8 shlokas
- 1
बृहद्रथंतरे सामनी भवत एते वै यज्ञस्य नावौ सम्पारिण्यौ यद्बृहद्रथंतरे ताभ्याम् एव तत्संवत्सरं तरन्ति
bṛhadrathaṃtare sāmanī bhavata ete vai yajñasya nāvau sampāriṇyau yadbṛhadrathaṃtare tābhyām eva tatsaṃvatsaraṃ taranti
- 2
पादौ वै बृहद्रथंतरे शिर एतद् अहः पादाभ्याम् एव तच्छ्रियं शिरो ऽभ्यायन्ति
pādau vai bṛhadrathaṃtare śira etad ahaḥ pādābhyām eva tacchriyaṃ śiro 'bhyāyanti
- 3
पक्षौ वै बृहद्रथंतरे शिर एतद् अहः पक्षाभ्याम् एव तच्छ्रियं शिरो ऽभ्यायुवते
pakṣau vai bṛhadrathaṃtare śira etad ahaḥ pakṣābhyām eva tacchriyaṃ śiro 'bhyāyuvate
- 4
ते उभे न समवसृज्ये य उभे समवसृजेयुर्यथैव छिन्ना नौर्बन्धनात्तीरं तीरम् ऋच्छन्ती प्लवेतैवम् एव ते सत्रिणस्तीरं तीरम् ऋच्छन्तः प्लवेरन्य उभे समवसृजेयुः
te ubhe na samavasṛjye ya ubhe samavasṛjeyuryathaiva chinnā naurbandhanāttīraṃ tīram ṛcchantī plavetaivam eva te satriṇastīraṃ tīram ṛcchantaḥ plaveranya ubhe samavasṛjeyuḥ
- 5
तद्यदि रथंतरम् अवसृजेयुर्बृहतैवोभे अनवसृष्टे अथ यदि बृहद् अवसृजेयू रथंतरेणैवोभे अनवसृष्टे
tadyadi rathaṃtaram avasṛjeyurbṛhataivobhe anavasṛṣṭe atha yadi bṛhad avasṛjeyū rathaṃtareṇaivobhe anavasṛṣṭe
- 6
यद्वै रथंतरं तद्वैरूपं यद्बृहत्तद्वैराजम्यद्रथंतरं तच्छाक्वरं यद्बृहत्तद्रैवतम् एवम् एते उभे अनवसृष्टे भवतः
yadvai rathaṃtaraṃ tadvairūpaṃ yadbṛhattadvairājamyadrathaṃtaraṃ tacchākvaraṃ yadbṛhattadraivatam evam ete ubhe anavasṛṣṭe bhavataḥ
- 7
ये वा एवं विद्वांस एतद् अहर् उपयन्त्य् आप्त्वा वै ते ऽहश्शः संवत्सरम् आप्त्वार्धमासश आप्त्वा मासश आप्त्वा स्तोमांश्च छन्दांसि चाप्त्वा सर्वा देवतास्तप एव तप्यमानाः सोमपीथम्भक्षयन्तः संवत्सरम् अभिषुण्वन्त आसते
ye vā evaṃ vidvāṃsa etad ahar upayanty āptvā vai te 'haśśaḥ saṃvatsaram āptvārdhamāsaśa āptvā māsaśa āptvā stomāṃśca chandāṃsi cāptvā sarvā devatāstapa eva tapyamānāḥ somapīthambhakṣayantaḥ saṃvatsaram abhiṣuṇvanta āsate
- 8
ये वा अत ऊर्ध्वं संवत्सरम् उपयन्ति गुरुं वै ते भारम् अभिनिदधते सं वै गुरुर्भारः शृणात्य् अथ य एनम्परस्तात्कर्मभिर् आप्त्वावस्ताद् उपैति स वै स्वस्ति संवत्सरस्य पारम् अश्नुते
ye vā ata ūrdhvaṃ saṃvatsaram upayanti guruṃ vai te bhāram abhinidadhate saṃ vai gururbhāraḥ śṛṇāty atha ya enamparastātkarmabhir āptvāvastād upaiti sa vai svasti saṃvatsarasya pāram aśnute

