15 shlokas
- 1
प्रवर्ग्यं भक्षयित्वा न मांसम् अश्नीयात्संवत्सरं चतुरो वा मासान्न रामम् उपेयान्न मृन्मयेन पिबेन्नास्य राम उच्छिष्टं पिबेत्
pravargyaṃ bhakṣayitvā na māṃsam aśnīyātsaṃvatsaraṃ caturo vā māsānna rāmam upeyānna mṛnmayena pibennāsya rāma ucchiṣṭaṃ pibet
- 2
तेज एव तत्संश्यतीति ब्राह्मणम्
teja eva tatsaṃśyatīti brāhmaṇam
- 3
अग्निष्टोमे प्रवृणक्ति नोक्थ्ये प्रवृञ्ज्याद्विश्वजिति सर्वपृष्ठे प्रवृणक्ति न प्रथमयज्ञे प्रवृञ्ज्यात्प्रवृञ्ज्याद्वा
agniṣṭome pravṛṇakti nokthye pravṛñjyādviśvajiti sarvapṛṣṭhe pravṛṇakti na prathamayajñe pravṛñjyātpravṛñjyādvā
- 4
श्रोत्रियानूचानस्य प्रवृञ्ज्याद्दुर्ब्राह्मणस्य च ब्रह्मवर्चसकामस्य च प्रवृञ्ज्यात्
śrotriyānūcānasya pravṛñjyāddurbrāhmaṇasya ca brahmavarcasakāmasya ca pravṛñjyāt
- 5
प्रवर्ग्यम् उद्वासयिष्यन्न् अजाम् अग्नीधे ददाति पष्ठौहीं ब्रह्मणे घर्मदुघं होत्रे शतमानाव् अध्वर्यवे
pravargyam udvāsayiṣyann ajām agnīdhe dadāti paṣṭhauhīṃ brahmaṇe gharmadughaṃ hotre śatamānāv adhvaryave
- 6
अथ पूर्वशान्तिम् उपेत्य तृणानि संस्तीर्याग्रेणाहवनीयं सर्वं परिघर्म्यं सम्राडासन्द्यां सादयति
atha pūrvaśāntim upetya tṛṇāni saṃstīryāgreṇāhavanīyaṃ sarvaṃ parigharmyaṃ samrāḍāsandyāṃ sādayati
- 7
अथाग्नीध्रः प्रवृञ्जनीयोद्वासनीयौ खरौ सते समोप्योत्तरतः सम्राडासन्द्यां सादयत्य् उच्छिष्टखरम् अन्यस्मिन्सते समोप्य दक्षिणया द्वारोपनिर्हृत्य मार्जालीयदेशे निदधाति
athāgnīdhraḥ pravṛñjanīyodvāsanīyau kharau sate samopyottarataḥ samrāḍāsandyāṃ sādayaty ucchiṣṭakharam anyasminsate samopya dakṣiṇayā dvāropanirhṛtya mārjālīyadeśe nidadhāti
- 8
यथेतम् एत्योदग्दशेन वाससा पत्न्याश्चक्षुः प्रोर्णोति
yathetam etyodagdaśena vāsasā patnyāścakṣuḥ prorṇoti
- 9
प्रतिप्रस्थाता गार्हपत्य आज्यं विलाप्योत्पूयौदुम्बर्यां स्रुचि चतुर्गृहीतं गृहीत्वा त्रीन्संनखाञ्छलाकामुष्टीन् आदाय तेषाम् एकम् आहवनीय आदीप्यास्यदघ्ने धारयति
pratiprasthātā gārhapatya ājyaṃ vilāpyotpūyaudumbaryāṃ sruci caturgṛhītaṃ gṛhītvā trīnsaṃnakhāñchalākāmuṣṭīn ādāya teṣām ekam āhavanīya ādīpyāsyadaghne dhārayati
- 10
तस्मिन्न् अध्वर्युर्घर्म या ते दिवि शुग् इति प्रथमाम् आहुतिं जुहोति
tasminn adhvaryurgharma yā te divi śug iti prathamām āhutiṃ juhoti
- 11
तस्मिन्न् अपरम् आदीप्याहवनीये पूर्वं प्रहृत्य घर्म या ते ऽन्तरिक्ष इति नाभिदघ्ने द्वितीयाम् आहुतिं तथापरम् आदीप्य जानुदघ्ने घर्म या ते पृथिव्याम् इति तृतीयाम्
tasminn aparam ādīpyāhavanīye pūrvaṃ prahṛtya gharma yā te 'ntarikṣa iti nābhidaghne dvitīyām āhutiṃ tathāparam ādīpya jānudaghne gharma yā te pṛthivyām iti tṛtīyām
- 12
अपि वा मुष्टीन्विहाय यथाप्रदेशम् आहवनीये तिस्र आहुतीर्जुहोति
api vā muṣṭīnvihāya yathāpradeśam āhavanīye tisra āhutīrjuhoti
- 13
संवृत्य द्वाराणि प्रवर्ग्यम् आदायानु नो ऽद्यानुमतिर् अन्व् इद् अनुमते त्वम् इति द्वाभ्यां पूर्वया द्वारा निष्क्रामन्ति
saṃvṛtya dvārāṇi pravargyam ādāyānu no 'dyānumatir anv id anumate tvam iti dvābhyāṃ pūrvayā dvārā niṣkrāmanti
- 14
प्रतिप्रस्थाता वाससा पत्नीं नयति
pratiprasthātā vāsasā patnīṃ nayati
- 15
महावेदिम् आक्रम्य प्रस्तोतः साम गायेति संप्रेष्यति
mahāvedim ākramya prastotaḥ sāma gāyeti saṃpreṣyati

