23 shlokas
- 1
न स्त्री दुष्यति जारेण न विप्रो वेदकर्मणा
नापो मूत्रपुरीषेण नाग्निर्दहनकर्मणा
na strī duṣyati jāreṇa na vipro vedakarmaṇā
nāpo mūtrapurīṣeṇa nāgnirdahanakarmaṇā
- 2
स्वयं विप्रतिपन्ना वा यदि वा विप्रवासिता
बलात्कारोपभुक्ता वा चोरहस्तगतापि वा
svayaṃ vipratipannā vā yadi vā vipravāsitā
balātkāropabhuktā vā corahastagatāpi vā
- 3
न त्याज्या दूषिता नारी नास्यास्त्यागो विधीयते
पुष्पकालम् उपासीत ऋतुकालेन शुध्यति
na tyājyā dūṣitā nārī nāsyāstyāgo vidhīyate
puṣpakālam upāsīta ṛtukālena śudhyati
- 4
स्त्रियः पवित्रम् अतुलं नैता दुष्यन्ति कर्हिचित्
मासि मासि रजो ह्य् आसां दुष्कृतान्य् अपकर्षति
striyaḥ pavitram atulaṃ naitā duṣyanti karhicit
māsi māsi rajo hy āsāṃ duṣkṛtāny apakarṣati
- 5
पूर्वं स्त्रियः सुरैर्भुक्ताः सोमगन्धर्ववह्निभिः
गच्छन्ति मानुषान्पश्चान्नैता दुष्यन्ति धर्मतः
pūrvaṃ striyaḥ surairbhuktāḥ somagandharvavahnibhiḥ
gacchanti mānuṣānpaścānnaitā duṣyanti dharmataḥ
- 6
तासां सोमो ऽददच्छौचं गन्धर्वः शिक्षितां गिरम्
अग्निश्च सर्वमेध्यत्वं तस्मान्निष्कल्मषाः स्त्रियः
tāsāṃ somo 'dadacchaucaṃ gandharvaḥ śikṣitāṃ giram
agniśca sarvamedhyatvaṃ tasmānniṣkalmaṣāḥ striyaḥ
- 7
त्रीणि स्त्रियः पातकानि लोके धर्मविदो विदुः
भर्तृवधो भ्रूणहत्या स्वस्य गर्भस्य पातनम्
trīṇi striyaḥ pātakāni loke dharmavido viduḥ
bhartṛvadho bhrūṇahatyā svasya garbhasya pātanam
- 8
वत्सः प्रस्रवणे मेध्यः शकुनिः फलपातने
स्त्रियश्च रतिसंसर्गे श्वा मृगग्रहणे शुचिः
vatsaḥ prasravaṇe medhyaḥ śakuniḥ phalapātane
striyaśca ratisaṃsarge śvā mṛgagrahaṇe śuciḥ
- 9
अजाश्वा मुखतो मेध्या गावो मेध्यास्तु सर्वतः
ajāśvā mukhato medhyā gāvo medhyāstu sarvataḥ
- 10
सर्ववेदपवित्राणि वक्ष्याम्य् अहम् अतः परम्
येषां जपैश्च होमैश्च पूयन्ते नात्र संशयः
sarvavedapavitrāṇi vakṣyāmy aham ataḥ param
yeṣāṃ japaiśca homaiśca pūyante nātra saṃśayaḥ
- 11
अघमर्षणं देवकृतं शुद्धवत्यस्तरत्समाः
कूष्माण्डानि पावमान्यो दुर्गासावित्रिर् एव च
aghamarṣaṇaṃ devakṛtaṃ śuddhavatyastaratsamāḥ
kūṣmāṇḍāni pāvamānyo durgāsāvitrir eva ca
- 12
अतीषङ्गाः पदस्तोभाः सामानि व्याहृतीस्तथा
भारुण्डानि सामानि च गायत्रं रैवतं तथा
atīṣaṅgāḥ padastobhāḥ sāmāni vyāhṛtīstathā
