7 shlokas
- 1
तासां वै देवतानाम् आजिं धावन्तीनाम् अभिसृष्टानाम् अग्निर्मुखम्प्रथमः प्रत्यपद्यत तम् अश्विनाव् अन्वागच्छतां तम् अब्रूताम् अपोदिह्य् आवां वा इदं जेष्याव इति स तथेत्य् अब्रवीत्तस्य वै ममेहाप्यस्त्व् इति तथेति तस्मा अप्य् अत्राकुरुतां तस्माद् आग्नेयम् आश्विने शस्यते
tāsāṃ vai devatānām ājiṃ dhāvantīnām abhisṛṣṭānām agnirmukhamprathamaḥ pratyapadyata tam aśvināv anvāgacchatāṃ tam abrūtām apodihy āvāṃ vā idaṃ jeṣyāva iti sa tathety abravīttasya vai mamehāpyastv iti tatheti tasmā apy atrākurutāṃ tasmād āgneyam āśvine śasyate
- 2
ता उषसम् अन्वागच्छतां ताम् अब्रूताम् अपोदिह्य् आवां वा इदं जेष्याव इति सा तथेत्य् अब्रवीत्तस्यै वै ममेहाप्यस्त्व् इति तथेति तस्या अप्य् अत्राकुरुतां तस्माद् उषस्यम् आश्विने शस्यते
tā uṣasam anvāgacchatāṃ tām abrūtām apodihy āvāṃ vā idaṃ jeṣyāva iti sā tathety abravīttasyai vai mamehāpyastv iti tatheti tasyā apy atrākurutāṃ tasmād uṣasyam āśvine śasyate
- 3
ताव् इन्द्रम् अन्वागच्छतां तम् अब्रूताम् आवां वा इदम्मघवञ्जेष्याव इति न ह तं दधृषतुर् अपोदिहीति वक्तुं स तथेत्य् अब्रवीत्तस्य वै ममेहाप्यस्त्व् इति तथेति तस्मा अप्य् अत्राकुरुतां तस्माद् ऐन्द्रम् आश्विने शस्यते
tāv indram anvāgacchatāṃ tam abrūtām āvāṃ vā idammaghavañjeṣyāva iti na ha taṃ dadhṛṣatur apodihīti vaktuṃ sa tathety abravīttasya vai mamehāpyastv iti tatheti tasmā apy atrākurutāṃ tasmād aindram āśvine śasyate
- 4
तद् अश्विना उदजयताम् अश्विनाव् आश्नुवातां यद् अश्विना उदजयताम् अश्विनाव् आश्नुवातां तस्माद् एतद् आश्विनम् इत्य् आचक्षते
tad aśvinā udajayatām aśvināv āśnuvātāṃ yad aśvinā udajayatām aśvināv āśnuvātāṃ tasmād etad āśvinam ity ācakṣate
- 5
अश्नुते यद्यत्कामयते य एवं वेद
aśnute yadyatkāmayate ya evaṃ veda
- 6
तद् आहुर्यच्छस्यत आग्नेयं शस्यत उषस्यम्शस्यत ऐन्द्रम् अथ कस्माद् एतद् आश्विनम् इत्य् आचक्षत इत्य् अश्विनौ हि तद् उदजयताम् अश्विनाव् आश्नुवातां यद् अश्विना उदजयताम् अश्विनाव् आश्नुवातां तस्माद् एतद् आश्विनम् इत्य् आचक्षते
tad āhuryacchasyata āgneyaṃ śasyata uṣasyamśasyata aindram atha kasmād etad āśvinam ity ācakṣata ity aśvinau hi tad udajayatām aśvināv āśnuvātāṃ yad aśvinā udajayatām aśvināv āśnuvātāṃ tasmād etad āśvinam ity ācakṣate
- 7
अश्नुते यद्यत्कामयते य एवं वेद
aśnute yadyatkāmayate ya evaṃ veda

