17 shlokas
- 1
अग्निर्वै देवता प्रथमम् अहर्वहति त्रिवृत्स्तोमो रथंतरं साम गायत्री छन्दः
agnirvai devatā prathamam aharvahati trivṛtstomo rathaṃtaraṃ sāma gāyatrī chandaḥ
- 2
यथादेवतम् एनेन यथास्तोमं यथासाम यथाछन्दसं राध्नोति य एवं वेद
yathādevatam enena yathāstomaṃ yathāsāma yathāchandasaṃ rādhnoti ya evaṃ veda
- 3
यद्वा एति च प्रेति च तत्प्रथमस्याह्नो रूपं यद्युक्तवद्यद्रथवद्यद् आशुमद्यत्पिबवद्यत्प्रथमे पदे देवता निरुच्यते यद् अयं लोको ऽभ्युदितो यद्राथंतरं यद्गायत्रं यत्करिष्यद् एतानि वै प्रथमस्याह्नो रूपाणि
yadvā eti ca preti ca tatprathamasyāhno rūpaṃ yadyuktavadyadrathavadyad āśumadyatpibavadyatprathame pade devatā nirucyate yad ayaṃ loko 'bhyudito yadrāthaṃtaraṃ yadgāyatraṃ yatkariṣyad etāni vai prathamasyāhno rūpāṇi
- 4
उपप्रयन्तो अध्वरम् इति प्रथमस्याह्न आज्यम्भवति
upaprayanto adhvaram iti prathamasyāhna ājyambhavati
- 5
प्रेति प्रथमे ऽहनि प्रथमस्याह्नो रूपम्
preti prathame 'hani prathamasyāhno rūpam
- 6
वायव् आ याहि दर्शतेति प्रौगम् एति प्रथमे ऽहनि प्रथमस्याह्नो रूपम्
vāyav ā yāhi darśateti praugam eti prathame 'hani prathamasyāhno rūpam
- 7
आ त्वा रथं यथोतय इदं वसो सुतम् अन्ध इति मरुत्वतीयस्य प्रतिपदनुचरौ रथवच्च पिबवच्च प्रथमे ऽहनि प्रथमस्याह्नो रूपम्
ā tvā rathaṃ yathotaya idaṃ vaso sutam andha iti marutvatīyasya pratipadanucarau rathavacca pibavacca prathame 'hani prathamasyāhno rūpam
- 8
इन्द्र नेदीय एद् इहीतीन्द्रनिहवः प्रगाथः प्रथमे पदे देवता निरुच्यते प्रथमे ऽहनि प्रथमस्याह्नो रूपम्
indra nedīya ed ihītīndranihavaḥ pragāthaḥ prathame pade devatā nirucyate prathame 'hani prathamasyāhno rūpam
- 9
प्रैतु ब्रह्मणस्पतिर् इति ब्राह्मणस्पत्यः प्रेति प्रथमे ऽहनि प्रथमस्याह्नो रूपम्
praitu brahmaṇaspatir iti brāhmaṇaspatyaḥ preti prathame 'hani prathamasyāhno rūpam
- 10
अग्निर्नेता त्वं सोम क्रतुभिः पिन्वन्त्य् अप इति धाय्याः प्रथमेषु पदेषु देवता निरुच्यन्ते प्रथमे ऽहनि प्रथमस्याह्नो रूपम्
agnirnetā tvaṃ soma kratubhiḥ pinvanty apa iti dhāyyāḥ prathameṣu padeṣu devatā nirucyante prathame 'hani prathamasyāhno rūpam
- 11
प्र वा इन्द्राय बृहत इति मरुत्वतीयः प्रगाथः प्रेति प्रथमे ऽहनि प्रथमस्याह्नो रूपम्
pra vā indrāya bṛhata iti marutvatīyaḥ pragāthaḥ preti prathame 'hani prathamasyāhno rūpam
- 12
आ यात्व् इन्द्रो ऽवस उप न इति सूक्तम् एति प्रथमे ऽहनि प्रथमस्याह्नो रूपम्
ā yātv indro 'vasa upa na iti sūktam eti prathame 'hani prathamasyāhno rūpam
- 13
अभि त्वा शूर नोनुमो ऽभि त्वा पूर्वपीतय इति रथंतरम्पृष्ठम्भवति राथंतरे ऽहनि प्रथमे ऽहनि प्रथमस्याह्नो रूपम्
abhi tvā śūra nonumo 'bhi tvā pūrvapītaya iti rathaṃtarampṛṣṭhambhavati rāthaṃtare 'hani prathame 'hani prathamasyāhno rūpam
- 14
यद्वावान पुरुतमम्पुराषाᄆ इति धाय्या वृत्रहेन्द्रो नामान्य् अप्रा इत्य् एति प्रथमे ऽहनि प्रथमस्याह्नो रूपम्
yadvāvāna purutamampurāṣāᄆ iti dhāyyā vṛtrahendro nāmāny aprā ity eti prathame 'hani prathamasyāhno rūpam
- 15
पिबा सुतस्य रसिन इति सामप्रगाथः पिबवान्प्रथमे ऽहनि प्रथमस्याह्नो रूपम्
pibā sutasya rasina iti sāmapragāthaḥ pibavānprathame 'hani prathamasyāhno rūpam
- 16
त्यम् ऊ षु वाजिनं देवजूतम् इति तार्क्ष्यम्पुरस्तात्सूक्तस्य शंसति स्वस्त्ययनं वै तार्क्ष्यः स्वस्तितायै
tyam ū ṣu vājinaṃ devajūtam iti tārkṣyampurastātsūktasya śaṃsati svastyayanaṃ vai tārkṣyaḥ svastitāyai
- 17
स्वस्त्ययनम् एव तत्कुरुते स्वस्ति संवत्सरस्य पारम् अश्नुते य एवं वेद
svastyayanam eva tatkurute svasti saṃvatsarasya pāram aśnute ya evaṃ veda