bhāruṇḍāni sāmāni ca gāyatraṃ raivataṃ tathā
- 13
पुरुषव्रतं च भासं च तथा देवव्रतानि च
अब्लिङ्गं बार्हस्पत्यं तु वाक्सूक्तं मध्वृचस्तथा
puruṣavrataṃ ca bhāsaṃ ca tathā devavratāni ca
abliṅgaṃ bārhaspatyaṃ tu vāksūktaṃ madhvṛcastathā
- 14
शतरुद्रियम् अथर्वशिरस्त्रिसुपर्णं महाव्रतम्
गोसूक्तं चाश्वसूक्तं च शुद्धाशुद्धीये सामनी
śatarudriyam atharvaśirastrisuparṇaṃ mahāvratam
gosūktaṃ cāśvasūktaṃ ca śuddhāśuddhīye sāmanī
- 15
त्रीण्य् आज्यदोहानि रथन्तरं च अग्नेर्व्रतं वामदेव्यं बृहच्च
एतानि जप्तानि पुनन्ति जन्तूञ्जातिस्मरत्वं लभते यदीच्छेत्
trīṇy ājyadohāni rathantaraṃ ca agnervrataṃ vāmadevyaṃ bṛhacca
etāni japtāni punanti jantūñjātismaratvaṃ labhate yadīcchet
- 16
अग्नेर् अपत्यं प्रथमं सुवर्णं भूर्वैष्णवी सूर्यसुताश्च गावः
तासाम् अनन्तं फलम् अश्नुवीत यः काञ्चनं गां च महीं च दद्यात्
agner apatyaṃ prathamaṃ suvarṇaṃ bhūrvaiṣṇavī sūryasutāśca gāvaḥ
tāsām anantaṃ phalam aśnuvīta yaḥ kāñcanaṃ gāṃ ca mahīṃ ca dadyāt
- 17
उपरुन्धन्ति दातारं गौर् अश्वः कनकं क्षितिः
अश्रोत्रियस्य विप्रस्य हस्तं दृष्ट्वा निराकृतेः
uparundhanti dātāraṃ gaur aśvaḥ kanakaṃ kṣitiḥ
aśrotriyasya viprasya hastaṃ dṛṣṭvā nirākṛteḥ
- 18
वैशाख्यां पौर्णमास्यां तु ब्राह्मणान्सप्त पञ्च वा
तिलान्क्षौद्रेण संयुक्तान्कृष्णान्वा यदि वेतरान्
vaiśākhyāṃ paurṇamāsyāṃ tu brāhmaṇānsapta pañca vā
tilānkṣaudreṇa saṃyuktānkṛṣṇānvā yadi vetarān
- 19
प्रीयतां धर्मराजेति यद्वा मनसि वर्तते
यावज्जीवकृतं पापं तत्क्षणाद् एव नश्यति
prīyatāṃ dharmarājeti yadvā manasi vartate
yāvajjīvakṛtaṃ pāpaṃ tatkṣaṇād eva naśyati
- 20
सुवर्णनाभं कृत्वा तु सखुरं कृष्णमार्गजम्
तिलैः प्रच्छाद्य यो दद्यात्तस्य पुण्यफलं शृणु
suvarṇanābhaṃ kṛtvā tu sakhuraṃ kṛṣṇamārgajam
tilaiḥ pracchādya yo dadyāttasya puṇyaphalaṃ śṛṇu
- 21
ससुवर्णगुहा तेन सशैलवनकानना
चतुर्वक्त्रा भवेद्दत्ता पृथिवी नात्र संशयः
sasuvarṇaguhā tena saśailavanakānanā
caturvaktrā bhaveddattā pṛthivī nātra saṃśayaḥ
- 22
कृष्णाजिने तिलान्कृत्वा हिरण्यं मधुसर्पिषी
ददाति यस्तु विप्राय सर्वं तरति दुष्कृतम् इति
kṛṣṇājine tilānkṛtvā hiraṇyaṃ madhusarpiṣī
dadāti yastu viprāya sarvaṃ tarati duṣkṛtam iti
- 23
सर्वं तरति दुष्कृतम् इति
sarvaṃ tarati duṣkṛtam iti

