7 shlokas
- 1
स्वरसाम्न उपयन्तीमे वै लोकाः स्वरसामान इमान्वै लोकान्स्वरसामभिर् अस्पृण्वंस्तत्स्वरसाम्नां स्वरसामत्वं तद्यत्स्वरसाम्न उपयन्त्य् एष्व् एवैनं तल्लोकेष्व् आभजन्ति
svarasāmna upayantīme vai lokāḥ svarasāmāna imānvai lokānsvarasāmabhir aspṛṇvaṃstatsvarasāmnāṃ svarasāmatvaṃ tadyatsvarasāmna upayanty eṣv evainaṃ tallokeṣv ābhajanti
- 2
तेषां वै देवाः सप्तदशानाम्प्रव्लयाद् अबिभयुः समा इव वै स्तोमा अविगूᄆहा इवेमे ह न प्रव्लियेरन्न् इति तान्सर्वैः स्तोमैर् अवस्तात्पर्यार्षन्सर्वैः पृष्ठैः परस्तात्तद्यद् अभिजित्सर्वस्तोमो ऽवस्ताद्भवति विश्वजित्सर्वपृष्ठः परस्तात्तत्सप्तदशान् उभयतः पर्यृषन्ति धृत्या अप्रव्लयाय
teṣāṃ vai devāḥ saptadaśānāmpravlayād abibhayuḥ samā iva vai stomā avigūᄆhā iveme ha na pravliyerann iti tānsarvaiḥ stomair avastātparyārṣansarvaiḥ pṛṣṭhaiḥ parastāttadyad abhijitsarvastomo 'vastādbhavati viśvajitsarvapṛṣṭhaḥ parastāttatsaptadaśān ubhayataḥ paryṛṣanti dhṛtyā apravlayāya
- 3
तस्य वै देवा आदित्यस्य स्वर्गाल्लोकाद् अवपाताद् अबिभयुस्तम्पञ्चभी रश्मिभिर् उदवयन्रश्मयो वै दिवाकीर्त्यानि महादिवाकीर्त्यं पृष्ठम्भवति विकर्णम्ब्रह्मसाम भासम् अग्निष्टोमसामोभे बृहद्रथंतरे पवमानयोर्भवतस्तद् आदित्यम्पञ्चभी रश्मिभिर् उद्वयन्ति धृत्या अनवपाताय
tasya vai devā ādityasya svargāllokād avapātād abibhayustampañcabhī raśmibhir udavayanraśmayo vai divākīrtyāni mahādivākīrtyaṃ pṛṣṭhambhavati vikarṇambrahmasāma bhāsam agniṣṭomasāmobhe bṛhadrathaṃtare pavamānayorbhavatastad ādityampañcabhī raśmibhir udvayanti dhṛtyā anavapātāya
- 4
उदित आदित्ये प्रातरनुवाकम् अनुब्रूयात्सर्वं ह्य् एवैतद् अहर्दिवाकीर्त्यम्भवति
udita āditye prātaranuvākam anubrūyātsarvaṃ hy evaitad ahardivākīrtyambhavati
- 5
सौर्यम्पशुम् अन्यङ्गश्वेतं सवनीयस्योपालम्भ्यम् आलभेरन्सूर्यदेवत्यं ह्य् एतद् अहः
sauryampaśum anyaṅgaśvetaṃ savanīyasyopālambhyam ālabheransūryadevatyaṃ hy etad ahaḥ
- 6
एकविंशतिं सामिधेनीर् अनुब्रूयात्प्रत्यक्षाद्ध्येतद् अहर् एकविंशम्
ekaviṃśatiṃ sāmidhenīr anubrūyātpratyakṣāddhyetad ahar ekaviṃśam
- 7
एकपञ्चाशतं द्विपञ्चाशतं वा शस्त्वा मध्ये निविदं दधाति तावतीर् उत्तराः शंसति शतायुर्वै पुरुषः शतवीर्यः शतेन्द्रिय आयुष्य् एवैनं तद्वीर्य इन्द्रिये दधाति
ekapañcāśataṃ dvipañcāśataṃ vā śastvā madhye nividaṃ dadhāti tāvatīr uttarāḥ śaṃsati śatāyurvai puruṣaḥ śatavīryaḥ śatendriya āyuṣy evainaṃ tadvīrya indriye dadhāti

