13 shlokas
- 1
अविख्यापितदोषाणां पापानां महतां तथा
सर्वेषां चोपपापानां शुद्धिं वक्ष्याम्य् अशेषतः
avikhyāpitadoṣāṇāṃ pāpānāṃ mahatāṃ tathā
sarveṣāṃ copapāpānāṃ śuddhiṃ vakṣyāmy aśeṣataḥ
- 2
आहिताग्नेर्विनीतस्य वृद्धस्य विदुषो ऽपि वा
रहस्योक्तं प्रायश्चित्तं पूर्वोक्तम् इतरे जनाः
āhitāgnervinītasya vṛddhasya viduṣo 'pi vā
rahasyoktaṃ prāyaścittaṃ pūrvoktam itare janāḥ
- 3
प्राणायामैः पवित्रैश्च दानैर्होमैर्जपैस्तथा
नित्ययुक्ताः प्रमुच्यन्ते पातकेभ्यो न संशयः
prāṇāyāmaiḥ pavitraiśca dānairhomairjapaistathā
nityayuktāḥ pramucyante pātakebhyo na saṃśayaḥ
- 4
प्राणायामान्पवित्राणि व्याहृतीः प्रणवं तथा
पवित्रपाणिर् आसीनो ब्रह्म नैत्यकम् अभ्यसेत्
prāṇāyāmānpavitrāṇi vyāhṛtīḥ praṇavaṃ tathā
pavitrapāṇir āsīno brahma naityakam abhyaset
- 5
आवर्तयन्सदा युक्तः प्राणायामान्पुनः पुनः
आ लोमाग्रान्नखाग्राच्च तपस्तप्यतु उत्तमम्
āvartayansadā yuktaḥ prāṇāyāmānpunaḥ punaḥ
ā lomāgrānnakhāgrācca tapastapyatu uttamam
- 6
निरोधाज्जायते वायुर्वायोर् अग्निर्हि जायते
तापेनापो ऽथ जायन्ते ततो ऽन्तः शुध्यते त्रिभिः
nirodhājjāyate vāyurvāyor agnirhi jāyate
tāpenāpo 'tha jāyante tato 'ntaḥ śudhyate tribhiḥ
- 7
न तां तीव्रेण तपसा न स्वाध्यायैर्न चेज्यया
गतिं गन्तुं द्विजाः शक्ता योगात्सम्प्राप्नुवन्ति याम्
na tāṃ tīvreṇa tapasā na svādhyāyairna cejyayā
gatiṃ gantuṃ dvijāḥ śaktā yogātsamprāpnuvanti yām
- 8
योगात्सम्प्राप्यते ज्ञानं योगो धर्मस्य लक्षणम्
योगः परं तपो नित्यं तस्माद्युक्तः सदा भवेत्
yogātsamprāpyate jñānaṃ yogo dharmasya lakṣaṇam
yogaḥ paraṃ tapo nityaṃ tasmādyuktaḥ sadā bhavet
- 9
प्रणवे नित्ययुक्तः स्याद्व्याहृतीषु च सप्तसु
त्रिपदायां च गायत्र्यां न भयं विद्यते क्वचित्
praṇave nityayuktaḥ syādvyāhṛtīṣu ca saptasu
tripadāyāṃ ca gāyatryāṃ na bhayaṃ vidyate kvacit
- 10
प्रणवाद्यास्तथा वेदाः प्रणवे पर्यवस्थिताः
वाङ्मयं प्रणवः सर्वं तस्मात्प्रणवम् अभ्यसेत्
praṇavādyāstathā vedāḥ praṇave paryavasthitāḥ
vāṅmayaṃ praṇavaḥ sarvaṃ tasmātpraṇavam abhyaset
- 11
एकाक्षरं परं ब्रह्म पावनं परमं स्मृतम्
ekākṣaraṃ paraṃ brahma pāvanaṃ paramaṃ smṛtam
- 12
सर्वेषाम् एव पापानां सङ्करे समुपस्थिते
अभ्यासो दशसाहस्रः सावित्र्याः शोधनं महत्
sarveṣām eva pāpānāṃ saṅkare samupasthite
abhyāso daśasāhasraḥ sāvitryāḥ śodhanaṃ mahat
- 13
सव्याहृतिं सप्रणवां गायत्रीं शिरसा सह
त्रिः पठेद् आयतप्राणः प्राणायामः स उच्यते
स उच्यत इति
savyāhṛtiṃ sapraṇavāṃ gāyatrīṃ śirasā saha
triḥ paṭhed āyataprāṇaḥ prāṇāyāmaḥ sa ucyate
sa ucyata iti

