnnirvapati
- 6
व्याख्यातश्चरुकल्पः
vyākhyātaścarukalpaḥ
- 7
श्रपयित्वाग्रेण गार्हपत्यम् अवटं खात्वा तस्मिन्सुरायाः कल्पेन सुरां संदधाति
śrapayitvāgreṇa gārhapatyam avaṭaṃ khātvā tasminsurāyāḥ kalpena surāṃ saṃdadhāti
- 8
परिस्रुद्भवति
parisrudbhavati
- 9
स्वाद्वीं त्वा स्वादुनेति शष्पैः सुरां संसृजति
svādvīṃ tvā svāduneti śaṣpaiḥ surāṃ saṃsṛjati
- 10
तिस्रो रात्रीः संसृष्टा वसति
tisro rātrīḥ saṃsṛṣṭā vasati
- 11
एकयूपं छिनत्ति
ekayūpaṃ chinatti
- 12
न वेदं करोति
na vedaṃ karoti
- 13
पुरस्तात्कृतेनार्थान्कुरुते
purastātkṛtenārthānkurute
- 14
सौमिक्या वेदितृतीये यजत इति विज्ञायते
saumikyā veditṛtīye yajata iti vijñāyate
- 15
उत्तरवेद्यां क्रियमाणायां प्रतिप्रस्थाता चात्वालात्पुरीषम् आहृत्य दक्षिणेनोत्तरवेदिं खरं कृत्वाग्रेणान्वाहार्यपचनं सुराग्रहार्थं द्वितीयं खरं करोति
uttaravedyāṃ kriyamāṇāyāṃ pratiprasthātā cātvālātpurīṣam āhṛtya dakṣiṇenottaravediṃ kharaṃ kṛtvāgreṇānvāhāryapacanaṃ surāgrahārthaṃ dvitīyaṃ kharaṃ karoti
- 16
अग्नौ प्रणीयमाने प्रतिप्रस्थाता दक्षिणाग्नेर् अग्निम् आहृत्य दक्षिणेनोत्तरवेदिं खरे न्युप्योपसमादधाति
agnau praṇīyamāne pratiprasthātā dakṣiṇāgner agnim āhṛtya dakṣiṇenottaravediṃ khare nyupyopasamādadhāti
- 17
पात्रसंसादनकाले ऽश्विभ्यां सरस्वत्या इन्द्राय सुत्राम्णे त्रीणि पात्राणि प्रयुनक्ति
सतं वालस्रावं श्येनपत्त्रं श्रपणानि च
pātrasaṃsādanakāle 'śvibhyāṃ sarasvatyā indrāya sutrāmṇe trīṇi pātrāṇi prayunakti
sataṃ vālasrāvaṃ śyenapattraṃ śrapaṇāni ca
- 18
प्राक्पशूपाकरणात्कृत्वोद्भिद्य सुरां ब्राह्मणस्य मूर्धन्खरे वा सादयित्वा पुनातु ते परिस्रुतम् इति वालमयेन पवित्रेण सुरां पावयति
prākpaśūpākaraṇātkṛtvodbhidya surāṃ brāhmaṇasya mūrdhankhare vā sādayitvā punātu te parisrutam iti vālamayena pavitreṇa surāṃ pāvayati
- 19
प्राङ्सोमो अतिद्रुत इति सोमवामिनः
प्रत्यङ्सोमो अतिद्रुत इति सोमातिपवितस्य
prāṅsomo atidruta iti somavāminaḥ
pratyaṅsomo atidruta iti somātipavitasya
- 20
पूतां यथायतनं सादयित्वैकयूपे पशून् उपाकरोति
pūtāṃ yathāyatanaṃ sādayitvaikayūpe paśūn upākaroti

