10 shlokas
- 1
चतुर्विंशम् एतद् अहर् उपयन्त्य् आरम्भणीयम्
caturviṃśam etad ahar upayanty ārambhaṇīyam
- 2
एतेन वै संवत्सरम् आरभन्त एतेन स्तोमांश्च छन्दांसि चैतेन सर्वा देवता अनारब्धं वै तच्छन्दो ऽनारब्धा सा देवता यद् एतस्मिन्न् अहनि नारभन्ते तद् आरम्भणीयस्यारम्भणीयत्वम्
etena vai saṃvatsaram ārabhanta etena stomāṃśca chandāṃsi caitena sarvā devatā anārabdhaṃ vai tacchando 'nārabdhā sā devatā yad etasminn ahani nārabhante tad ārambhaṇīyasyārambhaṇīyatvam
- 3
चतुर्विंशः स्तोमो भवति तच्चतुर्विंशस्य चतुर्विंशत्वम्
caturviṃśaḥ stomo bhavati taccaturviṃśasya caturviṃśatvam
- 4
चतुर्विंशतिर्वा अर्धमासा अर्धमासश एव तत्संवत्सरम् आरभन्ते
caturviṃśatirvā ardhamāsā ardhamāsaśa eva tatsaṃvatsaram ārabhante
- 5
उक्थ्यो भवति पशवो वा उक्थानि पशूनाम् अवरुद्ध्यै
ukthyo bhavati paśavo vā ukthāni paśūnām avaruddhyai
- 6
तस्य पञ्चदश स्तोत्राणि भवन्ति पञ्चदश शस्त्रानि स मासो मासश एव तत्संवत्सरम् आरभन्ते
tasya pañcadaśa stotrāṇi bhavanti pañcadaśa śastrāni sa māso māsaśa eva tatsaṃvatsaram ārabhante
- 7
तस्य षष्टिश्च त्रीणि च शतानि स्तोत्रियास्तावन्ति संवत्सरस्याहान्य् अहश्श एव तत्संवत्सरम् आरभन्ते
tasya ṣaṣṭiśca trīṇi ca śatāni stotriyāstāvanti saṃvatsarasyāhāny ahaśśa eva tatsaṃvatsaram ārabhante
- 8
अग्निष्टोम एतद् अहः स्याद् इत्य् आहुर् अग्निष्टोमो वै संवत्सरो न वा एतद् अन्यो ऽग्निष्टोमाद् अहर्दाधार न विव्याचेति
agniṣṭoma etad ahaḥ syād ity āhur agniṣṭomo vai saṃvatsaro na vā etad anyo 'gniṣṭomād ahardādhāra na vivyāceti
- 9
स यद्य् अग्निष्टोमः स्याद् अष्टाचत्वारिंशास्त्रयः पवमानाः स्युश्चतुर्विंशानीतराणि स्तोत्राणि तद् उ षष्टिश्चैव त्रीणि च शतानि स्तोत्रियास्तावन्ति संवत्सरस्याहान्य् अहश्श एव तत्संवत्सरम् आरभन्ते
sa yady agniṣṭomaḥ syād aṣṭācatvāriṃśāstrayaḥ pavamānāḥ syuścaturviṃśānītarāṇi stotrāṇi tad u ṣaṣṭiścaiva trīṇi ca śatāni stotriyāstāvanti saṃvatsarasyāhāny ahaśśa eva tatsaṃvatsaram ārabhante
- 10
उक्थ्य एव स्यात्पशुसमृद्धो यज्ञः पशुसमृद्धं सत्रं सर्वाणि चतुर्विंशानि स्तोत्राणि प्रत्यक्षाद्ध्येतद् अहश्चतुर्विंशं तस्माद् उक्थ्य एव स्यात्
ukthya eva syātpaśusamṛddho yajñaḥ paśusamṛddhaṃ satraṃ sarvāṇi caturviṃśāni stotrāṇi pratyakṣāddhyetad ahaścaturviṃśaṃ tasmād ukthya eva syāt

