15 shlokas
- 1
आ न इन्द्रो दूराद् आ न आसाद् इति सूक्तम् एति प्रथमे ऽहनि प्रथमस्याह्नो रूपम्
ā na indro dūrād ā na āsād iti sūktam eti prathame 'hani prathamasyāhno rūpam
- 2
सम्पातौ भवतो निष्केवल्यमरुत्वतीययोर्निविद्धाने वामदेवो वा इमांल्लोकान् अपश्यत्तान्सम्पातैः समपतद्यत्सम्पातैः समपतत्तत्सम्पातानां सम्पातत्वं तद्यत्सम्पातौ प्रथमे ऽहनि शंसति स्वर्गस्य लोकस्य समष्ट्यै सम्पत्त्यै संगत्यै
sampātau bhavato niṣkevalyamarutvatīyayornividdhāne vāmadevo vā imāṃllokān apaśyattānsampātaiḥ samapatadyatsampātaiḥ samapatattatsampātānāṃ sampātatvaṃ tadyatsampātau prathame 'hani śaṃsati svargasya lokasya samaṣṭyai sampattyai saṃgatyai
- 3
तत्सवितुर्वृणीमहे ऽद्या नो देव सवितर् इति वैश्वदेवस्य प्रतिपदनुचरौ राथंतरे ऽहनि प्रथमे ऽहनि प्रथमस्याह्नो रूपम्
tatsaviturvṛṇīmahe 'dyā no deva savitar iti vaiśvadevasya pratipadanucarau rāthaṃtare 'hani prathame 'hani prathamasyāhno rūpam
- 4
युञ्जते मन उत युञ्जते धिय इति सावित्रं युक्तवत्प्रथमे ऽहनि प्रथमस्याह्नो रूपम्
yuñjate mana uta yuñjate dhiya iti sāvitraṃ yuktavatprathame 'hani prathamasyāhno rūpam
- 5
प्र द्यावा यज्ञैः पृथिवी ऋतावृधेति द्यावापृथिवीयम्प्रेति प्रथमे ऽहनि प्रथमस्याह्नो रूपम्
pra dyāvā yajñaiḥ pṛthivī ṛtāvṛdheti dyāvāpṛthivīyampreti prathame 'hani prathamasyāhno rūpam
- 6
इहेह वो मनसा बन्धुता नर इत्य् आर्भवं यद्वा एति च प्रेति च तत्प्रथमस्याह्नो रूपं तद्यत्प्रेति सर्वम् अभविष्यत्प्रैष्यन्न् एवास्माल्लोकाद्यजमाना इति तद्यद् इहेह वो मनसा बन्धुता नर इत्य् आर्भवम्प्रथमे ऽहनि शंसत्य् अयं वै लोक इहेहास्मिन्न् एवैनांस्तल्लोके रमयति
iheha vo manasā bandhutā nara ity ārbhavaṃ yadvā eti ca preti ca tatprathamasyāhno rūpaṃ tadyatpreti sarvam abhaviṣyatpraiṣyann evāsmāllokādyajamānā iti tadyad iheha vo manasā bandhutā nara ity ārbhavamprathame 'hani śaṃsaty ayaṃ vai loka ihehāsminn evaināṃstalloke ramayati
- 7
देवान्हुवे बृहच्छ्रवसः स्वस्तय इति वैश्वदेवम्प्रथमे पदे देवता निरुच्यन्ते प्रथमे ऽहनि प्रथमस्याह्नो रूपम्
devānhuve bṛhacchravasaḥ svastaya iti vaiśvadevamprathame pade devatā nirucyante prathame 'hani prathamasyāhno rūpam
- 8
महान्तं वा एते ऽध्वानम् एष्यन्तो भवन्ति ये संवत्सरं वा द्वादशाहं वासते तद्यद्देवान्हुवे बृहच्छ्रवसः स्वस्तय इति वैश्वदेवम्प्रथमे ऽहनि शंसति स्वस्तितायै
mahāntaṃ vā ete 'dhvānam eṣyanto bhavanti ye saṃvatsaraṃ vā dvādaśāhaṃ vāsate tadyaddevānhuve bṛhacchravasaḥ svastaya iti vaiśvadevamprathame 'hani śaṃsati svastitāyai
- 9
स्वस्त्ययनम् एव तत्कुरुते स्वस्ति संवत्सरस्य पारम् अश्नुते य एवं वेद येषां चैवं विद्वान् एतद्धोता देवान्हुवे बृहच्छ्रवसः स्वस्तय इति वैश्वदेवम्प्रथमे ऽहनि शंसति
svastyayanam eva tatkurute svasti saṃvatsarasya pāram aśnute ya evaṃ veda yeṣāṃ caivaṃ vidvān etaddhotā devānhuve bṛhacchravasaḥ svastaya iti vaiśvadevamprathame 'hani śaṃsati
- 10
वैश्वानराय पृथुपाजसे विप इत्य् आग्निमारुतस्य प्रतिपत्प्रथमे पदे देवता निरुच्यते प्रथमे ऽहनि प्रथमस्याह्नो रूपम्
vaiśvānarāya pṛthupājase vipa ity āgnimārutasya pratipatprathame pade devatā nirucyate prathame 'hani prathamasyāhno rūpam
- 11
प्रत्वक्षसो प्रतवसो विरप्शिन इति मारुतम्प्रेति प्रथमे ऽहनि प्रथमस्याह्नो रूपम्
pratvakṣaso pratavaso virapśina iti mārutampreti prathame 'hani prathamasyāhno rūpam
- 12
जातवेदसे सुनवाम सोमम् इति जातवेदस्याम्पुरस्तात्सूक्तस्य शंसति स्वस्त्ययनं वै जातवेदस्याः स्वस्तितायै
jātavedase sunavāma somam iti jātavedasyāmpurastātsūktasya śaṃsati svastyayanaṃ vai jātavedasyāḥ svastitāyai
- 13
स्वस्त्ययनम् एव तत्कुरुते स्वस्ति संवत्सरस्य पारम् अश्नुते य एवं वेद
svastyayanam eva tatkurute svasti saṃvatsarasya pāram aśnute ya evaṃ veda
- 14
प्र तव्यसीं नव्यसीं धीतिम् अग्नय इति जातवेदस्यम्प्रेति प्रथमे ऽहनि प्रथमस्याह्नो रूपम्
pra tavyasīṃ navyasīṃ dhītim agnaya iti jātavedasyampreti prathame 'hani prathamasyāhno rūpam
- 15
समानम् आग्निमारुतम्भवति यच्चाग्निष्टोमे यद्वै यज्ञे समानं क्रियते तत्प्रजा अनुसमनन्ति तस्मात्समानम् आग्निमारुतम्भवति
samānam āgnimārutambhavati yaccāgniṣṭome yadvai yajñe samānaṃ kriyate tatprajā anusamananti tasmātsamānam āgnimārutambhavati

