11 shlokas
- 1
धर्मं चरत माधर्मं सत्यं वदत मानृतम्
दीर्घं पश्यत मा ह्रस्वं परं पश्यत मापरम्
dharmaṃ carata mādharmaṃ satyaṃ vadata mānṛtam
dīrghaṃ paśyata mā hrasvaṃ paraṃ paśyata māparam
- 2
ब्राह्मणो भवत्य् अग्निः
brāhmaṇo bhavaty agniḥ
- 3
अग्निर्वै ब्राह्मण इति श्रुतेः
agnirvai brāhmaṇa iti śruteḥ
- 4
तच्च कथम्
tacca katham
- 5
तत्र सदो ब्राह्मणस्य शरीरं वेदिः संकल्पो यज्ञः पशुर् आत्मा रशना बुद्धिः सदो मुखम् आहवनीयं नाभ्याम् उदरो ऽग्निर्गार्हपत्यः प्राणो ऽध्वर्युर् अपानो होता व्यानो ब्रह्मा समान उद्गातात्मेन्द्रियाणि यज्ञपात्राणि य एवं विद्वान् इन्द्रियैर् इन्द्रियार्थं जुहोतीत्य् अपि च काठके विज्ञायते
tatra sado brāhmaṇasya śarīraṃ vediḥ saṃkalpo yajñaḥ paśur ātmā raśanā buddhiḥ sado mukham āhavanīyaṃ nābhyām udaro 'gnirgārhapatyaḥ prāṇo 'dhvaryur apāno hotā vyāno brahmā samāna udgātātmendriyāṇi yajñapātrāṇi ya evaṃ vidvān indriyair indriyārthaṃ juhotīty api ca kāṭhake vijñāyate
- 6
अथाप्य् उदाहरन्ति
पाति त्राति च दातारम् आत्मानं चैव किल्बिषात्
वेदेन्धनसमृद्धेषु हुतं विप्रमुखाग्निषु
athāpy udāharanti
pāti trāti ca dātāram ātmānaṃ caiva kilbiṣāt
vedendhanasamṛddheṣu hutaṃ vipramukhāgniṣu
- 7
न स्कन्दते न व्यथते नैनम् अध्यापतेच्च यत्
वरिष्ठम् अग्निहोत्रात्तु ब्राह्मणस्य मुखे हुतम्
na skandate na vyathate nainam adhyāpatecca yat
variṣṭham agnihotrāttu brāhmaṇasya mukhe hutam
- 8
ध्यानाग्निः सत्योपचयनं क्षान्त्याहुतिः स्रुवं ह्रीः पुरोडाशम् अहिंसा संतोषः
यूपः कृच्छ्रं भूतेभ्यो ऽभयदाक्षिण्यम् इति कृत्वा क्रतुमानसं याति क्षयं बुधः
dhyānāgniḥ satyopacayanaṃ kṣāntyāhutiḥ sruvaṃ hrīḥ puroḍāśam ahiṃsā saṃtoṣaḥ
yūpaḥ kṛcchraṃ bhūtebhyo 'bhayadākṣiṇyam iti kṛtvā kratumānasaṃ yāti kṣayaṃ budhaḥ
- 9
जीर्यन्ति जीर्यतः केशा दन्ता जीर्यन्ति जीर्यतः
जीवनाशा धनाशा च जीर्यतो ऽपि न जीर्यति
jīryanti jīryataḥ keśā dantā jīryanti jīryataḥ
jīvanāśā dhanāśā ca jīryato 'pi na jīryati
- 10
या दुस्त्यजा दुर्मतिभिर्या न जीर्यति जीर्यतः
यासौ प्राणान्तिको व्याधिस्तां तृष्णां त्यजतः सुखम् इति
yā dustyajā durmatibhiryā na jīryati jīryataḥ
yāsau prāṇāntiko vyādhistāṃ tṛṣṇāṃ tyajataḥ sukham iti
- 11
नमो ऽस्तु मित्रावरुणयोर् उर्वश्यात्मजाय शतयातवे वसिष्ठाय वसिष्ठायेति
namo 'stu mitrāvaruṇayor urvaśyātmajāya śatayātave vasiṣṭhāya vasiṣṭhāyeti

