27 shlokas
- 1
एतेन नाचिकेतो व्याख्यातः
etena nāciketo vyākhyātaḥ
- 2
नात्र लेखा भवन्ति
nātra lekhā bhavanti
- 3
एकविंशतिर्हिरण्येष्टकाः शर्करा वाभ्यक्ता उपधानकाले नाभ्याम् एवोपधीयन्ते चतुरश्रं परिमण्डलं वा लोको ऽसि स्वर्गो ऽसीत्य् अनुवाकेन प्रतिमन्त्रम्
ekaviṃśatirhiraṇyeṣṭakāḥ śarkarā vābhyaktā upadhānakāle nābhyām evopadhīyante caturaśraṃ parimaṇḍalaṃ vā loko 'si svargo 'sīty anuvākena pratimantram
- 4
तं हैतम् एके पशुबन्ध एवोत्तरवेद्यां चिन्वत इति ब्राह्मणव्याख्याता विकाराः
taṃ haitam eke paśubandha evottaravedyāṃ cinvata iti brāhmaṇavyākhyātā vikārāḥ
- 5
तान् अनुक्रमिष्यामः
tān anukramiṣyāmaḥ
- 6
पशुबन्धे सोमे सत्त्रे सहस्रे सर्ववेदसे वा यत्र वा भूयिष्ठा आहुतयो हूयेरंस्तत्र चेतव्यः
paśubandhe some sattre sahasre sarvavedase vā yatra vā bhūyiṣṭhā āhutayo hūyeraṃstatra cetavyaḥ
- 7
सत्त्रे प्रतिष्ठाम् ईप्सन्यशः प्रजां पशून्स्वर्गम् ऋद्धिम् ईप्सन्यथावकाशं यथासमाम्नातम्
sattre pratiṣṭhām īpsanyaśaḥ prajāṃ paśūnsvargam ṛddhim īpsanyathāvakāśaṃ yathāsamāmnātam
- 8
सर्वत्र पुरस्ताद् उपक्रमः प्रदक्षिणम् उत्तरतो ऽपवर्गः
sarvatra purastād upakramaḥ pradakṣiṇam uttarato 'pavargaḥ
- 9
पशुकामः पाङ्क्तम् एव चिन्वीत
पञ्च पञ्च प्रतिदिशम् एकां मध्ये
paśukāmaḥ pāṅktam eva cinvīta
pañca pañca pratidiśam ekāṃ madhye
- 10
ज्यैष्ठ्यम् ईप्सन्यशः प्रजां वा त्रिवृतम् एव
सप्त पुरस्तात्तिस्रो दक्षिणतः सप्त पश्चात्तिस्र उत्तरत एकां मध्ये
jyaiṣṭhyam īpsanyaśaḥ prajāṃ vā trivṛtam eva
sapta purastāttisro dakṣiṇataḥ sapta paścāttisra uttarata ekāṃ madhye
- 11
ज्यैष्ठ्यकामो मध्यात्प्रक्रम्योर्ध्वां रीतिं प्रतिपादयेत्
jyaiṣṭhyakāmo madhyātprakramyordhvāṃ rītiṃ pratipādayet
- 12
स्वर्गकामः पश्चात्प्रक्रम्य प्राचीं रीतिं प्रतिपादयेत्
svargakāmaḥ paścātprakramya prācīṃ rītiṃ pratipādayet
- 13
स यदीच्छेत्तेजस्वी यशस्वी ब्रह्मवर्चसी स्याम् इति प्राग्दक्षिणेभ्यः प्राङ् आ होतुर्धिष्ण्याद् उत्सर्पेद्येयं प्रागाद्यशस्वती सा मा प्रोर्णोतु तेजसा यशसा ब्रह्मवर्चसेनेति
sa yadīcchettejasvī yaśasvī brahmavarcasī syām iti prāgdakṣiṇebhyaḥ prāṅ ā hoturdhiṣṇyād utsarpedyeyaṃ prāgādyaśasvatī sā mā prorṇotu tejasā yaśasā brahmavarcaseneti
- 14
अथ यदीच्छेद्भूयिष्ठं मे श्रद्दधीरन्भूयिष्ठा दक्षिणा नयेयुर् इति दक्षिणासु नीयमानासु प्राच्य् एहि प्राच्य् एहीति
atha yadīcchedbhūyiṣṭhaṃ me śraddadhīranbhūyiṣṭhā dakṣiṇā nayeyur iti dakṣiṇāsu nīyamānāsu prācy ehi prācy ehīti
- 15
प्राची जुषाणा वेत्व् आज्यस्य स्वाहेति स्रुवेणोपहत्याहवनीये जुहुयात्
prācī juṣāṇā vetv ājyasya svāheti sruveṇopahatyāhavanīye juhuyāt
- 16
स्वयमातृण्णादि समानम् उत्तरम्
svayamātṛṇṇādi samānam uttaram
- 17
संतिष्ठते नाचिकेतः
saṃtiṣṭhate nāciketaḥ
- 18
एतेन चातुर्होत्रो व्याख्यातः
etena cāturhotro vyākhyātaḥ
- 19
यावत्पदं हिरण्येष्टकाः शर्करा वाभ्यक्ताः
yāvatpadaṃ hiraṇyeṣṭakāḥ śarkarā vābhyaktāḥ
- 20
उपधानकाले ऽग्रेण दर्भस्तम्बं दशहोतारं प्रतिमन्त्रम् उदञ्चम् उपदधाति
हृदयं ग्रहं चत्वारि पदानि संभाराणां द्वे पत्नीनाम्
upadhānakāle 'greṇa darbhastambaṃ daśahotāraṃ pratimantram udañcam upadadhāti
hṛdayaṃ grahaṃ catvāri padāni saṃbhārāṇāṃ dve patnīnām
- 21
एवं दक्षिणतः प्राञ्चं चतुर्होतारम्
evaṃ dakṣiṇataḥ prāñcaṃ caturhotāram
- 22
पश्चाद् उदञ्चं पञ्चहोतारम्
paścād udañcaṃ pañcahotāram
- 23
उत्तरतः प्राञ्चं षड्ढोतारम्
uttarataḥ prāñcaṃ ṣaḍḍhotāram
- 24
उपरिष्टात्प्राञ्चं सप्तहोतारम्
upariṣṭātprāñcaṃ saptahotāram
- 25
पञ्चात्र पदानि संभाराणाम् अवशिष्टानि च पत्नीनाम्
pañcātra padāni saṃbhārāṇām avaśiṣṭāni ca patnīnām
- 26
स्वयमातृण्णादि समानम् उत्तरम्
svayamātṛṇṇādi samānam uttaram
- 27
संतिष्ठते चातुर्होत्रः
saṃtiṣṭhate cāturhotraḥ

