14 shlokas
- 1
इन्द्रो वै देवता द्वितीयम् अहर्वहति पञ्चदशः स्तोमो बृहत्साम त्रिष्टुप्छन्दः
indro vai devatā dvitīyam aharvahati pañcadaśaḥ stomo bṛhatsāma triṣṭupchandaḥ
- 2
यथादेवतम् एनेन यथास्तोमं यथासाम यथाछन्दसं राध्नोति य एवं वेद
yathādevatam enena yathāstomaṃ yathāsāma yathāchandasaṃ rādhnoti ya evaṃ veda
- 3
यद्वै नेति न प्रेति यत्स्थितं तद्द्वितीयस्याह्नो रूपं यद् ऊर्ध्ववद्यत्प्रतिवद्यद् अन्तर्वद्यद्वृषण्वद्यद्वृधन्वद्यन्मध्यमे पदे देवता निरुच्यते यद् अन्तरिक्षम् अभ्युदितं यद्बार्हतं यत्त्रैष्टुभं यत्कुर्वद् एतानि वै द्वितीयस्याह्नो रूपाणि
yadvai neti na preti yatsthitaṃ taddvitīyasyāhno rūpaṃ yad ūrdhvavadyatprativadyad antarvadyadvṛṣaṇvadyadvṛdhanvadyanmadhyame pade devatā nirucyate yad antarikṣam abhyuditaṃ yadbārhataṃ yattraiṣṭubhaṃ yatkurvad etāni vai dvitīyasyāhno rūpāṇi
- 4
अग्निं दूतं वृणीमह इति द्वितीयस्याह्न आज्यम्भवति कुर्वद्द्वितीये ऽहनि द्वितीयस्याह्नो रूपम्
agniṃ dūtaṃ vṛṇīmaha iti dvitīyasyāhna ājyambhavati kurvaddvitīye 'hani dvitīyasyāhno rūpam
- 5
वायो ये ते सहस्रिण इति प्रौगं सुतः सोम ऋतावृधेति वृधन्वद्द्वितीये ऽहनि द्वितीयस्याह्नो रूपम्
vāyo ye te sahasriṇa iti praugaṃ sutaḥ soma ṛtāvṛdheti vṛdhanvaddvitīye 'hani dvitīyasyāhno rūpam
- 6
विश्वानरस्य वस्पतिम् इन्द्र इत्सोमपा एक इति मरुत्वतीयस्य प्रतिपदनुचरौ वृधन्वच्चान्तर्वच्च द्वितीये ऽहनि द्वितीयस्याह्नो रूपम्
viśvānarasya vaspatim indra itsomapā eka iti marutvatīyasya pratipadanucarau vṛdhanvaccāntarvacca dvitīye 'hani dvitīyasyāhno rūpam
- 7
इन्द्र नेदीय एद् इहीत्यच्युतः प्रगाथ उत्तिष्ठ ब्रह्मणस्पत इति ब्राह्मणस्पत्य ऊर्ध्ववान्द्वितीये ऽहनि द्वितीयस्याह्नो रूपम्
indra nedīya ed ihītyacyutaḥ pragātha uttiṣṭha brahmaṇaspata iti brāhmaṇaspatya ūrdhvavāndvitīye 'hani dvitīyasyāhno rūpam
- 8
अग्निर्नेता त्वं सोम क्रतुभिः पिन्वन्त्य् अप इति धाय्या अच्युता
agnirnetā tvaṃ soma kratubhiḥ pinvanty apa iti dhāyyā acyutā
- 9
बृहद् इन्द्राय गायतेति मरुत्वतीयः प्रगाथो येन ज्योतिर् अजनयन्न् ऋतावृध इति वृधन्वान्द्वितीये ऽहनि द्वितीयस्याह्नो रूपम्
bṛhad indrāya gāyateti marutvatīyaḥ pragātho yena jyotir ajanayann ṛtāvṛdha iti vṛdhanvāndvitīye 'hani dvitīyasyāhno rūpam
- 10
इन्द्र सोमं सोमपते पिबेमम् इति सूक्तम्सजोषा रुद्रैस्तृपद् आ वृषस्वेति वृषण्वद्द्वितीये ऽहनि द्वितीयस्याह्नो रूपम्
indra somaṃ somapate pibemam iti sūktamsajoṣā rudraistṛpad ā vṛṣasveti vṛṣaṇvaddvitīye 'hani dvitīyasyāhno rūpam
- 11
त्वाम् इद्धि हवामहे त्वं ह्य् एहि चेरव इति बृहत्पृष्ठम्भवति बार्हते ऽहनि द्वितीये ऽहनि द्वितीयस्याह्नो रूपम्
tvām iddhi havāmahe tvaṃ hy ehi cerava iti bṛhatpṛṣṭhambhavati bārhate 'hani dvitīye 'hani dvitīyasyāhno rūpam
- 12
यद्वावानेति धाय्याच्युता
yadvāvāneti dhāyyācyutā
- 13
उभयं शृणवच्च न इति सामप्रगाथो यच्चेदम् अद्य यद् उ च ह्य आसीद् इति बार्हते ऽहनि द्वितीये ऽहनि द्वितीयस्याह्नो रूपम्
ubhayaṃ śṛṇavacca na iti sāmapragātho yaccedam adya yad u ca hya āsīd iti bārhate 'hani dvitīye 'hani dvitīyasyāhno rūpam
- 14
त्यम् ऊ षु वाजिनं देवजूतम् इति तार्क्ष्यो ऽच्युतः
tyam ū ṣu vājinaṃ devajūtam iti tārkṣyo 'cyutaḥ

