13 shlokas
- 1
दीक्षा वै देवेभ्यो ऽपाक्रामत्तां वासन्तिकाभ्याम्मासाभ्याम् अन्वयुञ्जत तां वासन्तिकाभ्याम्मासाभ्यां नोदाप्नुवंस्तां ग्रैष्माभ्यां तां वार्षिकाभ्यां तां शारदाभ्यां तां हैमन्तिकाभ्याम्मासाभ्याम् अन्वयुञ्जत तां हैमन्तिकाभ्याम्मासाभ्यां नोदाप्नुवंस्तां शैशिराभ्याम्मासाभ्याम् अन्वयुञ्जत तां शैशिराभ्याम्मासाभ्याम् आप्नुवन्
dīkṣā vai devebhyo 'pākrāmattāṃ vāsantikābhyāmmāsābhyām anvayuñjata tāṃ vāsantikābhyāmmāsābhyāṃ nodāpnuvaṃstāṃ graiṣmābhyāṃ tāṃ vārṣikābhyāṃ tāṃ śāradābhyāṃ tāṃ haimantikābhyāmmāsābhyām anvayuñjata tāṃ haimantikābhyāmmāsābhyāṃ nodāpnuvaṃstāṃ śaiśirābhyāmmāsābhyām anvayuñjata tāṃ śaiśirābhyāmmāsābhyām āpnuvan
- 2
आप्नोति यम् ईप्सति नैनं द्विषन्न् आप्नोति य एवं वेद
āpnoti yam īpsati nainaṃ dviṣann āpnoti ya evaṃ veda
- 3
तस्माद्यं सत्त्रिया दीक्षोपनमेद् एतयोर् एव शैशिरयोर्मासयोर् आगतयोर्दीक्षेत साक्षाद् एव तद्दीक्षायाम् आगतायाम्दीक्षते प्रत्यक्षाद्दीक्षाम्परिगृह्णाति तस्माद् एतयोर् एव शैशिरयोर्मासयोर् आगतयोर्ये चैव ग्राम्याः पशवो ये चारण्या अणिमानम् एव तत्परुषिमाणं नियन्ति दीक्षारूपम् एव तद् उपनिप्लवन्ते
tasmādyaṃ sattriyā dīkṣopanamed etayor eva śaiśirayormāsayor āgatayordīkṣeta sākṣād eva taddīkṣāyām āgatāyāmdīkṣate pratyakṣāddīkṣāmparigṛhṇāti tasmād etayor eva śaiśirayormāsayor āgatayorye caiva grāmyāḥ paśavo ye cāraṇyā aṇimānam eva tatparuṣimāṇaṃ niyanti dīkṣārūpam eva tad upaniplavante
- 4
स पुरस्ताद्दीक्षायाः प्राजापत्यम्पशुम् आलभते
sa purastāddīkṣāyāḥ prājāpatyampaśum ālabhate
- 5
तस्य सप्तदश सामिधेनीर् अनुब्रूयात्सप्तदशो वै प्रजापतिः प्रजापतेर् आप्त्यै
tasya saptadaśa sāmidhenīr anubrūyātsaptadaśo vai prajāpatiḥ prajāpater āptyai
- 6
तस्याप्रियो जामदग्न्यो भवन्ति
tasyāpriyo jāmadagnyo bhavanti
- 7
तद् आहुर्यद् अन्येषु पशुषु यथऋष्य् आप्रियो भवन्त्य् अथ कस्माद् अस्मिन्सर्वेषां जामदग्न्य एवेति
tad āhuryad anyeṣu paśuṣu yathaṛṣy āpriyo bhavanty atha kasmād asminsarveṣāṃ jāmadagnya eveti
- 8
सर्वरूपा वै जामदग्न्यः सर्वसमृद्धाः सर्वरूप एष पशुः सर्वसमृद्धस्तद्यज्जामदग्न्यो भवन्ति सर्वरूपतायै सर्वसमृद्ध्यै
sarvarūpā vai jāmadagnyaḥ sarvasamṛddhāḥ sarvarūpa eṣa paśuḥ sarvasamṛddhastadyajjāmadagnyo bhavanti sarvarūpatāyai sarvasamṛddhyai
- 9
तस्य वायव्यः पशुपुरोᄆआशो भवति
tasya vāyavyaḥ paśupuroᄆāśo bhavati
- 10
तद् आहुर्यद् अन्यदेवत्य उत पशुर्भवत्य् अथ कस्माद्वायव्यः पशुपुरोᄆआशः क्रियत इति
tad āhuryad anyadevatya uta paśurbhavaty atha kasmādvāyavyaḥ paśupuroᄆāśaḥ kriyata iti
- 11
प्रजापतिर्वै यज्ञो यज्ञस्यायातयामताया इति ब्रूयाद्यद् उ वायव्यस्तेन प्रजापतेर्नैति वायुर्ह्य् एव प्रजापतिः
prajāpatirvai yajño yajñasyāyātayāmatāyā iti brūyādyad u vāyavyastena prajāpaternaiti vāyurhy eva prajāpatiḥ
- 12
तद् उक्तम् ऋषिणा पवमानः प्रजापतिर् इति
tad uktam ṛṣiṇā pavamānaḥ prajāpatir iti
- 13
सत्रम् उ चेत्संन्युप्याग्नीन्यजेरन्सर्वे दीक्षेरन्सर्वे सुनुयुर्वसन्तम् अभ्युदवस्यत्य् ऊर्ग्वै वसन्त इषम् एव तद् ऊर्जम् अभ्युदवस्यति
satram u cetsaṃnyupyāgnīnyajeransarve dīkṣeransarve sunuyurvasantam abhyudavasyaty ūrgvai vasanta iṣam eva tad ūrjam abhyudavasyati

