11 shlokas
- 1
अस्वतन्त्रा स्त्री पुरुषप्रधाना
asvatantrā strī puruṣapradhānā
- 2
अनग्निकानुदक्या वामृतम् इति विज्ञायते
anagnikānudakyā vāmṛtam iti vijñāyate
- 3
अथाप्य् उदाहरन्ति
पिता रक्षति कौमारे भर्ता रक्षति यौवने
पुत्रश्च स्थविरे भावे न स्त्री स्वातन्त्र्यम् अर्हतीति
athāpy udāharanti
pitā rakṣati kaumāre bhartā rakṣati yauvane
putraśca sthavire bhāve na strī svātantryam arhatīti
- 4
तस्या भर्तुर् अभिचार उक्तं प्रायश्चित्तं रहस्येषु
tasyā bhartur abhicāra uktaṃ prāyaścittaṃ rahasyeṣu
- 5
मासि मासि रजो ह्य् आसां दुष्कृतान्य् अपकर्षति
māsi māsi rajo hy āsāṃ duṣkṛtāny apakarṣati
- 6
त्रिरात्रं रजस्वलाशुचिर्भवति
trirātraṃ rajasvalāśucirbhavati
- 7
सा नाञ्ज्यान्नाभ्यञ्ज्यान्नाप्सु स्नायाद् अधः शयीत न दिवा स्वप्यान्नाग्निं स्पृशेन्न रज्जुं सृजेन्न दन्तान्धावयेन्न मांसम् अश्नीयान्न ग्रहान्निरीक्षेत न हसेन्न किंचिद् आचरेन्न धावेद् अखर्वेण पात्रेण पिबेद् अञ्जलिना वा पिबेल्लोहितायसेन वा
sā nāñjyānnābhyañjyānnāpsu snāyād adhaḥ śayīta na divā svapyānnāgniṃ spṛśenna rajjuṃ sṛjenna dantāndhāvayenna māṃsam aśnīyānna grahānnirīkṣeta na hasenna kiṃcid ācarenna dhāved akharveṇa pātreṇa pibed añjalinā vā pibellohitāyasena vā
- 8
विज्ञायते हि
इन्द्रस्त्रिशीर्षाणं त्वाष्ट्रं हत्वा पाप्मगृहीतो महत्तमाधर्मसम्बद्धो ऽहम् इत्य् एवम् आत्मानम् अमन्यत
तं सर्वाणि भूतान्य् अभ्यक्रोशन्भ्रूणहन्भ्रूणहन्न् इति
स स्त्रिय उपाधावद् अस्यै मे भ्रूणहत्यायै तृतीयं भागं प्रतिगृह्णीतेति
ता अब्रवन्किं नो भूयाद् इति
सो ऽब्रवीद्वरं वृणीध्वम् इति
ता अब्रुवन्न् ऋतौ प्रजां विन्दामह इति कामम् आ विजनितोः संभवामेति
तथेति ताः प्रतिजगृहुः सैषा भ्रूणहत्या मासि मास्य् आविर्भवति तस्माद्रजस्वलाया अन्नं नाश्नीयाद्भ्रूणहत्याया एवैषा रूपं प्रतिमुच्यास्ते
vijñāyate hi
indrastriśīrṣāṇaṃ tvāṣṭraṃ hatvā pāpmagṛhīto mahattamādharmasambaddho 'ham ity evam ātmānam amanyata
taṃ sarvāṇi bhūtāny abhyakrośanbhrūṇahanbhrūṇahann iti
sa striya upādhāvad asyai me bhrūṇahatyāyai tṛtīyaṃ bhāgaṃ pratigṛhṇīteti
tā abravankiṃ no bhūyād iti
so 'bravīdvaraṃ vṛṇīdhvam iti
tā abruvann ṛtau prajāṃ vindāmaha iti kāmam ā vijanitoḥ saṃbhavāmeti
tatheti tāḥ pratijagṛhuḥ saiṣā bhrūṇahatyā māsi māsy āvirbhavati tasmādrajasvalāyā annaṃ nāśnīyādbhrūṇahatyāyā evaiṣā rūpaṃ pratimucyāste
- 9
तद् आहुः
अञ्जनाभ्यञ्जनम् एवास्या न प्रतिग्राह्यं तद्धि स्त्रिया अन्नम् इति
तस्मात्तस्यै च तत्र च बीभत्सन्ते मेयम् उपागाद् इति
tad āhuḥ
añjanābhyañjanam evāsyā na pratigrāhyaṃ taddhi striyā annam iti
tasmāttasyai ca tatra ca bībhatsante meyam upāgād iti
- 10
उदक्यास्त्व् आसते येषां ये च केचिद् अनग्नयः
कुलं चाश्रोत्रियम्येषां सर्वे ते शूद्रधर्मिण इति
udakyāstv āsate yeṣāṃ ye ca kecid anagnayaḥ
kulaṃ cāśrotriyamyeṣāṃ sarve te śūdradharmiṇa iti
- 11
सर्वे ते शूद्रधर्मिण इति
sarve te śūdradharmiṇa iti

