18 shlokas
- 1
तद् आहुः सूर्यो नातिशस्यो बृहती नातिशस्या यत्सूर्यम् अतिशंसेद्ब्रह्मवर्चसम् अतिपद्येत यद्बृहतीम् अतिशंसेत्प्राणान् अतिपद्येतेति
tad āhuḥ sūryo nātiśasyo bṛhatī nātiśasyā yatsūryam atiśaṃsedbrahmavarcasam atipadyeta yadbṛhatīm atiśaṃsetprāṇān atipadyeteti
- 2
इन्द्र क्रतुं न आ भरेत्य् ऐन्द्रम्प्रगाथं शंसति
indra kratuṃ na ā bharety aindrampragāthaṃ śaṃsati
- 3
शिक्षा णो अस्मिन्पुरुहूत यामनि जीवा ज्योतिर् अशीमहीति
śikṣā ṇo asminpuruhūta yāmani jīvā jyotir aśīmahīti
- 4
असौ वाव ज्योतिस्तेन सूर्यं नातिशंसति
asau vāva jyotistena sūryaṃ nātiśaṃsati
- 5
यद् उ बार्हतः प्रगाथस्तेन बृहतीं नातिशंसति
yad u bārhataḥ pragāthastena bṛhatīṃ nātiśaṃsati
- 6
अभि त्वा शूर नोनुम इति राथंतरीं योनिं शंसति राथंतरेण वै संधिनाश्विनाय स्तुवते तद्यद्राथंतरीं योनिं शंसति रथंतरस्यैव सयोनित्वाय
abhi tvā śūra nonuma iti rāthaṃtarīṃ yoniṃ śaṃsati rāthaṃtareṇa vai saṃdhināśvināya stuvate tadyadrāthaṃtarīṃ yoniṃ śaṃsati rathaṃtarasyaiva sayonitvāya
- 7
ईशानम् अस्य जगतः स्वर्दृशम् इत्य् असौ वाव स्वर्दृक्तेन सूर्यं नातिशंसति
īśānam asya jagataḥ svardṛśam ity asau vāva svardṛktena sūryaṃ nātiśaṃsati
- 8
यद् उ बार्हतः प्रगाथस्तेन बृहतीं नातिशंसति
yad u bārhataḥ pragāthastena bṛhatīṃ nātiśaṃsati
- 9
बहवः सूरचक्षस इति मैत्रावरुणम्प्रगाथं शंसत्य् अहर्वै मित्रो रात्रिर्वरुण उभे वा एषो ऽहोरात्रे आरभते यो ऽतिरात्रम् उपैति तद्यन्मैत्रावरुणम्प्रगाथं शंसत्य् अहोरात्रयोर् एवैनं तत्प्रतिष्ठापयति
bahavaḥ sūracakṣasa iti maitrāvaruṇampragāthaṃ śaṃsaty aharvai mitro rātrirvaruṇa ubhe vā eṣo 'horātre ārabhate yo 'tirātram upaiti tadyanmaitrāvaruṇampragāthaṃ śaṃsaty ahorātrayor evainaṃ tatpratiṣṭhāpayati
- 10
सूरचक्षस इति तेन सूर्यं नातिशंसति यद् उ बार्हतः प्रगाथस्तेन बृहतीं नातिशंसति
sūracakṣasa iti tena sūryaṃ nātiśaṃsati yad u bārhataḥ pragāthastena bṛhatīṃ nātiśaṃsati
- 11
मही द्यौः पृथिवी च नस्ते हि द्यावापृथिवी विश्वशम्भुवेति द्यावापृथिवीये शंसति द्यावापृथिवी वै प्रतिष्ठे इयम् एवेह प्रतिष्ठासाव् अमुत्र तद्यद्द्यावापृथिवीये शंसति प्रतिष्ठयोर् एवैनं तत्प्रतिष्ठापयति
mahī dyauḥ pṛthivī ca naste hi dyāvāpṛthivī viśvaśambhuveti dyāvāpṛthivīye śaṃsati dyāvāpṛthivī vai pratiṣṭhe iyam eveha pratiṣṭhāsāv amutra tadyaddyāvāpṛthivīye śaṃsati pratiṣṭhayor evainaṃ tatpratiṣṭhāpayati
- 12
देवो देवी धर्मणा सूर्यः शुचिर् इति तेन सूर्यं नातिशंसति
devo devī dharmaṇā sūryaḥ śucir iti tena sūryaṃ nātiśaṃsati
- 13
यद् उ गायत्री च जगती च ते द्वे बृहत्यौ तेन बृहतीं नातिशंसति
yad u gāyatrī ca jagatī ca te dve bṛhatyau tena bṛhatīṃ nātiśaṃsati
- 14
विश्वस्य देवी मृचयस्य जन्मनो न या रोषाति न ग्रभद् इति द्विपदाम्शंसति
viśvasya devī mṛcayasya janmano na yā roṣāti na grabhad iti dvipadāmśaṃsati
- 15
चितैधम् उक्थम् इति ह स्म वा एतद् आचक्षते यद् एतद् आश्विनं निरृतिर्ह स्म पाशिन्य् उपास्ते यदैव होता परिधास्यत्य् अथ पाशान्प्रतिमोक्ष्यामीति ततो वा एताम्बृहस्पतिर्द्विपदाम् अपश्यन्न या रोषाति न ग्रभद् इति तया निरृत्याः पाशिन्या अधराचः पाशान् अपास्यत्तद्यद् एतां द्विपदां होता शंसति निरृत्या एव तत्पाशिन्या अधराचः पाशान् अपास्यति स्वस्त्य् एव होतोन्मुच्यते सर्वायुः सर्वायुत्वाय
citaidham uktham iti ha sma vā etad ācakṣate yad etad āśvinaṃ nirṛtirha sma pāśiny upāste yadaiva hotā paridhāsyaty atha pāśānpratimokṣyāmīti tato vā etāmbṛhaspatirdvipadām apaśyanna yā roṣāti na grabhad iti tayā nirṛtyāḥ pāśinyā adharācaḥ pāśān apāsyattadyad etāṃ dvipadāṃ hotā śaṃsati nirṛtyā eva tatpāśinyā adharācaḥ pāśān apāsyati svasty eva hotonmucyate sarvāyuḥ sarvāyutvāya
- 16
सर्वम् आयुर् एति य एवं वेद
sarvam āyur eti ya evaṃ veda
- 17
मृचयस्य जन्मन इत्य् असौ वाव मर्चयतीव तेन सूर्यं नातिशंसति
mṛcayasya janmana ity asau vāva marcayatīva tena sūryaṃ nātiśaṃsati
- 18
यद् उ द्विपदा पुरुषछन्दसं सा सर्वाणि छन्दांस्य् अभ्याप्ता तेन बृहतीं नातिशंसति
yad u dvipadā puruṣachandasaṃ sā sarvāṇi chandāṃsy abhyāptā tena bṛhatīṃ nātiśaṃsati

