39 shlokas
- 1
प्रकृतिविशिष्टं चातुर्वर्ण्यं संस्कारविशेषाच्च
prakṛtiviśiṣṭaṃ cāturvarṇyaṃ saṃskāraviśeṣācca
- 2
ब्राह्मणो ऽस्य मुखम् आसीद्बाहू राजन्यः कृतः
ऊरू तद् अस्य यद्वैश्यः पद्भ्यां शूद्रो अजायत
brāhmaṇo 'sya mukham āsīdbāhū rājanyaḥ kṛtaḥ
ūrū tad asya yadvaiśyaḥ padbhyāṃ śūdro ajāyata
- 3
इत्य् अपि निगमो भवति
ity api nigamo bhavati
- 4
गायत्र्या ब्राह्मणम् असृजत त्रिष्टुभा राजन्यं जगत्या वैश्यं न केनचिच्छन्दसा शूद्रम् इत्य् असंस्कार्यो विज्ञायते
gāyatryā brāhmaṇam asṛjata triṣṭubhā rājanyaṃ jagatyā vaiśyaṃ na kenacicchandasā śūdram ity asaṃskāryo vijñāyate
- 5
सर्वेषां सत्यम् अक्रोधो दानम् अहिंसा प्रजननं च
sarveṣāṃ satyam akrodho dānam ahiṃsā prajananaṃ ca
- 6
पितृदेवतातिथिपूजायाम् अप्य् एव पशुं हिंस्याद् इति मानवम्
pitṛdevatātithipūjāyām apy eva paśuṃ hiṃsyād iti mānavam
- 7
मधुपर्के च यज्ञे च पितृदैवतकर्मणि
अत्रैव च पशुं हिंस्यान्नान्यथेत्य् अब्रवीन्मनुः
madhuparke ca yajñe ca pitṛdaivatakarmaṇi
atraiva ca paśuṃ hiṃsyānnānyathety abravīnmanuḥ
- 8
नाकृत्वा प्राणिनां हिंसां मांसम् उत्पद्यते क्वचित्
न च प्राणिवधः स्वर्ग्यस्तस्माद्यागे वधो ऽवधः
nākṛtvā prāṇināṃ hiṃsāṃ māṃsam utpadyate kvacit
na ca prāṇivadhaḥ svargyastasmādyāge vadho 'vadhaḥ
- 9
अथापि ब्राह्मणाय वा राजन्याय वाभ्यागताय महोक्षाणं वा महाजं वा पचेद् एवम् अस्मा आतिथ्यं कुर्वन्तीति
athāpi brāhmaṇāya vā rājanyāya vābhyāgatāya mahokṣāṇaṃ vā mahājaṃ vā paced evam asmā ātithyaṃ kurvantīti
- 10
उदकक्रियाशौचं च द्विवर्षं प्रभृति
udakakriyāśaucaṃ ca dvivarṣaṃ prabhṛti
- 11
आ दन्तजननाद् इत्य् एके
ā dantajananād ity eke
- 12
शरीरम् अग्निना संयोज्यानवेक्षमाणा अपो ऽभ्यवयन्ति
śarīram agninā saṃyojyānavekṣamāṇā apo 'bhyavayanti
- 13
सव्येतराभ्यां पाणिभ्याम् उदकक्रियां कुर्वीरन्न् अयुग्मासु दक्षिणामुखाः
savyetarābhyāṃ pāṇibhyām udakakriyāṃ kurvīrann ayugmāsu dakṣiṇāmukhāḥ
- 14
पितॄणां वा एषा दिग्या दक्षिणा
pitṝṇāṃ vā eṣā digyā dakṣiṇā
- 15
गृहान्व्रजित्वा प्रस्तरे त्र्यहम् अनश्नन्त आसीरन्
gṛhānvrajitvā prastare tryaham anaśnanta āsīran
- 16
अशक्तौ क्रीतोत्पन्नेन वर्तेरन्
aśaktau krītotpannena varteran
- 17
दशाहं शावम् आशौचं सपिण्डेषु विधीयते
daśāhaṃ śāvam āśaucaṃ sapiṇḍeṣu vidhīyate
- 18
सपिण्डत्वं साप्तपुरुषं विज्ञायते
sapiṇḍatvaṃ sāptapuruṣaṃ vijñāyate
- 19
प्रत्तानां च स्त्रीणां त्रिपुरुषं विज्ञायते
prattānāṃ ca strīṇāṃ tripuruṣaṃ vijñāyate
- 20
प्रत्तानाम् इतरे कुर्वीरंस्ताश्च तेषाम्
prattānām itare kurvīraṃstāśca teṣām
- 21
जनने ऽप्य् एवम् एव स्यान्निपुणां शुद्धिम् इच्छताम्
janane 'py evam eva syānnipuṇāṃ śuddhim icchatām
- 22
मातापित्रोर्वा
mātāpitrorvā
- 23
तन्निमित्तत्वान्मातुर् इत्य् एके
tannimittatvānmātur ity eke
- 24
अथाप्य् उदाहरन्ति
नाशौचं सूतके पुंसः संसर्गं चेन्न गच्छति
रजस्तत्राशुचि ज्ञेयं तच्च पुंसि न विद्यत इति
athāpy udāharanti
nāśaucaṃ sūtake puṃsaḥ saṃsargaṃ cenna gacchati
rajastatrāśuci jñeyaṃ tacca puṃsi na vidyata iti
- 25
तच्चेद् अन्तः पुनर् आपतेच्छेषेण शुध्येरन्
tacced antaḥ punar āpateccheṣeṇa śudhyeran
- 26
रात्रिशेषे द्वाभ्याम्
rātriśeṣe dvābhyām
- 27
प्रभाते तिसृभिः
prabhāte tisṛbhiḥ
- 28
ब्राह्मणो दशरात्रेण
brāhmaṇo daśarātreṇa
- 29
पञ्चदशरात्रेण राजन्यः
pañcadaśarātreṇa rājanyaḥ
- 30
विंशतिरात्रेण वैश्यः
viṃśatirātreṇa vaiśyaḥ

