18 shlokas
- 1
शूद्रेण ब्राह्मण्याम् उत्पन्नश्चाण्डालो भवतीत्य् आहुः
śūdreṇa brāhmaṇyām utpannaścāṇḍālo bhavatīty āhuḥ
- 2
राजन्यायां वैणः
rājanyāyāṃ vaiṇaḥ
- 3
वैश्यायाम् अन्त्यावसायी
vaiśyāyām antyāvasāyī
- 4
वैश्येन ब्राह्मण्याम् उत्पन्नो रामको भवतीत्य् आहुः
vaiśyena brāhmaṇyām utpanno rāmako bhavatīty āhuḥ
- 5
राजन्यायां पुल्कसः
rājanyāyāṃ pulkasaḥ
- 6
राजन्येन ब्राह्मण्याम् उत्पन्नः सूतो भवतीत्य् आहुः
rājanyena brāhmaṇyām utpannaḥ sūto bhavatīty āhuḥ
- 7
अथाप्य् उदाहरन्ति
छन्नोत्पन्नाश्च ये केचित्प्रातिलोम्यगुणाश्रिताः
गुणाचारपरिभ्रंशात्कर्मभिस्तान्विजानीयुर् इति
athāpy udāharanti
channotpannāśca ye kecitprātilomyaguṇāśritāḥ
guṇācāraparibhraṃśātkarmabhistānvijānīyur iti
- 8
एकान्तराद्व्यन्तरात्र्यन्तरासु जाता ब्राह्मणक्षत्रियवैश्यैर् अम्बष्ठोग्रनिषादा भवन्ति
ekāntarādvyantarātryantarāsu jātā brāhmaṇakṣatriyavaiśyair ambaṣṭhograniṣādā bhavanti
- 9
शूद्राणां पारशवः
śūdrāṇāṃ pāraśavaḥ
- 10
पारशवो नेव जीवन्न् एव शवो भवतीत्य् आहुः
pāraśavo neva jīvann eva śavo bhavatīty āhuḥ
- 11
एके वा एतच्छ्मशानं ये शूद्राः
eke vā etacchmaśānaṃ ye śūdrāḥ
- 12
तस्माच्छूद्रसमीपे नाध्येतव्यम्
tasmācchūdrasamīpe nādhyetavyam
- 13
अथापि यमगीताञ्श्लोकान् उदाहरन्ति
श्मशानम् एतत्प्रत्यक्षं ये शूद्राः पापचारिणः
तस्माच्छूद्रसमीपे तु नाध्येतव्यं कदाचन
athāpi yamagītāñślokān udāharanti
śmaśānam etatpratyakṣaṃ ye śūdrāḥ pāpacāriṇaḥ
tasmācchūdrasamīpe tu nādhyetavyaṃ kadācana
- 14
न शूद्राय मतिं दद्यान्नोच्छिष्टं न हविष्कृतम्
न चास्योपदिशेद्धर्मं न चास्य व्रतम् आदिशेत्
na śūdrāya matiṃ dadyānnocchiṣṭaṃ na haviṣkṛtam
na cāsyopadiśeddharmaṃ na cāsya vratam ādiśet
- 15
यश्चास्योपदिशेद्धर्मं यश्चास्य व्रतम् आदिशेत्
सो ऽसंवृत्तं तमो घोरं सह तेन प्रपद्यत इति
yaścāsyopadiśeddharmaṃ yaścāsya vratam ādiśet
so 'saṃvṛttaṃ tamo ghoraṃ saha tena prapadyata iti
- 16
व्रणद्वारे कृमिर्यस्य संभवेत कदाचन
प्राजापत्येन शुध्येत हिरण्यं गौर्वासो दक्षिणा इति
vraṇadvāre kṛmiryasya saṃbhaveta kadācana
prājāpatyena śudhyeta hiraṇyaṃ gaurvāso dakṣiṇā iti
- 17
नाग्निं चित्वा रामाम् उपेयात्
nāgniṃ citvā rāmām upeyāt
- 18
कृष्णवर्णा या रामा रमणायैव न धर्माय न धर्मायेति
kṛṣṇavarṇā yā rāmā ramaṇāyaiva na dharmāya na dharmāyeti

