19 shlokas
- 1
प्राणायामान्धारयेत्त्रीन्यो यथाविध्य् अतन्द्रितः
अहोरात्रकृतं पापं तत्क्षणाद् एव नश्यति
prāṇāyāmāndhārayettrīnyo yathāvidhy atandritaḥ
ahorātrakṛtaṃ pāpaṃ tatkṣaṇād eva naśyati
- 2
कर्मणा मनसा वाचा यद् अह्ना कृतम् ऐनसम्
आसीनः पश्चिमां सन्ध्यां प्राणायामैर्व्यपोहति
karmaṇā manasā vācā yad ahnā kṛtam ainasam
āsīnaḥ paścimāṃ sandhyāṃ prāṇāyāmairvyapohati
- 3
कर्मणा मनसा वाचा यद्रात्र्या कृतम् ऐनसम्
उत्तिष्ठन्पूर्वसन्ध्यां तु प्राणायामैर्व्यपोहति
karmaṇā manasā vācā yadrātryā kṛtam ainasam
uttiṣṭhanpūrvasandhyāṃ tu prāṇāyāmairvyapohati
- 4
सव्याहृतिकाः सप्रणवाः प्राणायामास्तु षोडश
अपि भ्रूणहनं मासात्पुनन्त्य् अहरहः कृताः
savyāhṛtikāḥ sapraṇavāḥ prāṇāyāmāstu ṣoḍaśa
api bhrūṇahanaṃ māsātpunanty aharahaḥ kṛtāḥ
- 5
जप्त्वा कौत्सम् अपेत्य् एतद्वासिष्ठं च त्रिचं प्रति
माहित्रं शुद्धवत्यश्च सुरापो ऽपि विशुध्यति
japtvā kautsam apety etadvāsiṣṭhaṃ ca tricaṃ prati
māhitraṃ śuddhavatyaśca surāpo 'pi viśudhyati
- 6
सकृज्जप्त्वास्यवामीयं शिवसंकल्पम् एव च
सुवर्णम् अपहृत्यापि क्षणाद्भवति निर्मलः
sakṛjjaptvāsyavāmīyaṃ śivasaṃkalpam eva ca
suvarṇam apahṛtyāpi kṣaṇādbhavati nirmalaḥ
- 7
हविष्यन्तीयम् अभ्यस्य न तम् अंह इति त्रिचम्
सूक्तं च पौरुषं जप्त्वा मुच्यते गुरुतल्पगः
haviṣyantīyam abhyasya na tam aṃha iti tricam
sūktaṃ ca pauruṣaṃ japtvā mucyate gurutalpagaḥ
- 8
अपि वाप्सु निमज्जानस्त्रिर्जपेद् अघमर्षणम्
api vāpsu nimajjānastrirjaped aghamarṣaṇam
- 9
यथाश्वमेधावभृथस्तादृशं मनुर् अब्रवीत्
आरम्भयज्ञाज्जपयज्ञो विशिष्टो दशभिर्गुणैः
उपांशुः स्याच्छतगुणः साहस्रो मानसः स्मृतः
yathāśvamedhāvabhṛthastādṛśaṃ manur abravīt
ārambhayajñājjapayajño viśiṣṭo daśabhirguṇaiḥ
upāṃśuḥ syācchataguṇaḥ sāhasro mānasaḥ smṛtaḥ
- 10
ये पाकयज्ञाश्चत्वारो विधियज्ञसमन्विताः
सर्वे ते जपयज्ञस्य कलां नार्हन्ति षोडशीम्
ye pākayajñāścatvāro vidhiyajñasamanvitāḥ
sarve te japayajñasya kalāṃ nārhanti ṣoḍaśīm
- 11
जाप्येनैव तु संसिध्येद्ब्राह्मणो नात्र संशयः
कुर्याद् अन्यं न वा कुर्यान्मैत्रो ब्राह्मण उच्यते
jāpyenaiva tu saṃsidhyedbrāhmaṇo nātra saṃśayaḥ
kuryād anyaṃ na vā kuryānmaitro brāhmaṇa ucyate
- 12
जापिनां होमिनां चैव ध्यायिनां तीर्थवासिनाम्
न परिवसन्ति पापानि ये च स्नाताः शिरोव्रतैः
jāpināṃ homināṃ caiva dhyāyināṃ tīrthavāsinām
na parivasanti pāpāni ye ca snātāḥ śirovrataiḥ
- 13
यथाग्निर्वायुना धूतो हविषा चैव दीप्यते
एवं जाप्यपरो नित्यं ब्राह्मणः संप्रदीप्यते
yathāgnirvāyunā dhūto haviṣā caiva dīpyate
evaṃ jāpyaparo nityaṃ brāhmaṇaḥ saṃpradīpyate
- 14
स्वाध्यायाध्यायिनां नित्यं नित्यं च प्रयतात्मनां
जपतां जुह्वतां चापि विनिपातो न विद्यते
svādhyāyādhyāyināṃ nityaṃ nityaṃ ca prayatātmanāṃ
japatāṃ juhvatāṃ cāpi vinipāto na vidyate
- 15
सहस्रपरमां देवीं शतमध्यां दशावराम्
शुद्धिकामः प्रयुञ्जीत सर्वपापेष्व् अपि स्थितः
sahasraparamāṃ devīṃ śatamadhyāṃ daśāvarām
śuddhikāmaḥ prayuñjīta sarvapāpeṣv api sthitaḥ
- 16
क्षत्रियो बाहुवीर्येण तरेद् आपदम् आत्मनः
धनेन वैश्यशूद्रौ तु जपैर्होमैर्द्विजोत्तमः
kṣatriyo bāhuvīryeṇa tared āpadam ātmanaḥ
dhanena vaiśyaśūdrau tu japairhomairdvijottamaḥ
- 17
यथाश्वा रथहीनाः स्युः रथो वाश्वैर्विना यथा
एवं तपस्त्व् अविद्यस्य विद्या वाप्य् अतपस्विनः
yathāśvā rathahīnāḥ syuḥ ratho vāśvairvinā yathā
evaṃ tapastv avidyasya vidyā vāpy atapasvinaḥ
- 18
यथान्नं मधुसंयुक्तं मधु वान्नेन संयुतम्
एवं तपश्च विद्या च संयुक्तं भेषजं महत्
yathānnaṃ madhusaṃyuktaṃ madhu vānnena saṃyutam
evaṃ tapaśca vidyā ca saṃyuktaṃ bheṣajaṃ mahat
- 19
विद्यातपोभ्यां संयुक्तं ब्राह्मणं जपनैत्यकम्
सदापि पापकर्माणम् एनो न प्रतियुज्यते
एनो न प्रतियुज्यत इति
vidyātapobhyāṃ saṃyuktaṃ brāhmaṇaṃ japanaityakam
sadāpi pāpakarmāṇam eno na pratiyujyate
eno na pratiyujyata iti

