30 shlokas
- 1
दूरोहणं रोहति स्वर्गो वै लोको दूरोहणम्
dūrohaṇaṃ rohati svargo vai loko dūrohaṇam
- 2
स्वर्गम् एव तल्लोकं रोहति य एवं वेद
svargam eva tallokaṃ rohati ya evaṃ veda
- 3
यद् एव दूरोहणम् असौ वै दूरोहो यो ऽसौ तपति कश्चिद्वा अत्र गच्छति स यद्दूरोहणं रोहत्य् एतम् एव तद्रोहति
yad eva dūrohaṇam asau vai dūroho yo 'sau tapati kaścidvā atra gacchati sa yaddūrohaṇaṃ rohaty etam eva tadrohati
- 4
हंसवत्या रोहति
haṃsavatyā rohati
- 5
हंसः शुचिषद् इत्य् एष वै हंसः शुचिषत्
haṃsaḥ śuciṣad ity eṣa vai haṃsaḥ śuciṣat
- 6
वसुर् अन्तरिक्षद् इत्य् एष वै वसुर् अन्तरिक्षसत्
vasur antarikṣad ity eṣa vai vasur antarikṣasat
- 7
होता वेदिषद् इत्य् एष वै होता वेदिषत्
hotā vediṣad ity eṣa vai hotā vediṣat
- 8
अतिथिर्दुरोणसद् इत्य् एष वा अतिथिर्दुरोणसत्
atithirduroṇasad ity eṣa vā atithirduroṇasat
- 9
नृषद् इत्य् एष वै नृषत्
nṛṣad ity eṣa vai nṛṣat
- 10
वरसद् इत्य् एष वै वरसद्वरं वा एतत्सद्मनां यस्मिन्न् एष आसन्नस्तपति
varasad ity eṣa vai varasadvaraṃ vā etatsadmanāṃ yasminn eṣa āsannastapati
- 11
ऋतसद् इत्य् एष वै सत्यसत्
ṛtasad ity eṣa vai satyasat
- 12
व्योमसद् इत्य् एष वै व्योमसद्व्योम वा एतत्सद्मनां यस्मिन्न् एष आसन्नस्तपति
vyomasad ity eṣa vai vyomasadvyoma vā etatsadmanāṃ yasminn eṣa āsannastapati
- 14
गोजा इत्य् एष वै गोजाः
gojā ity eṣa vai gojāḥ
- 15
ऋतजा इत्य् एष वै सत्यजाः
ṛtajā ity eṣa vai satyajāḥ
- 16
अद्रिजा इत्य् एष वा अद्रिजाः
adrijā ity eṣa vā adrijāḥ
- 17
ऋतम् इत्य् एष वै सत्यम्
ṛtam ity eṣa vai satyam
- 18
एष एतानि सर्वाण्य् एषा ह वा अस्य छन्दस्सु प्रत्यक्षतमाद् इव रूपम्
eṣa etāni sarvāṇy eṣā ha vā asya chandassu pratyakṣatamād iva rūpam
- 19
तस्माद्यत्र क्व च दूरोहणं रोहेद्धंसवत्यैव रोहेत्
tasmādyatra kva ca dūrohaṇaṃ roheddhaṃsavatyaiva rohet
- 20
तार्क्ष्ये स्वर्गकामस्य रोहेत्
tārkṣye svargakāmasya rohet
- 21
तार्क्ष्यो ह वा एतम्पूर्वो ऽध्वानम् ऐद्यत्रादो गायत्री सुपर्णो भूत्वा सोमम् आहरत्तद्यथा क्षेत्रज्ञम् अध्वनः पुरएतारं कुर्वीत तादृक्तद्यद् एव तार्क्ष्ये ऽयं वै तार्क्ष्यो यो ऽयम्पवत एष स्वर्गस्य लोकस्याभिवोᄆहा
tārkṣyo ha vā etampūrvo 'dhvānam aidyatrādo gāyatrī suparṇo bhūtvā somam āharattadyathā kṣetrajñam adhvanaḥ puraetāraṃ kurvīta tādṛktadyad eva tārkṣye 'yaṃ vai tārkṣyo yo 'yampavata eṣa svargasya lokasyābhivoᄆhā
- 22
त्यम् ऊ षु वाजिनं देवजूतम् इत्य् एष वै वाजी देवजूतः
tyam ū ṣu vājinaṃ devajūtam ity eṣa vai vājī devajūtaḥ
- 23
सहावानं तरुतारं रथानाम् इत्य् एष वै सहावांस्तरुतैष हीमांल्लोकान्सद्यस्तरति
sahāvānaṃ tarutāraṃ rathānām ity eṣa vai sahāvāṃstarutaiṣa hīmāṃllokānsadyastarati
- 24
अरिष्टनेमिम्पृतनाजम् आशुम् इत्य् एष वा अरिष्टनेमिः पृतनाजिद् आशुः
ariṣṭanemimpṛtanājam āśum ity eṣa vā ariṣṭanemiḥ pṛtanājid āśuḥ
- 25
स्वस्तय इति स्वस्तिताम् आशास्ते
svastaya iti svastitām āśāste
- 26
तार्क्ष्यम् इहा हुवेमेति ह्वयत्य् एवैनम् एतत्
tārkṣyam ihā huvemeti hvayaty evainam etat
- 27
इन्द्रस्येव रातिम् आजोहुवानाः स्वस्तय इति स्वस्तिताम् एवाशास्ते
indrasyeva rātim ājohuvānāḥ svastaya iti svastitām evāśāste
- 28
नावम् इवा रुहेमेति सम् एवैनम् एतद् अधिरोहति स्वर्गस्य लोकस्य समष्ट्यै सम्पत्त्यै संगत्यै
nāvam ivā ruhemeti sam evainam etad adhirohati svargasya lokasya samaṣṭyai sampattyai saṃgatyai
- 29
उर्वी न पृथ्वी बहुले गभीरे मा वाम् एतौ मा परेतौ रिषामेतीमे एवैतद् अनुमन्त्रयत आ च परा च मेष्यन्
urvī na pṛthvī bahule gabhīre mā vām etau mā paretau riṣāmetīme evaitad anumantrayata ā ca parā ca meṣyan
- 30
सद्यश्चिद्यः शवसा पञ्च कृष्टीः सूर्य इव ज्योतिषापस्ततानेति प्रत्यक्षं सूर्यम् अभिवदति
sadyaścidyaḥ śavasā pañca kṛṣṭīḥ sūrya iva jyotiṣāpastatāneti pratyakṣaṃ sūryam abhivadati
- 31
सहस्रसाः शतसा अस्य रंहिर्न स्मा वरन्ते युवतिं न शर्याम् इत्य् आशिषम् एवैतेनाशास्त आत्मने च यजमानेभ्यश्च
sahasrasāḥ śatasā asya raṃhirna smā varante yuvatiṃ na śaryām ity āśiṣam evaitenāśāsta ātmane ca yajamānebhyaśca

