15 shlokas
- 1
अथ ब्रह्मा यजुर्युक्तम् इत्य् उपांश्व् अनुद्रुत्योम् इन्द्रवन्तः प्रचरतेत्य् उच्चैः प्रसौति
atha brahmā yajuryuktam ity upāṃśv anudrutyom indravantaḥ pracaratety uccaiḥ prasauti
- 2
अध्वर्युः प्रसूतो मदन्तीभिर्यमाय त्वा मखाय त्वेति सर्वान्प्रवर्ग्यसंभारांस्त्रिस्त्रिः प्रोक्षति यथा परान्संभारान् अभिप्राप्नुयात्
adhvaryuḥ prasūto madantībhiryamāya tvā makhāya tveti sarvānpravargyasaṃbhārāṃstristriḥ prokṣati yathā parānsaṃbhārān abhiprāpnuyāt
- 3
प्रोक्षितानि व्यायातयति
prokṣitāni vyāyātayati
- 4
प्रेषितो होता ब्रह्म जज्ञानम् इति प्रतिपद्याभिष्टुयात्
preṣito hotā brahma jajñānam iti pratipadyābhiṣṭuyāt
- 5
ऋगावानं प्रणुत्य व्यवस्येत्
ṛgāvānaṃ praṇutya vyavasyet
- 6
आग्नीध्रो रौहिणौ पुरोडाशाव् अधिश्रयति
āgnīdhro rauhiṇau puroḍāśāv adhiśrayati
- 7
प्रतिप्रस्थाता दर्विहोमवद् आज्यं संस्कृत्य दध्य् अधिश्रयति
pratiprasthātā darvihomavad ājyaṃ saṃskṛtya dadhy adhiśrayati
- 8
अग्रेणाहवनीयं सम्राडासन्दीं पर्याहृत्य राजासन्द्याः पुरस्ताद् उत्तरतो वा निदधाति
agreṇāhavanīyaṃ samrāḍāsandīṃ paryāhṛtya rājāsandyāḥ purastād uttarato vā nidadhāti
- 9
तस्यां प्राग्ग्रीवं कृष्णाजिनम् ऊर्ध्वलोमास्तृणाति
tasyāṃ prāggrīvaṃ kṛṣṇājinam ūrdhvalomāstṛṇāti
- 10
तस्मिंस्तथोत्तरौ महावीराव् उपशयौ निदधाति
tasmiṃstathottarau mahāvīrāv upaśayau nidadhāti
- 11
ताव् अप्रचरणीयौ
tāv apracaraṇīyau
- 12
स्थूलशङ्कून्वत्सशङ्कून्विशाखदामानीत्य् आदायाग्रेण होतारं दक्षिणातिक्रम्य दक्षिणया द्वारोपहृत्य दक्षिणेन दक्षिणं द्वारं होतुः समीक्षायां मातुः शङ्कुं निहन्ति
sthūlaśaṅkūnvatsaśaṅkūnviśākhadāmānīty ādāyāgreṇa hotāraṃ dakṣiṇātikramya dakṣiṇayā dvāropahṛtya dakṣiṇena dakṣiṇaṃ dvāraṃ hotuḥ samīkṣāyāṃ mātuḥ śaṅkuṃ nihanti
- 13
पूर्वस्या एव द्वार्याया दक्षिणतो घर्मदुहो वत्सस्यापरस्या एव दक्षिणतो ऽजाया अभ्यन्तरम् उत्तरतो बर्करस्य शङ्कुं निहत्य तत्र विशाखदामानि व्यायातयत्य् ओद्वासनात्
pūrvasyā eva dvāryāyā dakṣiṇato gharmaduho vatsasyāparasyā eva dakṣiṇato 'jāyā abhyantaram uttarato barkarasya śaṅkuṃ nihatya tatra viśākhadāmāni vyāyātayaty odvāsanāt
- 14
अत्र काले बद्ध्वा दुहन्ति
atra kāle baddhvā duhanti
- 15
खरांस्त्रीन्न्युप्योत्तरेणाहवनीयं तं दधि शकलान् उपसादयति वैकङ्कतीं च समिधम्
kharāṃstrīnnyupyottareṇāhavanīyaṃ taṃ dadhi śakalān upasādayati vaikaṅkatīṃ ca samidham

