9 shlokas
- 1
प्रजापतिर्वै सोमाय राज्ञे दुहितरम्प्रायच्छत्सूर्यां सावित्रीं तस्यै सर्वे देवा वरा आगच्छंस्तस्या एतत्सहस्रं वहतुम् अन्वाकरोद्यद् एतद् आश्विनम् इत्य् आचक्षते ऽनाश्विनं हैव तद्यद् अर्वाक्सहस्रं तस्मात्तत्सहस्रं वैव शंसेद्भूयो वा
prajāpatirvai somāya rājñe duhitaramprāyacchatsūryāṃ sāvitrīṃ tasyai sarve devā varā āgacchaṃstasyā etatsahasraṃ vahatum anvākarodyad etad āśvinam ity ācakṣate 'nāśvinaṃ haiva tadyad arvāksahasraṃ tasmāttatsahasraṃ vaiva śaṃsedbhūyo vā
- 2
प्राश्य घृतं शंसेद्यथा ह वा इदम् अनो वा रथो वाक्तो वर्तत एवं हैवाक्तो वर्तते
prāśya ghṛtaṃ śaṃsedyathā ha vā idam ano vā ratho vākto vartata evaṃ haivākto vartate
- 3
शकुनिर् इवोत्पतिष्यन्न् आह्वयीत
śakunir ivotpatiṣyann āhvayīta
- 4
तस्मिन्देवा न समजानत ममेदम् अस्तु ममेदम् अस्त्व् इति ते संजानाना अब्रुवन्न् आजिम् अस्यायामहै स यो न उज्जेष्यति तस्येदम्भविष्यतीति ते ऽग्नेर् एवाधि गृहपतेर् आदित्यं काष्ठाम् अकुर्वत तस्माद् आग्नेयी प्रतिपद्भवत्य् आश्विनस्याग्निर्होता गृहपतिः स राजेति
tasmindevā na samajānata mamedam astu mamedam astv iti te saṃjānānā abruvann ājim asyāyāmahai sa yo na ujjeṣyati tasyedambhaviṣyatīti te 'gner evādhi gṛhapater ādityaṃ kāṣṭhām akurvata tasmād āgneyī pratipadbhavaty āśvinasyāgnirhotā gṛhapatiḥ sa rājeti
- 5
तद्धैक आहुर् अग्निम्मन्ये पितरम् अग्निम् आपिम् इत्य् एतया प्रतिपद्येत
taddhaika āhur agnimmanye pitaram agnim āpim ity etayā pratipadyeta
- 6
दिवि शुक्रं यजतं सूर्यस्येति प्रथमयैव ऋचा काष्ठाम् आप्नोतीति
divi śukraṃ yajataṃ sūryasyeti prathamayaiva ṛcā kāṣṭhām āpnotīti
- 7
तत्तन्नादृत्यं य एनं तत्र ब्रूयाद् अग्निम् अग्निम् इति वै प्रत्यपाद्य् अग्निम् आपत्स्यतीति शश्वत्तथा स्यात्
tattannādṛtyaṃ ya enaṃ tatra brūyād agnim agnim iti vai pratyapādy agnim āpatsyatīti śaśvattathā syāt
- 8
तस्माद् अग्निर्होता गृहपतिः स राजेत्य् एतयैव प्रतिपद्येत गृहपतिवती प्रजातिमती शान्ता सर्वायुः सर्वायुत्वाय
tasmād agnirhotā gṛhapatiḥ sa rājety etayaiva pratipadyeta gṛhapativatī prajātimatī śāntā sarvāyuḥ sarvāyutvāya
- 9
सर्वम् आयुर् एति य एवं वेद
sarvam āyur eti ya evaṃ veda

