87 shlokas
- 1
ऋणम् अस्मिन्संनयत्य् अमृतत्वं च गच्छति
पिता पुत्रस्य जातस्य पश्येच्चेज्जीवतो मुखम्
ṛṇam asminsaṃnayaty amṛtatvaṃ ca gacchati
pitā putrasya jātasya paśyeccejjīvato mukham
- 2
अनन्ताः पुत्रिणां लोका नापुत्रस्य लोको ऽस्ति
anantāḥ putriṇāṃ lokā nāputrasya loko 'sti
- 3
अप्रजाः सन्त्व् अत्रिण इत्य् अभिशापः
aprajāḥ santv atriṇa ity abhiśāpaḥ
- 4
प्रजाभिर् अग्ने अमृतत्वम् अश्याम् इत्य् अपि निगमो भवति
prajābhir agne amṛtatvam aśyām ity api nigamo bhavati
- 5
पुत्रेण लोकाञ्जयति पौत्रेणानन्त्यम् अश्नुते
अथ पुत्रस्य पौत्रेण ब्रध्नस्याप्नोति विष्टपम् इति
putreṇa lokāñjayati pautreṇānantyam aśnute
atha putrasya pautreṇa bradhnasyāpnoti viṣṭapam iti
- 6
क्षेत्रिणः पुत्रो जनयितुः पुत्र इति विवदन्ते
kṣetriṇaḥ putro janayituḥ putra iti vivadante
- 7
तत्रोभयथाप्य् उदाहरन्ति
tatrobhayathāpy udāharanti
- 8
यद्य् अन्यगोषु वृषभो वत्सानां जनयेच्छतम्
गोमिनाम् एव ते वत्सा मोघं स्यन्दितम् आर्षभम् इति
yady anyagoṣu vṛṣabho vatsānāṃ janayecchatam
gominām eva te vatsā moghaṃ syanditam ārṣabham iti
- 9
अप्रमत्ता रक्षत तन्तुम् एतं मा वः क्षेत्रे परबीजानि वाप्सुः
जनयितुः पुत्रो भवति संपराये मोघं वेत्ता कुरुते तन्तुम् एतम् इति
apramattā rakṣata tantum etaṃ mā vaḥ kṣetre parabījāni vāpsuḥ
janayituḥ putro bhavati saṃparāye moghaṃ vettā kurute tantum etam iti
- 10
बहूनाम् एकजातानाम् एकश्चेत्पुत्रवान्नरः
सर्वे ते तेन पुत्रेण पुत्रवन्त इति श्रुतिः
bahūnām ekajātānām ekaścetputravānnaraḥ
sarve te tena putreṇa putravanta iti śrutiḥ
- 11
बह्वीनाम् एकपत्नीनाम् एका पुत्रवती यदि
सर्वास्तास्तेन पुत्रेण पुत्रवन्त्य इति श्रुतिः
bahvīnām ekapatnīnām ekā putravatī yadi
sarvāstāstena putreṇa putravantya iti śrutiḥ
- 12
द्वादश इत्य् एव पुत्राः पुराणदृष्टाः
dvādaśa ity eva putrāḥ purāṇadṛṣṭāḥ
- 13
स्वयम् उत्पादितः स्वक्षेत्रे संस्कृतायां प्रथमः
svayam utpāditaḥ svakṣetre saṃskṛtāyāṃ prathamaḥ
- 14
तदलाभे नियुक्तायां क्षेत्रजो द्वितीयः
tadalābhe niyuktāyāṃ kṣetrajo dvitīyaḥ
- 15
तृतीयः पुत्रिका
tṛtīyaḥ putrikā
- 16
विज्ञायते ऽभ्रातृका पुंसः पितॄन् अभ्येति प्रतीचीनं गच्छति पुत्रत्वम्
vijñāyate 'bhrātṛkā puṃsaḥ pitṝn abhyeti pratīcīnaṃ gacchati putratvam
- 17
तत्र श्लोकः
अभ्रातृकां प्रदास्यामि तुभ्यं कन्याम् अलंकृताम्
अस्यां यो जायते पुत्रः स मे पुत्रो भवेद् इति
tatra ślokaḥ
abhrātṛkāṃ pradāsyāmi tubhyaṃ kanyām alaṃkṛtām
asyāṃ yo jāyate putraḥ sa me putro bhaved iti
- 18
पौनर्भवश्चतुर्थः
paunarbhavaścaturthaḥ
- 19
या कौमारं भर्त्तारम् उत्सृज्यान्यैः सह चरित्वा तस्यैव कुटुम्बम् आश्रयति सा पुनर्भूर्भवति
yā kaumāraṃ bharttāram utsṛjyānyaiḥ saha caritvā tasyaiva kuṭumbam āśrayati sā punarbhūrbhavati
- 20
या च क्लीबं पतितम् उन्मत्तं वा भर्त्तारम् उत्सृज्यान्यं पतिं विन्दते मृते वा सा पुनर्भूर्भवति
yā ca klībaṃ patitam unmattaṃ vā bharttāram utsṛjyānyaṃ patiṃ vindate mṛte vā sā punarbhūrbhavati
- 21
कानीनः पञ्चमः
kānīnaḥ pañcamaḥ
- 22
यं पितृगृहे ऽसंस्कृता कामाद् उत्पादयेन्मातामहस्य पुत्रो भवतीत्य् आहुः
yaṃ pitṛgṛhe 'saṃskṛtā kāmād utpādayenmātāmahasya putro bhavatīty āhuḥ
- 23
अथाप्य् उदाहरन्ति
अप्रत्ता दुहिता यस्य पुत्रं विन्देत तुल्यतः
पुत्री मातामहस्तेन दद्यात्पिण्डं हरेद्धनम् इति
athāpy udāharanti
aprattā duhitā yasya putraṃ vindeta tulyataḥ
putrī mātāmahastena dadyātpiṇḍaṃ hareddhanam iti
- 24
गृहे च गूढोत्पन्नः षष्ठः
gṛhe ca gūḍhotpannaḥ ṣaṣṭhaḥ
- 25
इत्य् एते दायादा बान्धवास्त्रातारो महतो भयाद् इत्य् आहुः
ity ete dāyādā bāndhavāstrātāro mahato bhayād ity āhuḥ
- 26
अथादायादबन्धूनां सहोढ एव प्रथमः
athādāyādabandhūnāṃ sahoḍha eva prathamaḥ
- 27
या गर्भिणी संस्क्रियते सहोढः पुत्रो भवति
yā garbhiṇī saṃskriyate sahoḍhaḥ putro bhavati
- 28
दत्तको द्वितीयः
dattako dvitīyaḥ
- 29
यं मातापितरौ दद्याताम्
yaṃ mātāpitarau dadyātām
- 30
क्रीतस्तृतीयः
krītastṛtīyaḥ

